Biraq bárinen de mańyzdysy – Qańtar oqiǵasyna qatysty sheshim boldy.
Qańtar aiynan bastap komissiia qurylǵaly beri quramynda zańgerler men advokattar jumys istep keledi. Biz bir emes, birneshe márte raqymshylyq qoldanýdy másele etip kóterdik. Miting dep shyǵyp, artynan jappai tártipsizdikke ulasqan alańda júrgen jastarmen, 600-ge jýyq azamatpen tergeý izoliatory jaǵdaiynda jeke sóilestik. Olarǵa bir ǵana: «Sen óziń jeke azamat retinde osy alańǵa ne úshin shyqtyń?» degen suraq qoiyldy. Sonda basym bóligi «ádiletsizdik» dep jaýap berdi.
Iaǵni qymbatshylyq ta, basqa da emes. Ózi ádiletsizdikke tap bolmasa da, dosy, týysy, tanysynan qoǵamdaǵy ádiletsizdikterdi estidi. Sondyqtan quqyq, zańdylyqtyń saqtalý máselesi birinshi kezekte turý kerek. Qalǵanynyń bári, tipti ekonomikalyq másele ekinshi kezekte turýǵa tiis.
Bir-eki zattyń qymbattaǵanyna halyq alańǵa shyqpaidy.
Jastary 25–35 jas aralyǵyndaǵy 99,9 paiyzy buryn sottalmaǵan. Eshqandai qylmystyq quqyqbuzýshylyq jasamaǵan, tergeý oryndarynda bolmaǵan. Aiaq astynan 2022 jyldyń 4 qańtarynda bári jappai qylmyskerge ainalyp kete me sonda? Múmkin emes. Osyny dáleldegimiz kelip júrgenine biraz ýaqyt boldy. Sondyqtan raqymshylyq jariialaný kerek.
Tipti, qolyna qarý ustap turǵandardyń keibiri ol qarýdy ne úshin ustaǵanyn ózi bilmeidi. Qarýdy alǵanymen, atý, satý maqsaty joq azamattar boldy. Mine, osy azamattarǵa arasha surap júrgenimizge biraz boldy. Osydan 1 ai buryn Prezidenttiń atyna tek qana osy raqymshylyq jariialaý týraly usynys joldadyq. Sonda meilinshe saraptama jasap shyqtyq.
Prezident Joldaýynda raqymshylyq berý týraly sheshim qabyldaǵanyna men óte qatty qýanyshtymyn. Jyl basynan bastap qyrkúiekke deiin 9 aiǵa jýyq tek qana osy sharýamen ainalystyq. Basqa isterge moiyn burýǵa mursha bolyp jatqan joq. Sondyqtan bul – úlken jeńis dep esepteimiz jáne bul úshin Prezidentke alǵystan basqa aitarymyz joq.
Tarihi sát deýge bolady. Jumystyń nátijesi. Bizdiń jumysymyzǵa nazar aýdaryp, estip, osy sheshimdi qabyldady.
