– مەن شاۆكات ميرزيايەۆتىڭ وزبەكستان كونستيتۋسياسىنا قايشىلىعىنا قاراماستان، پرەزيدەنتتىك قىزمەتكە كەلگەنىن سىناعان ەدىم. ەندى مەن سونىم دۇرىس بولماعانىن ءتۇسىندىم. ونىڭ پرەزيدەنت رەتىندە جاساعان كوپتەگەن ىستەرى، اتاپ ايتقاندا ابدەن ۇمىتىلعان حالىققا بەت بۇرىپ، ولارعا قۇلاق اسقانى، مەنىڭ كوڭىلىمنەن شىقتى. ءقازىر وزبەكستان حالقى ميرزيايەۆتەن ۇلكەن وزگەرىستەر كۇتەدى، مەن دە حالىقتىڭ ءبىر وكىلى رەتىندە، پرەزيدەنتتەن جاقسى ءىس كۇتەمىن، - دەدى مۇحامماد ساليح.
https://youtu.be/QQL5njm3qUY
بۇعان قوسا، وزبەك وپپوزيسياسىنىڭ ەڭ بەدەلدى وكىلى پرەزيدەنت ميرزيايەۆتى ەلدە ساياسي جانە ەكونوميكالىق رەفورما جاساۋعا شاقىردى.
– ەلدە ميرزيايەۆتىڭ ەكونوميكالىق رەفورمالار جاساۋىنا كەدەرگى كەلتىرەتىن قۋاتتى توپتار بار. ءبىراق پرەزيدەنتتىڭ ارتىندا تۇتاس ءبىر مەملەكەتتىڭ كۇشى تۇر. ول باتىل بولىپ، مەملەكەتتى تۇنشىقتىرعان مافيادان ارىلۋى ءتيىس. وعان ۇزاق ۋاقىت قاجەت ەمەس، وزگەرىستى بىردەن باستاۋ كەرەك، – دەدى ساليح.
ەسكە سالايىق، 1991 جىلدىڭ جەلتوقسانىندا وزبەكستان جوعارعى كەڭەسىنىڭ دەپۋتاتى، "ەرك" پارتياسىنىڭ نەگىزىن قالاۋشى مۇحامماد ساليح پرەزيدەنتتىك سايلاۋدا يسلام كارىموۆتىڭ جالعىز قارسىلاسى بولدى. 1992 جىلى ماۋسىمدا ساليح ەلدەگى قۋعىنداۋلارعا نارازىلىق رەتىندە دەپۋتاتتىق مانداتتان باس تارتتى. 1993 جىلى ساۋىردە "مەملەكەتتىك ساتقىندىق" ايىبىمەن ۇستالدى، ءبىراق الەمدىك قاۋىمداستىقتىڭ قىسىمىمەن بوستاندىققا شىقتى. وعان تاشكەنتتەن شىعۋعا رۇقسات بەرىلمەدى. ءبىراق ول تۇركياعا قاشىپ كەتتى. سودان بەرى ول ستامبۇلدا تۇرىپ جاتىر.
