قازاقستانداعى ينفلياسيا 2025 جىلى قاڭتاردا ۇدەي ءتۇسىپ، ءبىر جىلدا 8،9% (2024 جىلعى جەلتوقساندا – 8،6%)، ءبىر ايدا 1،1% قۇرادى (وتكەن ايدا – 0،9%). بۇل كورسەتكىش بۇعان دەيىنگى بولجامدارداعىدان اسىپ ءتۇسىپ، ساراپشىلار قاۋىمىن ءدۇر ەتكىزدى، دەپ جازادى Dalanews.kz.
ۇلتتىق ستاتيستيكا بيۋروسىنىڭ مالىمەتىنشە، باعا اقىلى قىزمەتتەرگە ءبىر جىلدا 13،8% (2024 جىلعى جەلتوقساندا – 13،3%)، ازىق-تۇلىك ەمەس تاۋارلارعا – 8،4% (2024 جىلعى جەلتوقساندا – 8،3%)، ازىق-تۇلىك تاۋارلارعا – 5،8% (2024 جىلعى جەلتوقساندا – 5،5%) ءوستى.
جالپى، جىلدىق دەڭگەيدە سيفرلار بىلاي قالىپتاستى:
- ازىق-تۇلىك ينفلياسياسى - 5،8% (جەلتوقساندا - 5،5%)
- ازىق-تۇلىككە جاتپايتىن تاۋارلار ينفلياسيا - 8،4% (8،3%)
- قىزمەت كورسەتۋ سالاسىنداعى ينفلياسيا - 13،8% (13،3%).
قاڭتار ايىندا ازىق-تۇلىك جانە الكوگولسىز سۋسىندار (2،2 پ.ت.)، كوممۋنالدىق قىزمەتتەر (1،7 پ. ت.)، كيىم-كەشەك جانە اياق كيىم (1 پ. ت.) ينفلياسيانىڭ جىلدىق دەڭگەيىنە ەرەكشە ۇلەس قوستى. سونىمەن قاتار، اقىلى قىزمەتتەردىڭ جىلدىق ينفلياسياعا قوسقان ۇلەسى قاڭتاردا 4،0 پ. ت. دەيىن كوتەرىلدى.
"رەسمي ستاتيستيكا اقىلى قىزمەتتەر ءوسىمىنىڭ جەدەلدەۋى (تكش تاريفتەرىنىڭ قىمباتتاۋى)، سونداي-اقالعاشقى ەكى-ۇش ايعا ەرەكشە اسەر بەرۋشى تەڭگەنىڭ قۇنىزدانۋىنان بولعان ەكونوميكالىق پروينفلياسيالىق تاۋەكەلدەردىڭ ىسكە اسقانىن بايقاتادى. سونىمەن قاتار،الدان كۇتىلەتىن جوعارى ينفلياسيالىق بولجامدار دا ينفلياسياعا قىسىم كورسەتۋدە. ءبىز ۇلتتىق بانكى وتكەن اقشا-نەسيە ساياساتى بويىنشا كوميتەت وتىرىسىندا كەيىنگە قالدىرعان ماسەلەلەر بويىنشا نەعۇرلىم باتىل شەشىم قابىلداۋى كەرەك ەدى دەپ سانايمىز. ەندى ينفلياسياعا قاتىستى جاعداي باقىلاۋدان شىعىپ، بولجامدى ينفلياسيا تراەكتورياسىنا ەنبەي قالۋ ىقتيمالدىلىعى جوعارى"، دەپ جازدى عالىمجان ايتقازين Tengemotika ارناسىندا.
سونداي-اق "كوممەنتاريي" تالداۋ توبىنىڭ جەتەكشىسى، ەكونوميست ەلدار شامسۋتدينوۆ تا ينفلياسيا كورسەتكىشى بولجامداردان اسىپ ءتۇسىپ، بۇل فاكت اقشا-نەسيە ساياساتىن قاتاڭداتۋ قاجەتتىلىگىن راستايتىنىن ايتادى.
"ۇلتتىق بانك بازالىق مولشەرلەمەنى ەرتەرەك كوتەرۋى كەرەك ەدى، سوندا ينفلياسيانىڭ ودان ارى ءوسۋ اياسى تارىلادى. ينفلياسيانىڭ شامالى ۇدەۋى دە الدان كۇتىلەتىن كورسەتكىشتى دە زورايتىپ، بولاشاق اتقارىلاتىن شارالاردىڭ تيىمدىلىگىن تومەندەتەدى. ول، ءوز كەزەگىندە باعا ديناميكاسىن باقىلاۋدى قيىنداتادى"، - دەيدى مامان.
بۇعان دەيىن AERC تالداۋ ورتالىعى 2025 جىلى ينفلياسيا 7%-عا جەتۋى مۇمكىن دەپ بولجاعان. ق ر ۇلتتىق بانكىنىڭ ساراپشىلار قاۋىمداستىعى اراسىندا قاڭتار ايىندا جۇرگىزىلگەن ماكروەكونوميكالىق ساۋالنامانىڭ ناتيجەسىنە سايكەس،ساراپشىلار 2025 جىلى كۇتىلەتىن ينفلياسيا كولەمىن 7،5%-عا دەيىن كوتەرگەن ەدى.
