تۇركىستان وبلىسىنىڭ شالعاي اۋىلدارىندا ورنىلاسقان مەكتەپتەرى ەلىمىزدە العاشقىلاردىڭ قاتارىندا يلون ماسكتىڭ Starlink سپۋتنيكتىك ينتەرنەتىنە قوسىلا باستادى،دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

وڭىردەگى 911 مەملەكەتتىك مەكتەپتىڭ بارلىعى ينتەرنەت جەلىسىمەن قامتىلعان. ونىڭ ىشىندە 581 مەكتەپكە تالشىقتى-وپتيكالىق بايلانىس جەلىسى ارقىلى جىلدامدىعى 20-80 مبيت/س ارالىعىنداعى ينتەرنەت جەلىسى ورناتىلعان. 33 مەكتەپ جۋىردا وپتيكامەن قامتىلادى.

بۇدان بولەك، 330 مەكتەپ شالعاي جانە تاۋلى اۋماقتاردا ورنالاسۋىنا بايلانىستى، تەحنيكالىق مۇمكىندىگىنە قاراي جىلدامدىعى 512 كب/س - 20 مبيت/س قۇرايتىن تومەن جىلدامدىقتى ينتەرنەت جەلىسىمەن قامتىلعان. وسى ءبىلىم ۇيالارىنىڭ 200-دەن استامى يلون ماسكتىڭ Starlink سپۋتنيكتىك ينتەرنەتىنە قوسىلدى. بۇل ەلىمىزدەگى ەڭ ۇلكەن كورسەتكىش. قالعان اۋىلدار ءساۋىر ايىنىڭ سوڭىندا جاڭعا جەولىگە تولىق قوسىلىپ، تۇركىستان وبلىسىندا مەكتەپتەدەگى ينتەرنەت ماسەلەسى تولىق شەشىلەدى.

مەملەكەت باسشىسى قاسىم-جومارت توقايەۆ 2023 جىلعى 5 قازاندا وتكەن رەسپۋبليكالىق پەداگوگتەر سەزىندە بارلىق ورتا ءبىلىم بەرۋ مەكەمەلەرىن ساپالى ءارى جوعارى جىلدامدىقتى ينتەرنەت جەلىسىمەن قامتۋدى تاپسىرعان بولاتىن.

پرەزيدەنت تاپسىرماسىنىڭ ۋاقتىلى ورىندالۋى وبلىس اكىمى دارحان ساتىبالدىنىڭ تىكەلەي باقىلاۋىندا.

وسى ورايدا، تۇركىستان وبلىسى اكىمى اپپاراتىنىڭ باسشىسى ەركەعالي ءالىمقۇلوۆ قازىعۇرت جانە تولەبي اۋداندارىنا ىسساپارمەن بارىپ، ءبىلىم ۇيالارىن ساپالى ينتەرنەت جەلىسىمەن قامتۋ جۇمىستارىمەن تانىستى.

الدىمەن، اپپارات باسشىسى قازىعۇرت اۋدانى، ەڭبەك ەلدى مەكەنىندەگى «ەڭبەك» جالپى ورتا ءبىلىم بەرۋ مەكتەبىندە بولدى. مۇندا «رەسپۋبليكالىق عارىشتىق بايلانىس ورتالىعى» اق ارقىلى SpaceX كومپانياسىنىڭ Starlink سپۋتنيكتىك ينتەرنەت جەلىسى ەلىمىزدە العاشقىلاردىڭ ءبىرى بولىپ ورناتىلعان. ينتەرنەت جەلىسىنىڭ جۇمىسىمەن تانىسىپ، مەكتەپ وقۋشىلارىمەن جانە ولاردىڭ اتا-انالارىمەن تىلدەستى.

– ەلىمىزدە العاشقىلاردىڭ ءبىرى بولىپ تۇركىستان وبلىسىنىڭ ءبىلىم ۇيالارىندا Starlink سپۋتنيكتىك ينتەرنەت جەلىسى ورناتىلا باستادى. تۇركىستان وبلىسى اكىمدىگى، ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى جانە ق ر وقۋ-اعارتۋ مينيسترلىگىمەن بىرلەسە وتىرىپ، وبلىس اۋماعىنداعى راديوكوپىر تەحنولوگياسى ارقىلى جانە تومەن جىلدامدىقتى ينتەرنەت جەلىسىمەن قامتىلعان شەكارا ماڭىندا جانە شالعاي، تاۋلى ايماقتاردا ورنالاسقان 330 ورتا ءبىلىم بەرۋ ۇيىمىن «رەسپۋبليكالىق عارىشتىق بايلانىس ورتالىعى» اق ارقىلى SpaceX كومپانياسىنىڭ Starlink سپۋتنيكتىك ينتەرنەت جەلىسىمەن قامتۋ جۇمىستارى جۇرگىزىلۋدە. قازىرگى تاڭدا وبلىس اۋماعىندا 203 مەكتەپتە Starlink سپۋتنيكتىك ينتەرنەت جەلىسىنىڭ قۇرىلعىلارى ورناتىلعان. قالعان مەكتەپتەردە ينتەرنەت جەلىسىنىڭ قۇرىلعىلارىن ورناتۋدى بيىل ءساۋىر ايىنىڭ سوڭىنا دەيىن اياقتاۋ جوسپارلانۋدا، – دەگەن ەركەعالي ءالىمقۇلوۆ قالا مەن اۋىل تۇرعىندارىنىڭ ساپالى ءبىلىم الۋىنا بىردەي مۇمكىندىك جاسالاتىنىن ايتتى.

بۇعان دەيىن «ەڭبەك» جالپى ورتا ءبىلىم بەرۋ مەكتەبىندە «قازاقتەلەكوم» اق بايلانىس وپەراتورىنىڭ تەحنيكالىق مۇمكىندىگىنە قاراي راديوكوپىر تەحنولوگياسىمەن 20 مبيت/س دەيىنگى ينتەرنەت جەلىسىمەن قامتىلعان بولاتىن. ەندى ءبىلىم وشاعى جىلدامدىعى 200 مبيت/س جوعارى بولاتىن Starlink سپۋتنيكتىك ينتەرنەتىمەن قامتىلدى.

اپپارات باسشىسىنىڭ اۋداندارعا جۇمىس ساپارى تولەبي اۋدانىندا جالعاستى. ول تولەبي اۋدانى، كيەلىتاس اۋىلدىق وكرۋگى، سۇلتانرابات ەلدى مەكەنىندەگى «جىلانبۇزعان» جالپى ورتا ءبىلىم بەرۋ مەكتەبىن ينتەرنەت جەلىسىمەن قامتۋ جۇمىستارىن تەكسەرىپ، مەكتەپ ۇجىمىمەن جانە وقۋشىلارمەن كەزدەستى. اتالعان مەكتەپ بۇعان دەيىن راديوكوپىر تەحنولوگياسىمەن 20 مبيت/س دەيىنگى ينتەرنەت جەلىسىمەن قامتىلعان ەدى. بۇگىندە مۇندا «رەسپۋبليكالىق عارىشتىق بايلانىس ورتالىعى» اق ارقىلى SpaceX كومپانياسىنىڭ Starlink سپۋتنيكتىك ينتەرنەتى ورناتىلدى. ەندى مەكتەپ ۇجىمى مەن وقۋشىلار ينتەرنەت جەلىسىن كەدەرگىسىز قولدانۋعا مۇمكىندىك الدى. اۋىل تۇرعىندارى مەن مەكتەپ وقۋشىلارى ەل پرەزيدەنتى مەن وبلىس باسشىلىعىنا العىستارىن ءبىلدىردى.

بۇل باستاما تۇركىستان وبلىسىنىڭ ءاربىر وقۋشىسى ءۇشىن تەڭ مۇمكىندىكتەر جاساۋ ارقىلى، ءبىلىم بەرۋ پروسەسىن سيفرلاندىرۋ جانە سيفرلىق تەڭسىزدىكتى جويۋ باعىتىنداعى ماڭىزدى قادام بولماق. جۇمىستار جالعاسىن تابادى.