ءپۋتيندى نەمەسە ونىڭ ۋكرايناداعى «ارناۋلى اسكەري وپەراسياسىن» (رەسەي بيلىگى ۋكرايناعا باسقىنشىلىعىن «سوعىس» دەپ اتاۋعا تىيىم سالعان – رەد.) قولدايتىنداردىڭ رەسمي سانىنا كۇمان كەلتىرگەن ياسەنيۋك پۋتين مەن ونىڭ جاقتاستارىن «ءبولىپ-جارمايتىنىن» ايتىپ، ولاردىڭ ءبارىن قىلمىسكەر ەكەنىن ايتتى.
– ورىس حالقىنىڭ جالپى ويىنا كۇمان كەلتىرمەيمىن. ال ول ەلدەگى جالپى كوڭىل-كۇي ۋكرايناعا، باتىسقا، ەركىندىككە قارسى. بۇل زۇلىمدىق ورداسىنا اينالدى. مۇنى پۋتين جالعىز ءوزى جاساپ جاتقان جوق، سەبەبى يرپەن مەن بۋچادا بەيبىت تۇرعىنداردى ولتىرگەن ءپۋتيننىڭ ءوزى ەمەس. ماريۋپولدە پۋتين ەمەس، سونىڭ اسكەرى سوعىسىپ ءجۇر. ءبىراق ولار – رەسەيلىكتەر، – دەدى ياسەنيۋك.
18 ساۋىردە بۇۇ بوسقىندار ءىسى جونىندەگى اگەنتتىك سوعىس باستالعالى بەرى ۋكراينادان 5 ميلليوننان استام ادامنىڭ ءۇي-جايىن تاستاپ بوسىپ كەتۋگە ءماجبۇر بولعانىن حابارلاعان-دى. بۇۇ كوشى-قون قىزمەتىنىڭ دەرەگىنشە، ۋكراينادان باسقا ەلدەردىڭ 215 مىڭ ازاماتى كەتكەن، كوبى ستۋدەنتتەر مەن ەڭبەك ميگرانتتارى.
سوعىس جالعاسىپ جاتقاندىقتان ەكى جاقتان دا ناقتى قانشا ادام قازا بولعانىن تاپ باسىپ ايتۋ قيىن. ۋكراينا ءۇش مىڭنان استام ساربازىنان ايرىلعانىن مالىمدەدى. رەسەي 2 مىڭنان از جاۋىنگەرى قازا تاپقانىن حابارلادى، ءبىراق شىن مانىندە قازاعا ۇشىراعاندار بۇدان الدەقايدا كوپ ەكەنىن دالەلدەيتىن دەرەك جەتىپ ارتىلادى.
18 ساۋىردە بۇۇ ادام قۇقىقتارى جونىندەگى جوعارعى كوميسسارى باسقارماسى ۋكراينادا سوعىس كەسىرىنەن 2072 ادام ءولىپ، 2818 بەيبىت تۇرعىن جارالانعانى تىركەلگەنىن ايتتى. سوعىس بولىپ جاتقان ايماققا بارۋعا مۇمكىندىك بولماعاندىقتان، بۇل دا ناقتى دەرەك ەمەس.
