Pýtindi nemese onyń Ýkrainadaǵy «arnaýly áskeri operatsiiasyn» (Resei biligi Ýkrainaǵa basqynshylyǵyn «soǵys» dep ataýǵa tyiym salǵan – red.) qoldaityndardyń resmi sanyna kúmán keltirgen Iatseniýk Pýtin men onyń jaqtastaryn «bólip-jarmaitynyn» aityp, olardyń bárin qylmysker ekenin aitty.
– Orys halqynyń jalpy oiyna kúmán keltirmeimin. Al ol eldegi jalpy kóńil-kúi Ýkrainaǵa, Batysqa, erkindikke qarsy. Bul zulymdyq ordasyna ainaldy. Muny Pýtin jalǵyz ózi jasap jatqan joq, sebebi Irpen men Býchada beibit turǵyndardy óltirgen Pýtinniń ózi emes. Mariýpolde Pýtin emes, sonyń áskeri soǵysyp júr. Biraq olar – reseilikter, – dedi Iatseniýk.
18 sáýirde BUU bosqyndar isi jónindegi agenttik soǵys bastalǵaly beri Ýkrainadan 5 millionnan astam adamnyń úi-jaiyn tastap bosyp ketýge májbúr bolǵanyn habarlaǵan-dy. BUU kóshi-qon qyzmetiniń dereginshe, Ýkrainadan basqa elderdiń 215 myń azamaty ketken, kóbi stýdentter men eńbek migranttary.
Soǵys jalǵasyp jatqandyqtan eki jaqtan da naqty qansha adam qaza bolǵanyn tap basyp aitý qiyn. Ýkraina úsh myńnan astam sarbazynan airylǵanyn málimdedi. Resei 2 myńnan az jaýyngeri qaza tapqanyn habarlady, biraq shyn máninde qazaǵa ushyraǵandar budan áldeqaida kóp ekenin dáleldeitin derek jetip artylady.
18 sáýirde BUU Adam quqyqtary jónindegi joǵarǵy komissary basqarmasy Ýkrainada soǵys kesirinen 2072 adam ólip, 2818 beibit turǵyn jaralanǵany tirkelgenin aitty. Soǵys bolyp jatqan aimaqqa barýǵa múmkindik bolmaǵandyqtan, bul da naqty derek emes.
