قازاقستاننىڭ اگروونەركاسىپ كەشەنىندەگى (اوك) تۇراقتى ءوسىمدى حالىقارالىق ساراپشىلار دا اتاپ ءوتىپ جاتىر. ساراپشىلاردىڭ مالىمەتىنشە، سالاداعى ىلگەرىلەۋ ءوندىرىس كولەمىنىڭ ارتۋىنان ايقىن كورىنەدى. كەيىنگى ءۇش جىلداعى (2023–2025 جج.) ورتاشا كورسەتكىشتى الدىڭعى ءۇش جىلمەن (2020–2022 جج.) سالىستىرعاندا نەگىزگى داقىلدار بويىنشا ءوندىرىس كولەمى 13%-عا وسكەن. ەكسپورت كولەمى دە كەڭەيىپ، الدىن الا باعالاۋ بويىنشا ءدال وسىنداي سالىستىرۋ كەزىندە 27%-عا ارتقان. بۇل تۋرالى بىرىككەن ۇلتتار ۇيىمىنىڭ ازىق-تۇلىك جانە اۋىل شارۋاشىلىعى ۇيىمىنىڭ (فاو) ماماندارى مالىمدەدى، دەپ حابارلايدى Dalanews.kz.

مۇنداي ناتيجەلەرگە كوپ جاعدايدا ءتۇرلى ساناتتاعى شارۋاشىلىقتار ءۇشىن جەڭىلدەتىلگەن قارجىلىق قۇرالدارعا قولجەتىمدىلىكتىڭ كەڭەيۋى ىقپال ەتكەن. بۇل قولداۋ اينالىم قاراجاتىنا دەگەن قاجەتتىلىكتى قامتاماسىز ەتىپ قانا قويماي، تەحنيكا پاركىن جاڭارتۋ مەن وندىرىستىك ينفراقۇرىلىمدى دامىتۋ سياقتى ينۆەستيسيالىق مىندەتتەردى جۇزەگە اسىرۋعا مۇمكىندىك بەرگەن، – دەلىنگەن فاو-نىڭ تالدامالىق ماتەريالىندا.

حالىقارالىق ۇيىم قازاقستاننىڭ مال شارۋاشىلىعى سەكتورىنىڭ الەۋەتى زور ەكەنىن دە مويىندايدى.

“184 ملن گەكتار اۋماقتى قامتيتىن جايىلىمدىق جەرلەرىنىڭ كولەمى بويىنشا قازاقستان الەمدە ءتورتىنشى ورىندا. بۇل جايىلىمدار ءبىرقاتار ستراتەگيالىق ارتىقشىلىق بەرەدى: ءوندىرىس شىعىندارىنىڭ تومەندىگى، كومىرتەك نارىقتارىنا قاتىسۋ مۇمكىندىگى، اگروتۋريزمدى دامىتۋ الەۋەتى، سونداي-اق بيوالۋانتۇرلىلىكتى ساقتاۋعا ايتارلىقتاي ۇلەس قوسۋ. قازاقستاننىڭ قاتاڭ كونتينەنتتىك كليماتى جانۋارلاردىڭ كەيبىر اۋرۋلارىنىڭ تارالۋ جيىلىگىن تومەندەتەتىن تابيعي پروفيلاكتيكالىق فاكتور رەتىندە دە قىزمەت ەتۋى مۇمكىن”، – دەپ اتاپ ءوتتى فاو ساراپشىلارى.

سونىمەن بىرگە سالانى دامىتۋ ءۇشىن ۆەتەرينارلىق باقىلاۋ مەن قاداعالاۋ جۇيەسىنىڭ ماڭىزى زور.

“جانۋارلاردىڭ ءبىرقاتار ترانسشەكارالىق اۋرۋلارى بويىنشا قولايلى مارتەبەنى قالپىنا كەلتىرۋ جانە كەڭەيتۋ، ۆەتەرينارلىق ينفراقۇرىلىمدى جاڭعىرتۋ، سونداي-اق سيفرلىق شەشىمدەردى ەنگىزۋ ساۋدا سەرىكتەستەرىنىڭ سەنىمىن ارتتىرىپ، ەكسپورتتىق مۇمكىندىكتەردى كەڭەيتەدى”، – دەدى حالىقارالىق ساراپشىلار.

ساراپشىلاردىڭ پىكىرىنشە، ازىق-تۇلىك نارىعىنىڭ الەۋمەتتىك ماڭىزدىلىعىنا قاراماستان، قازاقستان اۋىل شارۋاشىلىعىنىڭ دامۋى ءۇشىن ءوندىرىستىڭ رەنتابەلدىلىگى شەشۋشى مانگە يە.

"فاو جانە باسقا دا حالىقارالىق ۇيىمدار تالداعان حالىقارالىق تاجىريبە حالىقتىڭ الەۋمەتتىك تۇرعىدان وسال توپتارىنىڭ تابىسىن ماقساتتى تۇردە قولداۋ ازىق-تۇلىك قاۋىپسىزدىگىن قامتاماسىز ەتۋدە كەڭ كولەمدى باعا رەتتەۋىنەن گورى تيىمدىرەك قۇرال بولۋى مۇمكىن ەكەنىن كورسەتەدى"، – دەپ اتاپ ءوتتى ساراپشىلار.

فاو قازاقستاننىڭ اگروونەركاسىپ كەشەنىندەگى ءوندىرىس تيىمدىلىگىن ارتتىرۋ باعىتىنداعى كۇش-جىگەرىن وڭىرلىك جانە جاھاندىق ازىق-تۇلىك قاۋىپسىزدىگىنە قوسىلعان ماڭىزدى ۇلەس رەتىندە باعالايدى. حالىقارالىق ۇيىم قازاقستاننىڭ اۋىل شارۋاشىلىعى سەكتورى ەكونوميكالىق تيىمدىلىك پەن الەۋمەتتىك مىندەتتەردىڭ تەپە-تەڭدىگىن ساقتاي وتىرىپ، سەرپىندى دامىپ كەلە جاتقانىن اتاپ ءوتتى.

كەيىنگى جىلدارى قازاقستان فاو-مەن ارىپتەستىگىن فاو–قازاقستان سەرىكتەستىك باعدارلاماسى (فكپپ) ارقىلى نىعايتتى. باعدارلاما ۇلتتىق سورتتار مەن تۇقىم شارۋاشىلىعى جۇيەلەرىن دامىتۋعا، ونىڭ ىشىندە قازاقستاندىق الما سورتتارىن قالپىنا كەلتىرۋ جانە ىلگەرىلەتۋگە باعىتتالعان. سونداي-اق دالمە-دال ەگىنشىلىكتى دامىتۋ، شەشىم قابىلداۋدى قولدايتىن سيفرلىق قۇرالداردى ەنگىزۋ، جەردىڭ توزۋىنا قارسى كۇرەس سياقتى باعىتتاردى قامتيدى. بۇل باستامالاردىڭ ماڭىزدى ەرەكشەلىگى – ولاردىڭ ينۆەستيسيالىق باعىتتىلىعى، ياعني جەكە سەكتور مەن حالىقارالىق قارجى ينستيتۋتتارىنىڭ قاتىسۋىمەن اۋقىمدى جوبالاردى جۇزەگە اسىرۋعا دايىندىق جۇرگىزىلىپ جاتىر.