«حالىق» قورىنىڭ باسقارۋشى ديرەكتورى ناريمان ءابىلشايىقوۆتىڭ ايتۋىنشا، بۇل شارا 2020 جىلدان بەرى جۇيەلى تۇردە وتكىزىلىپ كەلەدى.
– ءبىز ءوز باعدارلامالارىمىزدىڭ شەڭبەرىندە قيىن جاعدايعا تاپ بولعان، الەۋمەتتىك از قامتىلعان كوپبالالى وتباسىلارعا ءجيى ازىق-تۇلىك سەبەتتەرىمەن قولداۋ كورسەتەمىز. بۇل ءبىر رەتتىك شارا ەمەس. پاندەميا كەزىنەن باستالىپ، جۇيەلى تۇردە ۇيىمداستىرىلىپ كەلەدى.
قور 2020-2021 جىلدىڭ وزىندە 2،5 ميلليارد تەڭگەدەن استام قارجىعا 100 مىڭنان استام ازىق-تۇلىك جيىنتىعىن تاراتتى. بيىل بۇل اكسيانىڭ اياسىن كەڭەيتۋدى كوزدەپ وتىرمىز.
جاڭا وقۋ جىلى قارساڭىندا الەۋمەتتىك از قامتىلعان وتباسىلاردا ءوسىپ جاتقان 500 بالانى مەكتەپتە دايىنداۋدى جوسپارلادىق. وقۋشىلار مەكتەپ فورماسى جانە وقۋعا قاجەت قۇرالدارمەن قامتىلادى، – دەدى ناريمان ءابىلشايىقوۆ.
قوردىڭ قولداۋىنا يە بولعانداردىڭ ءبىرى – قاراساي اۋدانى بىرلىك اۋىلىنىڭ تۇرعىنى ديلفۋزا تالىپبايەۆا. اۋىل شەتىندە ءۇي جالداپ تۇراتىن ديلفۋزانىڭ 5 بالاسى بار. وتباسىنىڭ تۇراقتى تابىسى جوق.
تۇرمىستىڭ تاۋقىمەتىنەن قاجىعان كەلىنشەك كومەك قولىن سوزعان قايىرىمدىلىق قورىنا ايرىقشا ريزاشىلىعىن ءبىلدىردى.
– بۇل ازىق-تۇلىك 3-4 ايعا جەتەدى. ماكارون، قانت، ۇن، شاي – ءبىزدىڭ كۇندەلىكتى قاجەتتىلىگىمىز. ءبىزدىڭ قازىرگى جاعدايىمىزدا ازىق-تۇلىك الۋ ۇلكەن كومەك. وسىنداي قولداۋ كورسەتكەن «حالىق» قايىرىمدىلىق قورىنا العىسىمىز شەكسىز! – دەدى كوپ بالالى انا.
كومەككە مۇقتاج جاندارعا قولداۋ كورسەتۋدى ماقسات ەتكەن قور جىل اياعىنا دەيىن ءدال وسىنداي اكسيانى تاعى 2 مارتە ۇيىمداستىرۋدى جوسپارلاپ وتىر.
– «حالىق» قايىرىمدىلىق قورى تۇرمىسى تومەن وتباسىلارىنا ازىق-تۇلىك جيىنتىعىن كەزەڭ-كەزەڭىمەن ۇسىنىپ كەلەدى. بۇل – قايىرىمدىلىق شاراسىنىڭ ماڭىزى زور. الەۋمەتتىك ماڭىزى ازىق-تۇلىكتى جيناقتاپ، ۇسىنۋ ارقىلى وتباسىلاردىڭ مۇقتاجدىعىن از دا بولسا قاناعاتتاندىرۋ – حالىقتىڭ بىرلىگى پەن سەنىمىن ارتتىرۋعا قادام بولادى دەپ بىلەمىن. ءبىز تەك بىرىگۋ ارقىلى جاڭا قوعامنىڭ گۇلدەنۋىنە قول جەتكىزەمىز! – دەيدى قوردىڭ الماتى وبلىسى فيليالىنىڭ ديرەكتورى عالىمبەك جاقسىلىقوۆ.
ارينە بۇل قايىرىمدىلىق قورى جوبالارىنىڭ ءبىر تارماعى عانا. 2016 جىلى قۇرىلعان «حالىق» قايىرىمدىلىق قورى ەلىمىزدەگى ماڭىزدى سالالار – الەۋمەتتىك قورعاۋ جانە دەنساۋلىق ساقتاۋ، سپورت، مادەنيەت جانە ءبىلىم سالالارىندا اۋقىمدى جوبالار ىسكە اسىرۋدا. جالپى العاندا، 2016 جىلدان بەرى 45 ملرد تەڭگەگە قايىرىمدىلىق كومەك كورسەتىلدى.
