بۇگىنگى زاماندا دامىعان ەل ازاماتتىق اۆياسياسىن وركەندەتۋگە ەرەكشە ءمان بەرەدى. ەلىمىز ەكونوميكالىق تۇرعىدان جان-جاقتى دامىعالى بەرى ازاماتتىق اۆياسيا سالاسىنا ەرەكشە ءمان بەرىپ كەلەدى. سوڭعى ۋاقىتتارى قازاقستان ءوز جەرىمىزدە ازاماتتىق اۆياسيا ماماندارىن دايارلاۋ ىسىنە ەرەكشە كوڭىل ءبولىپ وتىر.
تاۋەلسىزدىكتىڭ 25 جىلدىعىندا ۇلى دالا ەلىندە بىرنەشە اۋە كومپانيالار قالىپتاسىپ، جولاۋشىلارعا ءوز قىزمەتىن ۇسىنىپ كەلەدى. وسىلايشا قازاقستان ورتالىق ازيادا ازاماتتىق اۆياسيا سالاسى دامىعان ەلدەردىڭ كوشىن باستاپ كەلەدى. سوڭعى بىرنەشە جىلدان بەرى بۇل سالاعا قاجەتتى مامانداردى دايارلاۋ ىسىندە دە ىلگەرىلەۋشىلىكتەر ورىن الىپ جاتقانىن اتاپ ايتۋىمىزعا بولادى. 90-جىلدارى مۇنداي كۇردەلى ماماندار دايارلايتىن وقۋ ورىنداردىڭ ماتەريالدىق بازاسىن جاڭارتۋ – ەڭ وزەكتى ماسەلەلەردىڭ ءبىرى بولدى. قازاقستاننىڭ ەكونوميكالىق الەۋەتى ارتقالى بەرى ازاماتتىق اۆياسيا سالاسىنا مامان دايارلاۋ ءىسى بىرتىندەپ شەشىلگەنىن بايقاۋ قيىن ەمەس. ءبىزدىڭ بۇل سوزىمىزگە تاياۋدا عانا ازاماتتىق اۆياسيا اكادەمياسىنىڭ جاڭا وقۋ-جاتتىعۋ زالى مەن جاڭا ۇشاقتار پاركىنىڭ اشىلۋى ايقىن دالەل بولا الادى. سول ءبىر ايتۋلى شاراعا قاتىسقانىمىزدا ازاماتتىق اۆياسيا اكادەمياسىنىڭ رەكتورى مۇحتار بايجۇمانوۆ بىلاي دەپ ويىن ورتاعا سالعان بولاتىن:
– بۇگىندە ءبىزدىڭ اكادەميا جاڭا وقۋ ۇشاقتارى مەن ساپالى نۇسقاۋشى قۇرامى، قازىرگى زامانعا ساي زاماناۋي ترەناجەر، حالىقارالىق ستاندارت بويىنشا ۇشقىشتاردى دايىندايتىن جاڭا وقۋ ورتالىعىنىڭ تۇساۋىن كەسىپ وتىر. مەملەكەت باسشىسى نۇرسۇلتان نازاربايەۆ 100 ناقتى قادامدا 5 ينستيتۋسيونالدى رەفورمانىڭ ورىندالۋى ءۇشىن باسەكەگە قابىلەتتى مامانداردى دايىنداۋدى جەتىلدىرۋ قاجەتتىلىگىن، ۇشۋ قاۋىپسىزدىگى مەن اۋەتاسىمالداۋدى مەملەكەتتىك رەتتەۋ تيىمدىلىگىن جاقسارتۋدى ەرەكشە اتاپ وتكەن ەدى. بۇگىن ءبىز سول العا قويعان ماقساتتى ورىندادىق. ەندى بىزدەر وتاندىق ازاماتتىق اۆياسيا سالاسىنا قاجەتتى بىلىكتى مامانداردىڭ باسىم بولىگىن ءوز جەرىمىزدە دايارلاپ، سالانىڭ وركەندەۋىنە ءوز ۇلەسىمىزدى قوساتىن بولامىز، – دەگەن ەدى.
ەلىمىزدە اۆياسيا ماماندارىن دايارلايتىن جالعىز وقۋ ورنى ازاماتتىق اۆياسيا اكادەمياسىنىڭ تۇلەكتەرى 10 يتاليالىق ۇشاعى مەن 2 زاماناۋي Airbus جانە Boeing ترەناجەرلەرىنە يە بولعانى بەلگىلى. بورالداي اەرودرومىندا اكادەميانىڭ 10 يتاليالىق Tecnam ماركالى وقۋ-جاتتىعۋ ۇشاقتارىن جاس ۇشاقتار تاقىمدارىنا باسىپ، كوك اسپاندا ۇشىپ ۇيرەنەتىن مۇمكىندىككە يە بولدى. بۇل ءوز كەزەگىندە اكادەميانىڭ ەۋروپا ەلدەرىندەگى جوعارى بىلىكتى ۇشقىشتار دايارلاۋىنا كەڭىنەن جول اشاتىنى ءسوزسىز. سونىمەن قاتار جاڭا ترەناجەرلەر بولاشاق ۇشقىشتارعا جەر مەن اۋەدەگى ءتۇرلى جاعدايلاردا قالاي دۇرىس ارەكەت ەتۋ كەرەكتىگىن ۇيرەنۋگە كومەگىن تيگىزبەك.
وسىلايشا اكادەميا قازاق جاستارىنا زور مۇمكىندىك اشىپ وتىر.
ەندىگى جەردە ۇشقىش بولۋدى بالا كەزىنەن ارمانداعان جاستارىمىز اكادەمياعا وقۋعا ءتۇسىپ، ارماندارىن شىنايى ومىردە ۇشتاۋعا مۇمكىندىك الىپ وتىرعانىن ايتقىمىز كەلەدى. سوندىقتان بالاسىنىڭ بىلىكتى مامان بولۋىن قالاعان كەز كەلگەن اتا-انا الماتىداعى ازاماتتىق اۆياسيا اكادەمياسىن تاڭداپ، بالاسىنىڭ بولاشىعىن ءماندى دە، ماعىنالى قىلۋعا مۇمكىندىك تۋىپ تۇر.
اكادەميانىڭ جاڭارعان تەحنيكالىق بازاسى جاستارىمىزدىڭ جوعارى بىلىكتى مامان بولىپ قالىپتاسۋىنا تولىقتاي كەپىلدىك بەرەدى دەسەك بولادى. سونىمەن قاتار اكادەميانىڭ وقىتۋشىلىق قۇرامى دا وزدەرىنىڭ بىلىكتىلىگىن زامان تالابىنا ساي ۇشتاپ، بالالارعا تەرەڭ ءبىلىم بەرۋگە ماشىقتانعان. بۇگىندە ازاماتتىق اۆياسيا اكادەمياسى ەۋروپانىڭ دامىعان يسپانيا، فينليانديا، ليتۆا ەلدەرىندەگى ازاماتتىق اۆياسيا سالاسىنا ۇشقىشتار دايارلايتىن وقۋ ورىندارىمەن تىعىز ىنتىماقتاستىق ورناتىپ، جان-جاقتى جۇمىس ىستەپ جاتقانىن اتاپ ايتۋىمىز كەرەك. بۇل باعىتتاعى جۇمىستارى ازاماتتىق اۆياسيا اكادەمياسىنىڭ ءوز سالاسى بويىنشا ورتالىق ازيادا كوشباسشى وقۋ ورىنعا اينالعانىن كورسەتەدى. سوندىقتان ازاماتتىق اۆياسيا سالاسىنىڭ مامانى بولۋدى ارمانداعان كەز كەلگەن جاس اكادەميانى تاڭداۋىنا بولادى. وسى رەتتە اكادەميانىڭ ءبولىم مەڭگەرۋشىسى باۋىرجان كورپەشوۆتى اڭگىمەگە تارتىپ، جاڭا ترەناجەرلەر جايىندا سۇراعانىمىزدا:
– ترەناجەرگە وتىرعان كەزدە ۇشاقتا قانداي قيمىل-قوزعالىس بولاتىنىن تولىقتاي سەزىنۋگە بولادى. كوتەرىلگەنى، قۇلديلاعانى، بۇرىلعانىن – ءبارىن شىنايى ومىردەگىدەي باستان كەشەسىز. قالاي ۇشتىڭ، قايدا بۇرىلدىڭ، قانداي جىلدامدىقتا ءجۇردىڭ، بيىكتىگىڭ قانشا – وسىنىڭ ءبارىن كارتا ەسەپتەپ بەرەدى. سول بويىنشا قانداي قاتەلىك كەتتى، سونى تۇزەۋگە قايتادان مۇمكىندىگى بولادى، – دەپ جاڭا ترەناجەردىڭ مۇمكىندىگىن ايتىپ بەردى.
قازىرگى تاڭدا اتالمىش وقۋ ورنىنان تۇلەپ ۇشقان تالاي تۇلەكتەر، ەلىمىزدى ايتپاعان كۇندە، دۇنيەجۇزىنىڭ ءبىرقاتار ەلدەرىندە اۋە كەمەلەرىن تىزگىندەپ، كوك اسپاندا سامعاپ ءجۇر. جەرىمىز كەڭ بولعان سايىن اۋە سالاسىن دامىتۋدىڭ قانشالىقتى ماڭىزى زور ەكەنىن تۇسىنۋگە بولادى. كەڭ بايتاق ەلىمىز شاعىن اۆياسيانى دامىتۋعا سۇرانىپ تۇر.
بۇگىندە ازاماتتىق اۆياسيا اكادەمياسىنىڭ بازاسىندا اۋە سالاسىنا قاجەتتى تەحنيكالىق مامانداردى دايارلاپ، ولارعا ارنايى سەرتيفيكات بەرۋگە دە كۇش سالۋدا. سونىمەن قاتار اكادەميا تىكۇشاقتى تىزگىندەيتىن مامانداردى دايارلاۋدى قولعا العانىن اتاپ ايتۋىمىز كەرەك. اۋە كەمەلەرىنە قىزمەت كورسەتەتىن بىلىكتى تەحنيك مامانداردى وسى كيەلى قارا شاڭىراقتان تۇلەپ، ۇشىپ شىعۋدا. سوندىقتان اكادەميا وتاندىق اۆياسيانىڭ وسىپ-وركەندەۋىنە ولشەۋسىز ۇلەس قوسىپ جاتىر دەپ نىق سەنىممەن ايتۋعا بولادى.
ن.اۋباكىر.
