G7 سامميتىنەن كەيىن اقش پرەزيدەنتى دونالد ترامپ پەن فرانسيا پرەزيدەنتى ەممانۋەل ماكرون بىرلەسكەن باسپا ءسوز كونفەرەنسياسىن وتكىزىپ، ۋكرايناداعى قاقتىعىستى رەتتەۋ، بەيبىت كەلىسسوزدەر جۇرگىزۋ جانە ەۋروپانىڭ قاۋىپسىزدىگىن قامتاماسىز ەتۋ ماسەلەلەرىن تالقىلادى، دەپ حابارلايدى Dalanews.kz.
اقش پرەزيدەنتىنىڭ ايتۋىنشا، ەگەر ەكى تاراپ كەلىسسوزدەر بارىسىندا يكەمدىلىك تانىتسا، ۋكرايناداعى سوعىستى بىرنەشە اپتا ىشىندە اياقتاۋعا بولادى. ول ۆاشينگتوننىڭ قاقتىعىستىڭ ءۇشىنشى دۇنيەجۇزىلىك سوعىسقا ۇلاسۋىنا جول بەرمەيتىنىن اتاپ ءوتتى.
سونداي-اق ترامپ اقش پەن ۋكراينا سيرەك كەزدەسەتىن مەتالدار جانە باسقا دا رەسۋرستار جونىندەگى كەلىسىمدى بەكىتۋگە جاقىن قالعانىن مالىمدەدى.
"زەلەنسكيي الداعى نەمەسە كەلەسى اپتادا كەلىپ، كەلىسىمگە قول قويا الادى. بۇل تاماشا بولار ەدى. مەن ونىمەن وۆال كابينەتتە كەزدەسۋگە دايىنمىن"، – دەدى ترامپ.
بۇدان بولەك، اقش پرەزيدەنتى تاعى بىرنەشە ماسەلەگە توقتالدى.
"رەسەي پرەزيدەنتى ۆلاديمير پۋتين ۋكراينادا ەۋروپالىق بىتىمگەرلىك كۇشتەرىن ورنالاستىرۋعا قارسى ەمەس. اقش رەسەيمەن ۇزاق مەرزىمدى ەكونوميكالىق جوبالاردى جۇزەگە اسىرۋعا مۇددەلى"، - دەدى ول.
ونىڭ پىكىرىنشە، بۇل باستامالار ۋكرايناداعى قاقتىعىستى بەيبىت جولمەن شەشۋگە ىقپال ەتەدى.
"9 مامىردا ماسكەۋگە بارۋ ەرتە، ءبىراق "مەن قولايلى ۋاقىتتا بارعىم كەلەدى"، - دەپ قوستى ول.
فرانسيا پرەزيدەنتى ەممانۋەل ماكرون ءوز كەزەگىندە ۋكراينا بەيبىت كەلىسسوزدەرگە قاتىسۋى كەرەك ەكەنىن جانە پاريج بەن لوندون كييەۆكە قاۋىپسىزدىك كەپىلدىكتەرىن ۇسىنۋ جوسپارىن ازىرلەگەنىن مالىمدەدى.
ماكروننىڭ ايتۋىنشا:
ۋكرايناعا ەۋروپالىق اسكەر كىرگىزۋ مۇمكىندىگى قاراستىرىلىپ جاتىر، ءبىراق ولاردىڭ مىندەتى تەك قاۋىپسىزدىكتى قامتاماسىز ەتۋمەن شەكتەلەدى.
رەسەيدىڭ بۇعاتتالعان اكتيۆتەرىن تاركىلەۋ مۇمكىن ەمەس، ويتكەنى بۇل حالىقارالىق قۇقىق نورمالارىن بۇزادى.
ۋكراينا بەيبىت كەلىسسوزدەرگە قاتىسۋى ءتيىس، ال ەۋروپا ەلدەرى وعان قاۋىپسىزدىك كەپىلدىكتەرىن بەرۋگە دايىن.
