اقتاۋداعى ۇشاق اپاتىنان امان قالعان ءازىربايجاندىق ازامات قازاقستان دارىگەرلەرىنە العىسىن ايتتى، دەپ حابارلايدى Dalanews.kz.
“مەنىڭ ساۋساعىم سىنىپ، وعان گيپس سالدى. سونداي-اق دەنەمدە جاراقاتتار بار. قازاقستاندا بىزگە جوعارى دەڭگەيدە كومەك كورسەتىلىپ جاتىر. جاعدايىمىز جاقسى. بارلىعىنا ريزامىز”، – دەدى نۋرۋللا سيرادجوۆ Report اگەنتتىگىنە بەرگەن سۇقباتىندا.
سونداي-اق سيرادجوۆ جۇبايىنىڭ تاعدىرىنا الاڭداۋلى ەكەنىن جەتكىزدى.
“ونىڭ قايدا جانە قانداي جاعدايدا ەكەنىن بىلمەيمىن. ونىمەن قاۋىشقىم كەلەدى. ۇشاقتا ءبىز قاتار وتىرىپ ەدىك. سودان كەيىن ونى كورگەن جوقپىن. ساعىنىپ جۇرگەن جالعىز ادامىم – ايەلىم”، – دەپ ءسوزىن تولىقتىردى ول.
ايتا كەتەيىك، بۇعان دەيىن ءازىربايجاننىڭ توتەنشە جاعدايلار مينيسترلىگى اقتاۋداعى ۇشاق اپاتىنان امان قالعان ستيۋاردەسسا ايدانا راگيمليدىڭ سۋرەتى مەن ۆيدەوسىن جاريالاعان ەدى.
ول ماڭعىستاۋ وبلىستىق اۋرۋحاناسىندا جاتىر. ستيۋاردەسسا دەلەگاسيانى كورگەندە، كوز جاسىن توقتاتا الماعان.
ايدانا — باكۋدەن گروزنىيعا ۇشقان. ول اقتاۋعا ءۇش شاقىرىم جەردە قۇلاعان Azerbaijan Airlines اۋە كومپانياسىنىڭ اپاتقا ۇشىراعان ۇشاعىندا بولعانداردىڭ ءبىرى. ستيۋاردەسسادان بولەك تاعى ءبىر ەكيپاج مۇشەسى امان قالدى.
ەسكە سالايىق، 25 جەلتوقساندا اقتاۋ ماڭىندا "باكۋ-گروزنىي" باعىتىنا قاتىناعان Azerbaijan Airlines اۋە كومپانياسىنا تيەسىلى ۇشاق اپاتقا ۇشىرادى. رەسمي مالىمەتتەرگە سۇيەنسەك، اپاتتان 29 ادام امان قالدى، 38 ادام قازا تاپتى.
قازاقستان كولىك مينيسترلىگىنىڭ كەلتىرگەن الدىن الا دەرەكتەرى بويىنشا، بورتتا ءازىربايجاننىڭ 37 ازاماتى، قازاقستاننىڭ التى ازاماتى، قىرعىزستاننىڭ ءۇش ازاماتى جانە رەسەيدىڭ 16 ازاماتى بولعان. بارلىعى 67 ادام، ونىڭ ىشىندە بەسەۋى ەكيپاج مۇشەسى. قازاقستان كولىك مينيسترلىگى اۆياسيالىق وقيعانى تەرگەۋ جونىندەگى كوميسسيا قۇرىلعانىن مالىمدەدى. كوميسسيا رەسەي مەن ءازىربايجاننىڭ قۇقىق قورعاۋ ورگاندارى اۋە اپاتىن تەرگەۋگە جىبەرىلەتىنىن ايتتى.
