بۇگىنگى ماقالامىز ءۇرجار بالالارعا ارنالعان ارنايى الەۋمەتتىك قىزمەت كورسەتۋ ورتالىعىنىڭ اربادا وتىرىپ بيلەۋدى ۇزدىك مەڭگەرگەن قىزمەت الۋشىسى، بىرنەشە جارىستاردىڭ جەڭىمپازى، دارىندى، ەشكىمگە ۇقسامايتىن تاعدىر يەسى جۋراۆليەۆ الەكسەي تۋرالى بولماق.
جارىق دۇنيەگە دەنساۋلىعىنداعى كىناراتپەن كەلگەن الەكسەي تۋعان ساتتەن-اق تاعدىردىڭ تاۋقىمەتىنە تاپ بولدى. سىرت كەلبەتىنىڭ كۇردەلى كەمىستىگىمەن دۇنيەگە كەلگەن سابيدەن اتا-اناسى تۋىلعان ساتتە باس تارتتى. دۇنيەگە شىر ەتىپ ەندى كەلگەن نارەستە اتا-اناسىنىڭ قامقورلىعىنسىز قالدى.
5 جاسقا دەيىن الەكسەي وسكەمەن قالاسىنداعى بالالار ۇيىندە تاربيەلەندى. 2011 جىلدان جوعارىدا اتالعان مەكەمەدە تاربيەلەنەدى. ورتالىقتا وعان الەۋمەتتىك-تۇرمىستىق، الەۋمەتتىك-پسيحولوگيالىق، الەۋمەتتىك-پەداگوگيكالىق، الەۋمەتتىك-مادەني، الەۋمەتتىك-ەڭبەكتىك، الەۋمەتتىك-ەكونوميكالىق، الەۋمەتتىك-قۇقىقتىق قىزمەت تۇرلەرى تولىعىمەن كورسەتىلدى. سول ساتتە ول ورتالىقتاعى اتا-انا قامقورلىعىنسىز قالعان بالا بولدى.
ەس كىرىپ ءوسىپ كەلە جاتقان بالاعا ءوزىنىڭ دوستارىنىڭ كۇندەلىكتى ۇيلەرىنە قايتىپ، دەمالىس كۇندەرىن وتباسىمەن وتكىزەتىنى مىنەز-قۇلقىنا اسەر ەتە باستادى. الايدا، الەكسەي تاعدىر تاۋقىمەتىنە قاراماستان ءوز-وزىن جەڭە ءبىلدى، مويىمادى. ءيا، ەكى اياقسىز ءومىر ءسۇرۋ مۇمكىن ەمەستەي كورىنەتىنىن مويىندايمىز.
ءبىراق، الەكسەي ءوزىنىڭ وجەتتىلىگىمەن اربادا وتىرىپ قولىنىڭ كومەگىمەن بارلىق نارسەلەردى وزدىگىنەن ورىندۋدى ۇيرەندى، قازاق ءتىلىن ەركىن مەڭگەرىپ، «ب.تۇرلىحانوۆ اتىنداعى ورتا مەكتەبى-باقشاسى» كمم-دە قازاقشا ءبىلىم الدى، قول ەڭبەگىمەن اينالىسىپ، ءان ايتىپ، ساحنادا ونەر كورسەتۋگە، اربادا وتىرىپ بيلەۋگە قىزىعۋشىلىعى ارتتى. اربادا وتىرىپ ءبيدى باعىندىرۋعا باعىت بەرىپ، سپورت ارباسىمەن قامتۋدا دەمەۋشىلەردى تارتقان رىسقان جاعىپار قىزىنىڭ جانە بىلىكتى باپكەرى ناتاليا انيستراتوۆانىڭ جاتتىقتىرۋىمەن الەكسەي اربادا وتىرىپ بيلەۋدىڭ قىر-سىرىن مەڭگەرىپ وبلىستىق، رەسپۋبليكالىق، حالىقارالىق سايىستاردا ءوز ونەرىن كورسەتە باستادى.
2017 جىلى رەسەيدىڭ سانكت-پەتەربۋرگ قالاسىندا وتكەن ءداستۇرلى «قۇرلىقتار كۋبوگى» ارباداعى بي سايىسىنا قازاقستان اتىنان العاش قاتىسقان 11 جاستاعى الەكسەي ەل نامىسىن قورعاپ جۇلدەلى ءبىرىنشى ورىندى يەلەندى. 2018 جىلى اربادا وتىرىپ بيلەۋدەن قازاقستان چەمپيوناتىندا «Single man»، «Single freestyle» نوميناسيالارىندا ەكى بىردەي التىن جۇلدەگە يە بولدى.
2018 جىلى تاعى دا «قۇرلىقتار كۋبوگىندە» جاسوسپىرىمدەر اراسىندا توپ جارىپ «Single man Junior» كۋبوگىن جانە «پاراليمپيادالىق ءۇمىت» كۋبوگىنە يە بولدى. 2019 جىلى XIV حالىقارالىق «جۇلدىزاي» ەرەكشە قاجەتتىلىكتەرى بار بالالار شىعارماشىلىعى فەستيۆالىنە قاتىسىپ جۇلدەلى 1 ورىننان كورىندى.
2019 جىلى سانكت-پەتەربۋرگ قالاسىندا ارباداعى بي بويىنشا وتكەن دودادا الەكسەي «الەم كۋبوگى» مەن «قۇرلىقتار كۋبوگىن» يەلەنىپ گەرمانيادا وتەتىن الەم چەمپيوناتىنا جولداما العان.
الەكسەي اربادا وتىرىپ بيلەۋدەن قۇرلىقتار كۋبوگىنا قاتارىنان ءۇش جىل قاتىسىپ، ءۇش رەتىندە ءبىرىنشى ورىن الىپ، بايراعىمىزدى كوككە جەلبىرەتكەن شىعىس قازاقستاندىق بيشى-سپورتسمەن.
ەرەكشە تاعدىر يەسى جۋراۆليەۆ الەكسەي ءبىزدىڭ ورتالىقتىڭ عانا ەمەس، ءۇرجار اۋدانىنىڭ، قازاقستاننىڭ ماقتانىشى. ورتالىقتا مەملەكەت تاراپىنان جانە قىزمەتكەرلەر تاراپىنان تيىسىنشە قامقورلىق كورسەتىلگەنىمەن، بالاعا اتا-انانىڭ ايالى الاقانىنا ەشتەڭە جەتپەيتىنى انىق ەدى.
وتباسى – ول بالانىڭ قالىپتى ءومىرى مەن دامۋى ءۇشىن ەڭ جاقسى ورىن. ول – ءبىز جاقسى كورەتىن، ۇلگى الاتىن، قامقورلىق جاسايتىن، جاقسىلىق تىلەيتىن ادامدار.
2018 جىلى ورتالىق ماماندارىنىڭ ناتيجەلى ىزدەستىرۋ جۇمىستارىنىڭ ارقاسىندا الەكسەيدىڭ اتا-اناسىنىڭ مەكەن-جايى تابىلىپ، ەكى جاقتى بايلانىس ورناتىلدى.
ورتالىق ديرەكتورى جانە ءتيىستى ماماندار باستاپقى كەزدە اتا-اناسىمەن تەلەفون ارقىلى بايلانىسىپ، كەيىن كەلە بەتپە – بەت كەزدەسىپ سويلەسىپ، الەكسەيدىڭ وتباسىمەن قاۋىشۋىنا بارىنشا ات سالىستى، كومەكتەستى. سونىڭ ارقاسىندا، الەكسەيدىڭ تىلەۋىنە، قۋانىشىنا، ارمانىنا وراي 2019 جىلى اقپان ايىندا بالا تۋعان وتباسىنا ورالدى. الەكسەي بۇل كۇندى تاعاتسىزدانا كۇتتى، قوبالجىدى. وتباسىمەن قاۋىشۋ بالانىڭ پسيحولوگياسىنا جاقسى اسەر ەتتى.
الەكسەيدى سپورت شەبەرلىگىنە ۇمىتكەر دارەجەسىنە جەتكىزىپ، قامقورسىز قالعان ساتتە جىلۋىن بەرىپ، جابىققاندا قولداۋ كورسەتىپ، ەرەكشە بالانىڭ جان-جاقتى دامۋىنا اسەر ەتكەن، جاقسى تاربيە-بىلىم بەرگەن ايجان امانجول قىزى باسشىلىق ەتەتىن ءۇرجار بالالارعا ارنالعان ارنايى الەۋمەتتىك قىزمەت كورسەتۋ ورتالىعى قىزمەتكەرىنىڭ ەڭبەگى زور.
الەكسەي دەمالىس ۋاقىتىندا ۇيىنە بارىپ، قالعان ۋاقىتتا ورتالىقتا قىزمەت الۋىن توقتاتپاي، مەكتەپتە ءبىلىم الۋىن جالعاستىرىپ، اربادا وتىرىپ بيلەۋدەن جاتتىعۋىن شىڭداۋدا. بۇگىنگى كۇنى ءبىزدىڭ ورتالىقتىڭ تاربيەلەنۋشىسى الەكسەي جۋراۆليەۆ شەمونايحا اۋدانى ۋست-تالوۆكا كەنتىندە كوپبالالى وتباسىنىڭ جانىندا جازعى دەمالىسىن وتكىزۋدە.
ورتالىق ديرەكتورى ايجان امانجول قىزى الەكسەيدىڭ بيولوگيالىق وتباسىمەن قايتا قاۋىشۋىنا قولداۋ كورسەتىپ، الەكسەيگە مىقتى دەنساۋلىق، وتباسىلىق باقىت، بارلىق قيىندىقتاردى اتا-اناسىمەن بىرگە جەڭۋگە تىلەكتەس بولدى. ۇجىمىمىزبەن الەشا سياقتى ءار بالانىڭ ءوز وتباسىنا ورالۋىن تىلەيمىز.
«ءۇرجار بالالارعا ارنالعان ارنايى الەۋمەتتىك
قىزمەت كورسەتۋ ورتالىعى» كمم.
