قازاقستان ۇكىمەتىنىڭ كەڭەيتىلگەن وتىرىسى قورىتىندىسى بويىنشا پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ەل بيۋدجەتىنىڭ تاپشىلىعى 2029 جىلعا قاراي تومەندەيدى دەپ مالىمدەدى، دەپ حابارلايدى Dalanews.kz.

ءجۇمانعاريننىڭ ايتۋىنشا، قازاقستانداعى بيۋدجەت تاپشىلىعى قازىرگى ۋاقىتتا ءجىو-نىڭ 2،7 پايىزىن قۇرايدى. ول بۇل كورسەتكىش “رۇقسات ەتىلگەن شەكتەن اسپايدى” دەپ اتاپ ءوتتى.

“ءبىز بيۋدجەت تاپشىلىعىن 2029 جىلعا قاراي 1،9 پايىزعا دەيىن ازايتۋدى جوسپارلاپ وتىرمىز. بۇل مەملەكەتكە تىم كوپ قارىز الماۋ ءۇشىن، ءوزىن-وزى شەكتەۋ ءۇشىن جاسالادى”، – دەدى مينيستر.

ۆيسە-پرەمەردىڭ مالىمەتىنشە، مەملەكەتتىك قارىزدىڭ جىو-گە شاققانداعى دەڭگەيى دە اسا جوعارىلىعى بايقالمايدى – شامامەن 22،8 پايىز.

“دامىعان ەلدەردە بۇل كورسەتكىش 30 پايىزدان جوعارى بولۋى مۇمكىن. جالپى، 60 پايىزعا دەيىنگى قارىز – قالىپتى دەپ سانالادى. كەي ەلدەردە 100 پايىزدان دا اسىپ كەتەدى. ول مەملەكەتتىڭ اعىمداعى جاعدايىنا بايلانىستى”، – دەپ ءتۇسىندىردى جۇمانعارين.

مينيستر بيۋدجەتتىڭ 60-70 پايىزىن ەلدىڭ ءوز تابىسى قۇرايتىنىن ايتتى. بۇل كىرىستىڭ 95 پايىزى – سالىقتىق تۇسىمدەر.

“باسقا كىرىس كوزدەرى جوق دەسە دە بولادى. ال ۇلتتىق قوردان بەرىلەتىن ترانسفەرت شامامەن 30 پايىزدى قۇرايدى”، – دەپ تولىقتىردى جۇمانعارين.

ساراپشىلاردىڭ پىكىرىنشە، بيۋدجەت تاپشىلىعىن تومەندەتۋ جانە سالىقتىق بازاعا ارقا سۇيەۋ – قازاقستاننىڭ قارجى تۇراقتىلىعىن نىعايتۋعا باعىتتالعان قادام. ال ۇكىمەت پەن ۇلتتىق ەكونوميكا مينيسترلىگى وسى ساياساتتى ودان ءارى جالعاستىرا وتىرىپ، 2029 جىلعا قاراي دەفيسيتتى ءبىرشاما ازايتۋعا ۋادە بەرىپ وتىر.