اشىمبايەۆ "ورالماندار مەملەكەت ەسەبىنەن كۇن كورەتىنىن" ايتقان، ءارى ەلدەن ورىستاردىڭ اۋا كوشىپ جاتقانىنا الاڭداۋشىلىق بىلدىرگەن.
بىلتىر ءبىزدىڭ ەلدەن 45،2 مىڭ ادام كوشىپ كەتكەن. ولاردىڭ كوپشىلىگى (39 مىڭ ادام) رەسەيدەن قونىس تاپقان.
“بۇل قازاقستانداعى حالىق سانىنىڭ ازايۋىنا اسەر ەتكەن جوق. سەبەبى سىرتتان كوشىپ كەلىپ جاتقان ەتنيكالىق قازاقتار بارشىلىق. بۇلاردىڭ كوپشىلىگى ورتا ءبىلىمدى.
سايىپ كەلگەندە بىرەۋ كەتىپ، ءبىر كەلىپ جاتىر. كەتىپ جاتقاندار وقىپ-توقىعان جاستار، كەلىپ جاتقاندار ەتنيكالىق قازاقتار.
ولاردىڭ – ءبىلىمى، جۇمىس ءوتىلى جوق. ولار وسىندا كوشىپ كەلىپ، مەملەكەت ەسەبىنەن كۇن كورگىسى كەلەدى”، – دەگەن ساياساتتانۋشى.
بۇل ءقازاقتىلدى قاۋىمنىڭ، ونىڭ ىشىندە اتاجۇرتىنا ورالعان قانداستاردىڭ كوڭىلىنە ءتيىپ، كوپشىلىك "بۇل پىكىرى ءۇشىن اشىمبايەۆتى جاۋاپقا تارتۋدى" تالاپ ەتتى.
قانداستار ماسەلەسىن مەملەكەتتىك دەڭگەيدە كوتەرىپ جۇرگەن قوعام قايراتكەرى، ۇلتتىق كەڭەستىڭ بەلسەندى مۇشەسى اۋىت مۇحيتبەك اشىمبايەۆقا جاۋاپ بەرىپ، ونىڭ "ورالماندار مەملەكەت ەسەبىنەن كۇن كورەدى" دەگەن پىكىرىن جوققا شىعاردى.
اۆتوردىڭ وسى تاراپتاعى ويىن قاز-قالپىندا نازارىڭىزعا ۇسىنامىز.
"ساياساتتانۋشى دانيار اشىمبايەۆتىڭ "Dalanews.kz" سايتىندا “ورالماندار؟ ولار مەملەكەت ەسەبىنەن كۇن كورگىسى كەلەدى” (2 ناۋرىز، 2020 جىل) دەگەن پىكىرى جارىق كورىپتى.
كەتىپ جاتقاندار كوپ، ارينە. بۇدان بىلاي دا ولاردىڭ قارقىنى باسىلماۋى مۇمكىن.
ءبىراق، مەن ولاردى قازاقستاندا كۇنكورىستىڭ قيىندىعىنان كوشۋدە ءماجبۇر بولىپ جاتىر دەپ ويلامايمىن.
نەگىزى، ءبىر ەلدەن ەكىنشى ەلگە قولىندا بار، قالتاسى قالىڭ ادامدار كوشە الادى. قازاقستاننان بوسقىن بولىپ كەتىپتى دەگەندى، قۇدايعا شۇكىر، ەستىگەن جوقپىز.
ەكىنشىدەن، ولار دا ۇرپاعىنىڭ بولاشاعىن ويلايدى، ءوز ۇلتىنىڭ ءوشىپ قالماۋىن قالايدى... سوندىقتان نەگە كەتتىڭ دەپ ولاردى، نەگە "كەتىردىڭ" دەپ، قازاقستاندى كىنالاۋعا كەلمەيدى. قايتا، كەتكەندەرگە "جولى بولسىن!" ايتقان ءجون.
سوسىن، ساياساتتانۋشى اشىمبايەۆ مىرزانىڭ "ولار وسىندا كوشىپ كەلىپ، مەملەكەت ەسەبىنەن كۇن كورگىسى كەلەدى”-دەگەن پىكىرىن تۇسىنبەي وتىرمىن.
ۇكىمەت 2020 جىلى قانداستاردى قابىلداۋعا ارنالعان ايماقتىق كۆوتا ءۇشىن نەبارى 1378 ادامعا عانا قاراجات ءبولدى. مەن ون جىلدان بەرى قانداستار ماسەلەسىمەن تىكە اينالىسىپ كەلە جاتقان اداممىن، ولاردىڭ جاعدايىن وتە جاقسى بىلەم.
قانداستارىمىز ءوزىن-وزى جۇمىسپەن قامتۋدا بۇكىل قازاقستاندىققتارعا ۇلگى بولارلىق جاعدايدا.
اقشا، ءۇي سۇراپ كەلگەن قانداسىمدى جولىقتىرعان ەمەسپىن.
ولاردى قيناپ كەلگەن ءبىر-اق ماسەلە بار. ول -- قۇجاتتانۋداعى قيىنشىلىق. قۇدايعا شۇكىر، ول ماسەلە دە ءوز شەشىمىن تاۋىپ جاتىر.
دانيار اشىمبايەۆ مىرزا "ۇكىمەتتە رومان سكلياردان (پرەمەردىڭ ورىنباسارى) وزگە ۇلت وكىلدەرى جوق. ۆيسە-مينيسترلەردىڭ دەڭگەيىندە وزگە ۇلت وكىلدەرىن ساۋساقپەن ساناپ الاسىز. اكىمدەر اراسىندا دا قازاق ەمەستەر جوق. اۋدان اكىمدەرى اراسىندا ءىشىنارا عانا وزگە ۇلتتار. ۇلتتىق كومپانيالار دەڭگەيىندە دە وسى كورىنىس"-دەپ، كەيىپتى.
ءدال وسى جاعداي شەتتەن ورالعان قانداستارىمىزدىڭ دا باسىندا بار جاعداي. قايتا، رومان سكليار پرەمەردىڭ ورىنباسارى ەكەن عوي، ونداي لاۋازىم قانداستارىمىزدىڭ ويى تۇرماق، تۇسىنە دە كىرگەن ەمەس. قانداستارىمىز لاۋاسىزىم، پايدا ىزدەپ كەلگەن جوق، ءوز وتانىندا ءومىر ءسۇرۋ ءۇشىن كەلىپ جاتىر.
كوشىپ كەلگەندەردىڭ ىشىندە بىلىكتى ازاماتتار جوق ەمەس، بار. كوپ. ءبىراق، مىنە وتىز جىل بولدى، ۇكىمەت ءوزى ءبىلىپ ولاردى لاۋازىمدى قىزمەتكە قويۋ جاعىن ويلاستىرعان جوق...
جالپى، مەن كەلىپ جاتقانداردى كەمسىتۋگە تىپتەن قارسىمىن! قازاستان - قازاقتىڭ قارا شاڭىراعى، الەمدەگى جالعىز وتانى! وعان تاريحي سەبەپتەرمەن ءبولىنىپ قالىپ، شەتتە جۇرگەن ءيسى قازاقتىڭ ءبارى كەلۋگە قۇقىقتى.
ولاردىڭ ءبىلىم جانە مادەنيەت دەڭگەيى ءار ءتۇرلى بولۋى مۇمكىن، وعان ولار جازىقتى ەمەس. ەڭ باستىسى، شەتتەن كوشىپ كەلگەن قانداستارىمىز قازاقستاندا تۇراقتى ءومىر سۇرەدى. وسىنداعى جۇرت نە كورسە، سونى باسىنان كەشىرۋگە دايىن! وتانىنا دەگەن ادالدىعى مەن سەنى بەرىك!!
بۇل -- توننالاپ التىن بەرىپ ساتىپ الا المايتىن قۇندىلىق!!!
ءبىر بۋىن وكىلدەرى الا-قۇلا ءومىر سۇرگەنىمەن، كەلەسى بۋىن تەڭەسىپ كەتەدى. باسقادان اقشا اياۋعا بولاتىن شىعار، قازاق كوشىنەن قاراجات اياماۋ كەرەك! سوندىقتان، كەتكەنگە كەيىمەيىك، كەلگەندى كەمسىتپەيىك، اعايىن!"، – دەيدى اۋىت مۇقيبەك.
