قازاقستان ۇلتتىق بانكى 6 ناۋرىزدا بازالىق مولشەرلەمەنى جىلدىق 18% دەڭگەيىندە وزگەرىسسىز قالدىرۋى مۇمكىن، دەپ حابارلايدى Dala news.
Reuters اگەنتتىگى ساۋالناما جۇرگىزگەن توعىز ساراپشىنىڭ بارلىعى دا رەتتەۋشى مولشەرلەمەنى قازىرگى دەڭگەيدە ساقتايدى دەگەن پىكىردە.
ەسكە سالايىق، 2025 جىلدىڭ قازان ايىندا ينفلياسيانىڭ جەدەلدەۋىنە بايلانىستى ۇلتتىق بانك بازالىق مولشەرلەمەنى 16،5%-دان 18%-عا دەيىن كوتەرگەن بولاتىن. 2026 جىلدىڭ قاڭتارىندا رەتتەۋشى بۇل كورسەتكىشتى وزگەرىسسىز قالدىرىپ، مولشەرلەمە ءبىرىنشى جارتىجىلدىقتىڭ سوڭىنا دەيىن وسى دەڭگەيدە ساقتالۋى ىقتيمال ەكەنىن مالىمدەگەن.
ۇلتتىق ستاتيستيكا دەرەكتەرىنە سايكەس، 2025 جىلى قازاقستانداعى ينفلياسيا 12،3%-عا دەيىن جەدەلدەدى. ال 2026 جىلعا ارنالعان بولجام 9،5–12،5% ارالىعىندا. اقپاندا ايلىق ينفلياسيا 1،1% بولىپ، قاڭتارداعى 1،0%-دان جوعارىلادى.
ەۋرازيالىق دامۋ بانكىنىڭ ەلدىك تالداۋ ورتالىعىنىڭ جەتەكشىسى ارتۋر ءشارافۋتدينوۆتىڭ پىكىرىنشە، رەتتەۋشى ينفلياسيالىق كۇتۋلەردى تۇراقتاندىرۋ ءۇشىن مولشەرلەمەنى قازىرگى دەڭگەيدە ساقتاۋى ىقتيمال.
ال Halyk Finance ساراپشىلارى قازىرگى جاعدايدا بازالىق مولشەرلەمەنى تومەندەتۋگە نەگىز جوق ەكەنىن ايتادى. ولاردىڭ بولجامىنشا، كوممۋنالدىق تاريفتەردىڭ وسۋىنە بايلانىستى ينفلياسيا جىل سوڭىنا قاراي شامامەن 10،5–11،5% دەڭگەيىندە بولۋى مۇمكىن.
