ۇلتتىق بانك ءتوراعاسىنىڭ كەڭەسشىسى ءسابيت حاكىمجانوۆ بازالىق مولشەرلەمەنىڭ ينفلياسياعا اسەرى شەكتەۋلى دەگەن پىكىرگە قاتىستى جاۋاپ بەردى. ورتالىق بانكتىڭ وكىلى بازالىق مولشەرلەمەنى تومەندەتۋ ءقاۋىپتى ەكەنىن اتاپ ءوتتى، ويتكەنى بۇل ەكونوميكالىق تاۋەكەلدەرگە اكەلىپ سوعۋى مۇمكىن، سونداي-اق ينفلياسيانى 5%-عا دەيىن تومەندەتۋ ۇزاق مەرزىمدى ماقساتتاعى دۇنيە ەكەنىن ناقتىلايدى، دەپ حابارلايدى Dalanews.kz.
ول بۇل جايتتى دۇرىس ءتۇسىندىرۋ ماڭىزدى ەكەنىن ايتا كەلە، ونىڭ كەيبىر اسپەكتىلەرىنە باسا نازار اۋدارتادى.
"ستاۆكانىڭ ينفلياسياعا اسەرى بەلگىلى ءبىر شەكتى ماننەن، ياعني "تيىمدىلىك شەگىنەن" اسقان سوڭ السىرەيدى. بەلگىلەنگەن شەك ءبىر اۋماقتا قالىقتاپ جۇرەدى = كۇتىلەتىن ينفلياسيا + باسقا فاكتورلارعا بايلانىستى 3-6 پايىزدىق تارماق. ۇلتتىق بانك وسى فاكتورلاردى باقىلاپ، ستاۆكانى شەكتى دەڭگەيدە ۇستايدى. ال ودان ارى تومەندەتە المايمىز، ويتسەك بارلىعى قۇلدىراي جونەلەدى. وسى جاعىنان العاندا، بازالىق مولشەرلەمەنىڭ ينفلياسياعا اسەرى وتە زور، اسىرەسە ەگەر ول بەلگىلەنگەن شەكتەن جوعارى بولسا، ال ودان تومەندەسە، ارينە اسەرى باسەڭدەيدى"، - دەيدى حاكىمجانوۆ كەيبىر ساراپشىلاردىڭ بۇل رەتتەگى پايىمىنا جاۋاپ بەرە وتىرىپ.
ونىڭ ايتۋىنشا، 9-10% دەڭگەي دەپ بەلگىلەپ، ماقسات قويۋ مۇمكىن ەمەس.
"ەگەر سولاي جاسايتىن بولساق، وندا ءبىز ەشقاشان باعا تۇراقتىلىعىنا قول جەتكىزە المايمىز، ويتكەنى 9%-دان كەيىن موتيۆاسيا جوعالادى. ماقسات ىنتالاندىرىپ وتىرۋى ءتيىس جانە وعان ورتا مەرزىمدە قول جەتكىزىلۋى كەرەك. 5% ماقسات ىنتالاندىرۋعا قابىلەتتى جانە وعان قول جەتكىزۋگە بولادى، ءبىراق تەك اقشا-كرەديت ەمەس، فيسكالدىق ءتارتىپتى دە تۇراقتى قاتايتقان جاعدايدا ول مۇمكىن"، – دەپ اتاپ ءوتتى ۇلتتىق بانك باسشىسىنىڭ كەڭەسشىسى.
سونداي-اق حاكىمجانوۆ مەملەكەتتىك قارجىنى نىعايتۋ ءۇشىن تاريفتەردى رەفورمالاۋ جانە قوسىمشا قۇن سالىعى مولشەرلەمەسىن كوتەرۋ قاجەتتىلىگىن قولدايدى، ءبىراق بۇل ارادا باسا ءمان بەرەتىن ەڭ باستىسى - سالىقتىق اكىمشىلەندىرۋدىڭ جەكەلەگەن دەتالدارى ەكەنىن ايتادى.
"تاريفتەردى رەفورمالاۋسىز ەكونوميكا دامي المايدى. ۇلتتىق بانك بۇل رەفورمانى ءاردايىم قولداپ وتىردى. ونىڭ ينفلياسياعا قارسى مانداتقا ەشقانداي قايشىلىعى جوق. دۇرىس سالىستىرمالى باعالار مەن دۇرىس باعا قۇرۋ ادىستەرى باعانى تومەندەتۋ ماسەلەسىنەن الدەقايدا ماڭىزدى"، - دەيدى ول.
سونداي-اق ۇلتتىق بانك وكىلى مونەتارلىق ساياساتتى جۇمسارتۋ بويىنشا قولعا الىنعان وسىنداي شارالار ينفلياسيانىڭ 30-80%-عا دەيىن وسۋىنە الىپ كەلگەن تۇركياداعى جاعدايدى مىسالعا كەلتىردى. حاكىمجانوۆتىڭ پىكىرىنشە، اعىمداعى ەكونوميكالىق جاعدايلار مەن قۇرىلىمدىق شەكتەۋلەردى ەسكەرمەستەن مولشەرلەمەنى تومەندەتۋ ەلەۋلى تەرىس سالدارعا اكەلىپ سوعۋى مۇمكىن. تۇركيادا تۋرا سونداي جاعداي بولدى. ولاردا "جوعارى مولشەرلەمەلەر ينفلياسيانى تۋدىرادى جانە ءوسىمدى تەجەيدى" دەگەن ساياسي يدەيا بەلسەندى تالقىلانىپ، اقىرى ورتالىق بانككە ونى تاندى. سودان سوڭ، ناقتىسىندا، ينفلياسيا كۇرت ءوسىپ شىعا كەلدى.
"ۇزاقمەرزىمدى ءوسىمدى جەدەلدەتۋ جانە قۇرىلىمدىق ماسەلەلەردى اقشا-نەسيە ساياساتىنىڭ قۇرالدارى ارقىلى شەشۋ ارەكەتتەرى، بىلاي قاراعاندا وتە تارتىمدى سەكىلدى كورىنەدى. ءبىراق ولاي ىستەسەك، بۇل ادامدار تاعدىرىن بۇزىپ، كاپيتال مەن ۋاقىتتىڭ وراسان زور شىعىندارىنا الىپ كەلەدى"، - دەپ ەسەپتەيدى حاكىمجانوۆ.
ايتا كەتسەك، 7 ناۋرىزدا بازالىق مولشەرلەمەنى +/- 1 پايىزدىق تارماق دالىزىمەن جىلدىق دەڭگەيىن 16،5% دەپ بەلگىلەۋ تۋرالى شەشىم جاريالاندى. قارجى نارىعىنىڭ ساراپشىلارى بۇل شەشىممەن كەلىستى. قارجىگەرلەر قاۋىمداستىعىنىڭ ساۋالناماسىنا سايكەس، ساراپشىلاردىڭ ۇشتەن ءبىرى بازالىق مولشەرلەمەنىڭ ءوسۋىن بولجاعان.
