ايماق باسشىسى الدىمەن قونايەۆ قالاسىنداعى داڭق مەموريالى ەسكەرتكىشىنە گۇل قويىپ، سۇراپىل سوعىستا قازا بولعان بوزداقتاردى ءبىر مينۋت ۇنسىزدىكپەن ەسكە الدى.
بابالار رۋحىنا تاعزىم ەتكەن وبلىس اكىمى مارات ەلەۋسىز ۇلى، ورتالىق الاڭدا بارشا حالىقتى جەڭىس كۇنىمەن قۇتتىقتادى.
– بۇل سوعىستا كەڭەس وداعىنىڭ حالقى ۇلكەن باتىلدىق پەن توزىمدىلىكتىڭ ەرەكشە ۇلگىسىن كورسەتتى. كەڭەس وداعى قارۋلى كۇشتەرىنىڭ قۇرامىندا سوعىس جىلدارى بارلىعى 35 ميلليون ادام بولسا، بۇلاردىڭ 1 ميلليون 366 مىڭى قازاقستاندىقتار بولدى. وكىنىشكە وراي، ارداگەرلەرىمىزدىڭ قاتارى كۇننەن-كۇنگە سيرەپ، ازايا تۇسۋدە. بۇگىنگى كۇنى جەڭىس مەرەكەسىن وبلىس بويىنشا 10 سوعىس ارداگەرى قارسى الۋدا.
ۇلى جەڭىستىڭ ارقاسىندا بiزدiڭ اسپانىمىز اشىق بولىپ، تىنىشتىقتا بەيبiت ءومiر ءسۇرiپ، الاڭسىز ەڭبەك ەتiپ كەلەمiز. سوندىقتان ءبىزدىڭ مىندەتىمىز – ءاربىر سوعىس ارداگەرىنە قامقور بولىپ، ولاردىڭ وشپەس ەرلىگىنە قۇرمەت كورسەتۋ، – دەدى ءوز سوزىندە مارات سۇلتانعازييەۆ.
سونداي-اق، ءوڭىر باسشىسى الماتى وبلىسىندا ۇلى وتان سوعىسىنداعى جەڭىستىڭ 78 جىلدىعىن مەرەكەلەۋ قارساڭىندا جەرگىلىكتى بيۋدجەتتەن 222،7 ملن تەڭگە سوماسىنا ءبىرجولعى ماتەريالدىق كومەك كورسەتىلگەنىن تىلگە تيەك ەتتى.
اكىمنىڭ ايتۋىنشا، ۇلى وتان سوعىسىنىڭ 10 ارداگەرلەرىنە 1،5 ميلليون تەڭگە مولشەرىندە ءبىرجولعى تولەمدەر قاراستىرىلعان.
جەڭىستىڭ 78 جىلدىعىنا ارنالعان مەرەكەلىك شارا بالالار شىعارماشىلىق ورتالىعىنىڭ قويىلىمىنان باستاۋ الىپ، ونەر جۇلدىزدارىنىڭ كونسەرتىنە ۇلاستى.
