ءيا، اۋىلدان كەلىپ ەڭبەكتەنىپ، ءبىراز قاراجات جيناپ شاعىن ءۇي تۇرعىزعاندار ەسىك الدىنان شاعىن پاتەر سالىپ، ونىسىن ءوزى سياقتى اۋىلدان كەلىپ، «جاڭا ءومىر» باستاعان «تاعدىرلاستارىنا» جالعا بەرىپ، قوسىمشا تابىس تاۋىپ وتىرعانىن ءبارىمىز بىلەمىز.
پاتەرىن جالعا بەرۋشى اۋىلدان كەلگەن جاستاردى ۇيىنە ۋاقىتشا تىركەسىن، ءبىراق، بىر-ەكى ايدان كەيىن ار-جەردە ءتيىپ-قاشىپ جۇمىس ىستەپ جۇرگەن اۋىل ازاماتتارى باسقا جەرگە قونىس اۋدارسا الدىنان تاعى دا تىركەۋ ماسەلەسى شىقپاي ما؟
سوندا جاڭا زاڭ كۇشىنە ەنسە، پاتەرىن جالعا بەرۋشى مەن جالعا الۋشى ءبىرىن-بىرى جەتەكتەپ اراعا بىرنەشە اي سالىپ حالىققا قىزمەت كورسەتۋ ورتالىعىن جاعالاپ جۇرەيىن دەپ تۇر. ارينە، بۇل كىمگە بولسا قولايسىزدىق تۋعىزاتىنى انىق. ەل ازاماتتارىن بىلاي قويىپ سىرتتان كەلەتىن ەڭبەك ميگرانتتارىن تەزگە سالا الا الماي وتىرعاندا بۇلايشا جاعدايدى ۋشىقتىرۋدىڭ نە قاجەتى بار؟
قازىرگى زاماندا لاڭكەستىكتىڭ ۋشىعىپ تۇرعانىن تۇسىنەمىز. حالىقتى جاپپاي تىركەۋ، تەكسەرۋ لاڭكەستىككە قارسى ساقتىق شارالارىن قانشالىقتى كۇشەيتەتىنىن ماعان بەلگىسىز. بىلەتىنىم، جاڭا تالاپ حالىقتىڭ ەركىن ءجۇرىپ-تۇرۋىن شەكتەيتىنى انىق.
قازىرگى تاڭدا وبلىستاردى بىلاي قويعاندا اۋدان ورتالىقتارىندا قاۋىپسىزدىك قىزمەتى مەن قۇقىق قورعاۋ ورگاندارىنىڭ بولىمشەلەرى جۇمىس ىستەيدى. ولار كىمنىڭ جات اعىمنىڭ جەتەگىندە، كىمنىڭ بالا-شاعا باعۋدىڭ سوڭىندا جۇرگەنىن جاقسى بىلەدى.
ەگەر لاڭكەستىككە قارسى ساقتىق شارالارىن كۇشەيتۋدى ويلاساق، الدىمەن قاۋىپسىزدىك قىزمەتى مەن قۇقىق قورعاۋ ورگاندارىنىڭ بىرلەسىپ ارەكەت ەتۋىن جەتىلدىرگەن ءجون. ءبىر-بىرىنىڭ «پولنوموچياسىن» العا تارتىپ، داۋلاسۋعا قۇمار كۇشتىك قۇرىلىمدار توننىڭ ىشكى باۋىنداي بايلانىسىپ جۇمىس ىستەۋى كەرەك. سوندا عانا ەلگە لاڭ سالۋدى كوزدەگەن لاڭكەستەردىڭ جولىن كەسۋگە بولادى.
بۇدان باسقا تاڭ اتقاننان، كەش باتقانشا انشىلەر مەن سايقىمازاق ارتىستەردى ناسيحاتتايتىن تەلەارنالارعا دا جاۋاپكەرشىلىك جۇگىن ارقالاتاتىن كەز كەلدى. ەگەر بىزدەر لاڭكەستىكپەن كۇرەستى شىنداپ قولعا العانىمىز راس بولسا، تەلەارنالاردا تۋرا ءدىندى ناسيحاتتاپ، ارام پيعىلدى توپتاردان جيرەندىرەتىن باعدارلامالاردىڭ سانىن ارتتىرۋ كەرەك. وسىلايشا جاستاردىڭ ساناسىنا ساڭىلاۋ تابۋ كەرەك.
ال ولاردىڭ قايدا تىركەلىپ، نە ىستەپ جۇرگەنىن باقىلاۋ – قوعامداعى تۇيتكىلدى ماسەلەنى شەشپەيدى. ءبىرىنشى كەزەكتە اۋىلدان جۇمىس ىزدەپ قالاعا كەلگەن جاستاردىڭ وي-ساناسىن وزگەرتۋىمىز كەرەك. ەرتەڭگى كۇنى جۇمىس تابا الماي، نە تىركەۋگە تۇرا الماي مىنا ومىردەن باز كەشىپ جۇرگەندە سوڭدارىنان كوشى-قون پوليسياسى ءتۇسىپ قىسپاققا السا، ولار جىلى ءسوزىن ايتىپ، جىلانداي ارباعان جات اعىمداردىڭ قۇشاعىنا قالاي ەنىپ كەتكەنىن وزدەرى دە بىلمەي قالۋى مۇمكىن. سوندىقتان ءدىني ەكسترەميزمگە قارسى كۇرەستە كەڭەستىك جۇيە كەزىندە قالىپتاسقان باقىلاۋعا قۇرىلعان امال-تاسىلدەردەن باس تارتۋىمىز كەرەك.
نۇرلان جۇماحان
