ساز اسپاپتارى تيان-شان شىرشاسى، كانادادا وسىرىلگەن ەمەن جانە قايىڭ سياقتى اعاشتاردىڭ تۇرلەرىنەن جاسالعان. اعاشتاردىڭ قىلقان جاپىراقتى جانە قىزىل تۇرلەرىنەن جاسالعان اسپاپتاردىڭ ماتەريالى دومبىرا ءۇشىن كەرەمەت اكۋستيكالىق دىبىس بەرەتىنى بەلگىلى.
اسپاپتاردى ايگىلى قازاقستاندىق شەبەر جولاۋشى تۇردىعۇلوۆ جاسادى.
– ونەردىڭ ءبىزدىڭ ءارقايسىمىز ءۇشىن بەرەر اسەرى مول. ونىڭ ءبىزدىڭ سانامىزدى وزگەرتىپ، حالىقتار مەن ەلدەردى جىگەرلەندىرۋگە ءارى بىرىكتىرۋگە قابىلەتى زور. سول ءۇشىن دە، بيزنەستىڭ وكىلدەرى رەتىندەگى ءبىزدىڭ مىندەتىمىز – ونەر قايراتكەرلەرىنە قولداۋ كورسەتۋ. مەن ءوز وتباسىمنىڭ ءارى كومپانيامىزدىڭ اتىنان قازاقتىڭ حالىق مۋزىكاسىن ورىنداۋشى – قازاقستاننىڭ ەكى جەتەكشى وركەسترىنە دومبىرانى تارتۋ ەتەمىن. ءبىزدىڭ مۋزىكانتتارىمىزدىڭ شىعارماشىلىعى ەلىمىزدىڭ بەدەلىن الەمدىك دەڭگەيدە اسقاقتاتادى دەگەن سەنىمدەمىن، – دەدى Freedom Holding Corp. باس اتقارۋشى ديرەكتورى تيمۋر تۋرلوۆ.
قۇرمانعازى جانە ن.تىلەندييەۆ اتىنداعى وركەسترلەر – ەلىمىزدىڭ ۇلتتىق ماقتانىشى. مۋزىكانتتارىمىز كوپتەگەن شەت ەلدەردە گاسترولدىك ساپارلارمەن ونەر كورسەتىپ، مەملەكەت باسىنداعى ادامداردىڭ ساپارلارىن مۋزىكامەن سۇيەمەلدەيدى ءارى ءبىزدىڭ بىرەگەي مادەنيەتىمىزدى ەڭ جوعارى دەڭگەيدە تانىتادى.
ايتا كەتەرلىگى، بيىل «وتىرار سازى» اكادەميالىق فولكلورلىق-ەتنوگرافيالىق وركەسترى ءوزىنىڭ 40 جىلدىعىن تويلايدى.
ال قۇرمانعازى اتىنداعى قازاق ۇلتتىق حالىق اسپاپتار وركەسترى 2023 جىلى ءوزىنىڭ 90 جىلدىق مەرەيتويىن اتاپ وتەدى.
Dalanews.kz انىقتاماسى:
«فريدوم فينانس» اق ءوز كليەنتتەرىنە KASE جانە AIX بيرجالارىندا بروكەرلىك قىزمەت كورسەتۋدى، باعالى قاعازداردىڭ باعا بەلگىلەنىمىن قولداۋ بويىنشا جانە قارجىلىق كونسالتينگ سالاسىنداعى، بورىشتىق جانە ۇلەستىك قارجىلاندىرۋدى ۇيىمداستىرۋ بويىنشا ماركەتمەيكەر قىزمەتتەرىن ۇسىنادى.
قۇرمانعازى اتىنداعى قازاق ۇلتتىق حالىق اسپاپتار وركەسترى – كوبىنە حالىق مۋزىكاسىن ورىندايتىن مۋزىكالىق ۇجىم، ول ءۇشىن قازاقتىڭ ساز اسپاپتارىن پايدالانادى. ول 1933 جىلى الما-اتا قالاسىندا مۋزىكالىق-درامالىق تەحنيكۋم (ءقازىر پ.ي. چايكوۆسكيي اتىنداعى الماتى مۋزىكالىق كوللەدجى) جانىنان دومبىرا ءانسامبلى رەتىندە قۇرىلدى. 1944 جىلى وركەسترگە قازاقتىڭ ۇلى كۇيشى-كومپوزيتورى قۇرمانعازى ساعىربايلىنىڭ اتى بەرىلدى. 1967 جىلدان بەرى قازاقستاننىڭ ەڭبەگى سىڭىرگەن ۇجىمى، 1978 جىلدان بەرى اكادەميالىق وركەسترى. وركەستردىڭ رەپەرتۋارىندا قازاق جانە شەتەل كومپوزيتورلارىنىڭ ۇيلەسىمدى ءارى پوليفونيالىق دىبىستاردىڭ زاماناۋي تۇسىندىرمەسىنە، كوپ داۋىسقا باي تۋىندىلارى بار. ءار جىلدارى وركەستردىڭ ديريجەرلارى قازاقستاننىڭ حالىق ءارتيسى ل. حاميدي، قازاقستاننىڭ ەڭبەك سىڭىرگەن ونەر قايراتكەرلەرى ل. شارگورودسكيي، ك. مۋسين، ا. جايىموۆ، كسرو-نىڭ حالىق ءارتيسى م. تولەبايەۆ، ش. قاجىعالييەۆ جانە ت.ب. بولدى.
«وتىرار سازى» – ن. تىلەندييەۆ اتىنداعى قازاقتىڭ مەملەكەتتىك اكادەميالىق فولكلورلىق-ەتنوگرافيالىق حالىق اسپاپتار وركەسترى. ول 1980 جىلى قازاق فيلارمونياسىنىڭ جانىنان قۇرىلدى. «وتىرار سازىنىڭ» كوركەمدىك جەتەكشىسى مەن باس ديريجەرى نۇرعيسا تىلەندييەۆ الدىمەن شاعىن انسامبل قۇردى، ال 1982 جىلى وعان وركەستر مارتەبەسى بەرىلدى.
وركەستردە دومبىرا مەن قوبىزدان باسقا قازاقتىڭ جەتىگەن، شەرتەر، شاڭقوبىز، مەسقوبىز، سىرناي، سازسىرناي، سىبىزعى، اساتاياق، داۋىلپاز، تۇياقتاس، قوڭىراۋ ت.ب. ساز اسپاپتارى بار. «وتىرار سازى» رەپەرتۋارىنا فولكلورلىق تۋىندىلار دا، سونداي-اق قازاقستان كومپوزيتورلارىنىڭ اڭىز، شەجىرە، كۇي سياقتى ۇلتتىق ناقىشتاعى شىعارمالارى كىرەدى. سونداي-اق وركەستردىڭ رەپەرتۋارى كينوفيلمدەردىڭ مۋزىكاسىمەن، جەكە ورىنداۋشىلاردىڭ ورىنداۋىنداعى اسپاپتىق شىعارمالارمەن تولىقتىرىلعان. ۇجىم قازاقتىڭ مۋزىكالىق فولكلورىنىڭ تاماشا ۇلگىلەرىن ساقتاپ قانا قويماي، سونداي-اق زاماناۋي اسپاپتار مەن وركەستردىڭ تەمبرىنە سايكەس كەلەتىن تۋىندىلاردى وڭدەپ، جەتىلدىرىپ كەلەدى. «وتىرار سازى» وركەسترىنىڭ قۇرامىندا 65 ونەر شەبەرى قىزمەت ەتەدى. 1999 جىلى وركەسترگە ن. تىلەندييەۆتىڭ ەسىمى، ال 2000 جىلى اكادەميالىق اتاق بەرىلدى. وركەستردىڭ رەپەرتۋارىندا حالىقتىڭ «كەڭەس»، «سارى وزەن»، «سال كۇرەڭ» كۇيلەرى، حالىق كومپوزيتورلارىنىڭ «قوسباسار»، «سارى جايلاۋ»، تاتتىمبەتتىڭ «سىلقىلداعى»، «ەردەننىڭ كۇيى»، ىقىلاستىڭ «قامبار باتىرى»، م. تولەبايەۆتىڭ «ەسكە الۋى»، ن. تىلەندييەۆتىڭ «اتا تولعاۋ»، «قوش كەرۋەنى»، ك. كۇمىسبەكوۆتىڭ «قورقىت كۇيى»، «فارابي سازى» جانە ت.ب. بار. 2009 جىلدان بەرى وركەستردىڭ كوركەمدىك جەتەكشىسى ءارى باس ديريجەرى – دينارا تىلەندييەۆا.
