تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ جونىندەگى باس جوسپاردىڭ تۇجىرىمداماسىنا سايكەس، قالاعا قۇرىلىس نىساندارىن سالۋ جوسپارلانۋدا.

تۇركىستان قالاسىنىڭ كەلەشەكتەگى باس جوسپارىنا سايكەس، قالا قۇرىلىسى مەن ساۋلەتى ءۇش باعىتتا جۇرگىزىلەدى. «تاريحي ايماق» – 88،7 گەكتار،  «رۋحاني-مادەني ورتالىق» ايماعى – 98 گەكتار، «اكىمشىلىك-ىسكەرلىك ورتالىق» ايماعى – 700 گەكتاردى قۇرايدى. وسىعان وراي، قۇرىلىس نىساندارىنا قاجەتتى جەرلەردى قايتارۋ جۇمىستارى زاڭ نەگىزىندە جۇرگىزىلۋدە. بۇل تۋرالى تۇركىستان وبلىسى وڭىرلىك كوممۋنيكاسيالار قىزمەتىندە وتكەن بريفينگتە تۇركىستان قالاسىنىڭ اكىمى الىپبەك وسەربايەۆ ءمالىم ەتتى.

ونىڭ ايتۋىنشا، قازىرگى تاڭدا 98 گەكتار جەردى قۇرايتىن ەكىنشى ايماق اتالاتىن «رۋحاني-مادەني ورتالىقتا» قاجەتتى جەردى دايىنداۋ ماقساتىندا  مەملەكەتتىڭ مۇقتاجدىعىنا ءۇشىن 167 نىساندى (13 كاسىپكەرلىك، 154 تۇرعىن ءۇي) قايتارۋ جۇمىستارى جۇرگىزىلۋدە.

– اتالعان 167 نىسانعا اكت تولتىرىلىپ سۋرەتكە تۇسىرىلگەن. بۇگىنگى تاڭعا 161 نىساننىڭ باعالاۋ جۇمىستارى تولىق اياقتالدى. ءقازىر 6-نا باعالاۋ جۇمىستارى جۇرگىزىلۋدە. سونداي-اق، بۇل جۇمىستاردى مەملەكەتتىك ساتىپ الۋ زاڭىنا سايكەس، كونكۋرستىڭ ناتيجەسىندە نىسانداردى باعالاۋ جۇمىستارىن «ەكسپو وسەنكا» ءجشس-ى  جۇرگىزدى. باعالاۋ جۇمىستارى بىتكەن 161 نىساننىڭ بۇگىنگى تاڭدا 91 مەنشىك يەسەنىڭ كەلىسىمى الىنعان. بۇل كەلىسىم الىنعان نىسان يەلەرىنىڭ قۇجاتتارى تولىعىمەن اياقتالىپ، بۇگىندە تۇرعىن ءۇي نىساندارىن بوساتىپ، بۇزۋ جۇمىستارى باستالىپ كەتتى. يەلەرى كەلىسىم بەرگەن نىسانداردىڭ بۇگىندە 13-نە بۇزىلۋ جۇمىستارى جۇرگىزىلۋدە. ال كەلىسىمگە كەلمەگەن 40 نىساننىڭ قۇجاتى زاڭعا سايكەس سوتقا جولداندى. وتىزعا جۋىق ازاماتپەن كەلىسىم جۇمىستارى جۇرگىزىلۋدە، – دەدى الىپبەك شارىپبەك ۇلى.

سونداي-اق، «اكىمشىلىك-ىسكەرلىك ورتالىققا» تۇسەتىن 672 گەكتاردى قۇرايتىن جەر اۋماعىنىڭ بۇگىنگى تاڭعا زاڭ تالاپتارىنا سايكەس، 470 گەكتارى قايتارىلدى.

ايتا كەتەرلىگى، نىسان يەلەرى بەرىلگەن باعامەن كەلىسپەسە، ءوز تاراپتارىنان كەز كەلگەن ليسەنزيالى مەكەمەگە باعالاۋ جاساتا الادى. ناتيجەسىندە ەكى تاراپتىڭ باعالاۋ ناتيەجەلەرى سوتقا جولدانىپ، زاڭ تالاپتارىنا سايكەس شەشىلەدى. سونىمەن قاتار، كەلىسپەگەن تۇرعىندارمەن ارنايى وتىنىشتەرى بويىنشا جۇمىس جاساۋ ءۇشىن 2018 جىلعى 14-جەلتوقسانداعى №780 قالا اكىمىنىڭ وكىمىمەن 29 ادامنان قۇرالعان كوميسسيا جۇمىس جاساۋدا. ول كوميسسيانىڭ قۇرامىندا مەملەكەتتىك قىزمەتكەرلەر جانە جەرگىلىكتى ۇكىمەتتىك ەمەس ۇيىمداردىڭ ءتوراعالارى مەن مۇشەلەرى، دەپۋتاتتار بار.

زاڭعا سايكەس مەملەكەتتىڭ مۇقتاجى ءۇشىن جەر قايتارۋ جۇمىستارىنا جانە باعالاۋ جۇمىستارىنا كەلىسپەگەن تۇرعىندارمەن بىرنەشە رەت تۇسىندىرمە جۇمىستارى جۇرگىزىلگەن.