تۇركىستاننىڭ كىرپىشىنە سۇرانىس جوعارى. قالاسىنىڭ اۋماعىندا ءقازىر جىلىنا 22 ملن. دانا كىرپىش شىعارىلادى. بۇل قاجەتتى دەڭگەيدەن ەكى ەسەدەي از. قالادا قۇرىلىس قارقىنى جوعارى. جىل سايىن شامامەن 40 ملن. دانا كىرپىش قاجەت.
رەسپۋبليكاداعى قۇرىلىسشىلار تۇركىستانداعى كىرپىش وندىرىسىنە قاجەتتى شيكىزاتتىڭ ساپاسى جوعارى ەكەنىنە ايتادى. كونە قالاداعى قوجا احمەت ياساۋيدىڭ كەسەنەسىن سالاردا اقساق تەمىردىڭ ءبىراز جەردىڭ توپىراعىنان كىرپىش قۇيدىرىپ، ولاردى سىناقتان وتكىزىپتى. كىرپىشتىڭ ساپاسىن ونىڭ بەرىكتىگىنە، اۋا رايىنىڭ توسىن جاعدايلارىنا توزىمدىلىگىنە، مىسالى، سۋ مەن قارعا توزىمدىلىگىنە قاراپتى. سوندا تۇركىستاننىڭ توپىراعىنان قۇيىلعان كىرپىش جوعارى باعا الىپتى. كەسەنىنىڭ كىرپىشتەرىن تۇركىستاندا قۇيدىرىپتى. سول كەسەنە ارادا ونداعان عاسىر وتسە دە باياعى كۇيىندە تۇر.
تۇركىستانمەن كورشىلەس وبلىستار مەن اۋدان، قالالاردان كەلگەن تۇتىنۋشىلار دا تۇركىستاننىڭ كىرپىش زاۋىتتارىنا تاپسىرىس بەرەدى. كاسىپكەرلەردىڭ تۇركىستان توپىراعىنان وندىرىلگەن كىرپىشەرگە قۇمارلىعى وسىدان. كونە قالاداعى كىرپىش زاۋىتتارىنىڭ ونىمىنە تاپسىرىس جوعارى بولۋىنىڭ نەگىزگى سىرى وسىندا.
قالا باسشىلىعى «تۇركىستانداعى يندۋستريالىق ايماقتىڭ جالپى اۋماعى 40 گەكتار» دەدى. ايماققا اۆتومابيل جولى، تەمىر جول سالىنعان. ەلەكتر قۋاتى جەتكىزىلگەن. اۋىز سۋ، تەحنيكالىق سۋ، جۇيەلەرى تارتىلعان. ەگەردە ايماقتا سالىناتىن كاسىپورىندار كوبەيگەن جاعدايدا ونىڭ كولەمىن ۇلعايتۋعا دا مۇمكىندىك مول.
-تۇركىستان قالاسىنداعى يندۋستريالدىق ايماقتا وندىرىلگەن ءونىمدى سىرتقا تاسىمالداۋ دا وڭاي. تۇركىستان توعىز جولدىڭ تورابىندا تۇر. «الماتى-ماسكەۋ» تەمىر جولى، «باتىس جۇڭگو – باتىس ەۋروپا» ءاۆتودالىزى رۋحاني استانا ارقىلى وتەدى. لوگيستيكالىق مۇمكىندىگى مول بولعاندىقتان سالاتىن جاڭا كاسىپورىندى بىزدەگى يندۋستريالدى ايماقتا ورنالاستىرۋعا نيەت بىلدىرگەن ينۆەستورلار كوپ، -دەيدى قالا باسشىلىعى.
