تۇركىستان قالاسىندا ۇلتتىق دومبىرا كۇنىنە وراي «دومبىرا – داستان» اتتى مەرەكەلىك ءىس-شارا ءوتتى. تۇركىستان وبلىستىق مادەنيەت باسقارماسى باسشىسىنىڭ ورىنباسارى ەرجان يساتايەۆ قۇتتىقتاۋ ءسوز سويلەپ، دومبىرانىڭ ۇلت رۋحانياتىنداعى ماڭىزىنا توقتالدى،- دەپ حابارلايدى Dalanews.kz
– ۇلتتىق مۇرانى ۇلىقتايتىن بۇگىنگى شارانىڭ رۋحانياتتى دامىتۋعا قوسار ۇلەسى مول. دومبىرا – ۇلتتىق اسپاپ قانا ەمەس، ەلدىڭ بولمىسىن، جان-دۇنيەسىن ايشىقتايتىن ۇلى مۇرا. وسى قۇندىلىعىمىزدى قاستەرلەپ، جانىن سەرىك ەتكەن بارلىق قاتىسۋشىلارعا العىسىمدى بىلدىرەمىن، – دەدى ەرجان يبادۋللا ۇلى.
كەش بارىسىندا سۇگىر ءالي ۇلىنىڭ «ىڭعاي توك»، اباي جەلدىبايەۆتىڭ «ەركە سىلقىم»، زەينەپ الاسيانىڭ «ەرتۇعرىل»، قۇرمانعازىنىڭ «ايجانقىز»، «اداي»، «بالبىراۋىن» سياقتى ۇلتتىق كۇيلەرى ورىندالىپ، كورەرمەننىڭ زور قوشەمەتىنە بولەندى. «تۇمار»، «القوڭىر»، «تۇركىستان» انسامبلدەرى مەن مەملەكەتتىك شىعارماشىلىق تاپسىرىس اياسىندا اشىلعان ۇيىرمەلەردىڭ شاكىرتتەرى ءوز ورىنداۋشىلىق شەبەرلىگىمەن كوزگە ءتۇستى. سونداي-اق، «فاراب»، «سامعاۋ» بي انسامبلدەرىنىڭ بيلەرى ساحنانىڭ كوركىن اشا ءتۇستى. «جايساڭ دالا»، «اقجەلەڭ»، «تۇلعالارعا تۋىندى» سىندى شىعارمالار ۇلتتىق مۇرانىڭ ۇلاعاتىن سەزدىردى.
كەش سوڭىندا بارلىق ونەرپازدار مەن دومبىرا ۇيىرمەلەرىنىڭ وقۋشىلارى قالىڭ كورەرمەنمەن بىرگە «بالبىراۋىن» كۇيىن ورىندادى. ايتا كەتەيىك، تۇركىستان وبلىسىندا «ۇلتتىق دومبىرا كۇنى» مەرەكەسىنە وراي ءبىرقاتار شارا ءوتتى. اتاپ ايتقاندا، تۇركىستان قالاسىندا «تۇران دالاسىنىڭ كۇيلەرى» قالالىق كۇيىشىلەر بايقاۋى، «دوستىق» ۇيىندە «ۇكىلى دومبىرا» فەستيۆالى ۇيىمداستىرىلدى. سونداي-اق، «فاراب» كىتاپحاناسىندا ءداستۇرلى «كۇي قۇدىرەتى» رەسپۋبليكالىق كۇيشىلەر بايقاۋى ۇيىمداستىرىلىپ، رەسپۋبليكانىڭ ءار ايماعىنان كەلگەن 25 ونەرپاز ب ا ق سىنادى. اۋدان-قالالاردا 100-گە تارتا مادەني-كوپشىلىك شارالار ۇيىمداستىرىلدى.
