تۇركىستان وبلىسى، تۇلكىباس اۋدانىندا «ساستوبە» يننوۆاسيالىق كەشەنى» ءجشس-نىڭ ءىرى زاۋىتىنىڭ قۇرىلىسى باستالدى. قۇنى 180 ملرد تەڭگەنى زاۋىتتا كاۋستيكالىق سودا، پوليۆينيلحلوريد، سەمەنت، اك جانە كالسيي كاربيدى وندىرىلەدى. تۇركىستان وبلىنىڭ اكىمى زاۋىتتىڭ قۇرىلىس الاڭىندا بولىپ، ينۆەستورمەن كەزدەستى. باستاماعا ساتتىلىك تىلەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.  

– بۇگىن ءبىز ەلىمىز ءۇشىن اسا ماڭىزدى وندىرىستىك جوبالاردىڭ ءبىرى – «ساستوبە يننوۆاسيالىق كەشەنىنىڭ» ءبىرىنشى كەزەڭىنىڭ قوندىرعىلاردى ورناتۋ جۇمىستارىن باستاۋ ءساتىنىڭ كۋاسى بولىپ وتىرمىز. «ساۋتس-ويل» كومپانياسى قولعا الىپ وتىرعان بۇل كەشەن ىسكە قوسىلعاندا قازاقستانداعى ەڭ ءىرى اك ءوندىرۋشى بولادى. اتالعان ءوندىرىس ىشكى نارىقتى ساپالى ونىممەن قامتاماسىز ەتۋگە عانا ەمەس، ەكسپورتتىق الەۋەتىمىزدى دە ايتارلىقتاي ارتتىرۋعا مۇمكىندىك بەرەدى. ينۆەستورلارعا العىسىمىزدى بىلدىرەمىز. جوبا ءساتتى جۇزەگە اسىپ، تۇرعىندار جۇمىسپەن قامتىلا بەرسىن، – دەدى نۇرالحان كوشەروۆ.

تۇلكىباس اۋدانى اۋماعىنداعى «ساستوبە» يننوۆاسيالىق كەشەنى» ج ش س جوباسىنا «2021-2025 جىلدارعا ارنالعان كاسىپكەرلىكتى دامىتۋ جونىندەگى» ۇلتتىق جوباسى اياسىندا قولداۋ كورسەتىلىپ، جوبالاۋ-سمەتالىق قۇجاتتامالارى ازىرلەنگەن. رەسپۋبليكالىق بيۋدجەتتەن ينفراقۇرىلىم جۇيەلەرىنىڭ قۇرىلىسىنا قارجى ءبولىندى. 2026 جىلى ىسكە قوسىلاتىن زاۋىتتا جىلىنا  400 مىڭ توننا اك، 200 مىڭ توننا كالسيي كاربيدىن، 100 مىڭ توننا كاۋستيكالىق سودا، 120 مىڭ توننا پوليۆينيلحلوريد (پۆح) جانە 1 ملن توننا سەمەنت ءوندىرۋ جوسپارلانۋدا. 1000-عا جۋىق جۇمىس ورنى اشىلادى.

ونىمدەرىن ەلىمىزبەن قاتار شەتەلگە ەكسپورتتاۋ جوسپارلانۋدا. بۇگىندە رەسپۋبليكا اۋماعى بويىنشا بۇنداي ءوندىرىس ورنى جوق. جوبادا ەكولوگيالىق تازا، زاماناۋي وندىرىستىك تەحنولوگيالار قولدانىلادى. قازىرگى تاڭدا شەتەلدەن 100% يمپورتتالىپ وتىرعان پۆح جانە كالسيي كاربيدى ەندى ءوز ەلىمىزدە وندىرىلمەك. بۇل جوبا قۇرىلىس، حيميا، مەتاللۋرگيا سەكىلدى ونەركاسىپتىڭ كوپتەگەن سالالارىنا سەرپىن بەرەدى دەپ كۇتىلىپ وتىر.