تۇركىستان وبلىسىندا جەرگىلىكتى اكىمدىك پەن قارجى ۇيىمدارى تاراپىنان شاعىن جانە ورتا كاسىپكەرلىكتى دامىتۋعا قولداۋ كورسەتىلۋدە.
وسى مەملەكەتتىك قولداۋلار ناتيجەسىندە وڭىردە كاسىپكەرلىككە بەت بۇرعاندار سانى ارتىپ كەلەدى. سولاردىڭ ءبىرى — تۇرعانباي احمەتوۆ. تۇركىستان قالاسىنىڭ تۇرعىنى «ىرىس» ميكروقارجىنان «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى اياسىندا 6 پايىزبەن 10 ملن. تەڭگە جەڭىلدەتىلگەن نەسيەگە قول جەتكىزگەن.
وسى قارجىعا بىرنەشە قۇرىلعى ساتىپ الىپ، «داتقا» دەپ اتالاتىن جەكە كاسىپورنىن اشقان. قازىرگى تاڭدا كاسىپكەر تۇرمىستىق قاتتى قالدىقتاردى وڭدەپ، پوليەتيلەن جانە پلاستيكالىق قۇبىرعا قاجەتتى شيكىزات وندىرۋدە.
وسى كاسىبى ارقىلى ول 11 ادامدى جۇمىسپەن قامتىپ وتىر. الداعى ۋاقىتتا كاردون قاعازدارىن وڭدەۋدى قولعا الماقشى.
تۇركىستان قالاسىنىڭ تاعى ءبىر تۇرعىنى جاندار يسلامبەك «ىرىس» ميكروقارجى ۇيىمىنىڭ «جاس كاسىپكەر» باعدارلاماسى بويىنشا 2 ملن. تەڭگە نەسيە الدى. بۇگىندە جاس كاسىپكەر اۆتوكولىك ماي سۇزگىلەرىنىڭ 286 ءتۇرىن وندىرۋدە. وسى كاسىبى ارقىلى 8 ادامدى جۇمىسپەن قامتىپ، ايىنا 20 مىڭ دانا سۇزگى شىعارۋدا. بۇل سۇزگىلەر تۇركىستان وبلىسى مەن شىمكەنت قالاسىنا ساتىلىمعا شىعارىلعان. تۇتىنۋشىلارى بارشىلىق.
تۇركىستان وبلىسىندا شاعىن جانە ورتا بيزنەستى دامىتۋ باعىتىندا قۇرىلعان «ىرىس» ميكروقارجى ۇيىمى جىل باسىنان بەرى جالپى سوماسى 4 387،7 ملن.تەڭگەنى قۇرايتىن 1228 جوبانى قارجىلاندىردى.
جۇزەگە اسقان جوبالار شەڭبەرىندە 1300-دەن استام جاڭا جۇمىس ورنى اشىلدى. قارجىلاندىرىلعان جوبالاردىڭ 31،9% مال شارۋاشىلىعىن دامىتۋعا باعىتتالعان. ناقتىراق ايتساق، 371 جوباعا نەسيە بولگەن. ال، كوكتەمگى ەگىستىك جۇمىستارى بويىنشا 766 جوبا، جىلىجاي شارۋاشىلىعى بويىنشا 15 جوباعا قولداۋ كورسەتىلگەن. ءوندىرىس، قۇس شارۋاشىلىعى، قىزمەت كورسەتۋ جانە وزگە دە سالالارعا قارجىلاي قولداۋ جاسالدى.
«ىرىس» ميكروقارجى ۇيىمى شىلعان ساتتەن باستاپ 17367 جوبانى قولداپ، 16 مىڭنان استام جاڭا جۇمىس ورىنىن اشىلۋىنا ىقپال ەتتى. «جاس كاسىپكەر» باعدارلاماسى شەڭبەرىندە 18 بەن 29 جاس ارالىعىنداعى ىسكەر جاستارعا 20 ملن. تەڭگە نەسيە بەرىلگەن. سونىمەن بىرگە، «ىرىس» ميكروقارجى ۇيىمى فەرمەرلەرگە الدىن-الا تولەمسىز قارجى ليزينگىن بەرىپ، «ىرىس-وركەندەۋ» دەپ باعدارلاماسى بويىنشا كاسىپكەرلەرگە اۋىلشارۋاشىلىق تەحنيكاسىن جانە اۋىلشارۋاشىلىق تەحنيكاسىن ساتىپ الۋعا قولداۋ كورسەتۋدە.
