تۇركىستان وبلىسىندا سۋ تاپشىلىعىن جويۋ ماقساتىندا سۋ ۇنەمدەۋ تەحنولوگياسىن ەنگىزۋ جۇمىستارى كەڭىنەن قولدانىلىپ كەلەدى. ەلىمىزدە العاش رەت سۋ ۇنەمدەۋ تەحنولوگياسىمەن كۇرىش ەگىلدى. سونىڭ بىرەگەيى وتىرار اۋدانى، قارعالى اۋىلىندا جۇزەگە اسىرىلىپ، تامشىلاتىپ سۋارۋ ءادىسى ارقىلى كۇرىش جانە ماقتا شارۋاشىلىعى قولعا الىنعان، دەپ حابارلايدى Dalanews.kz
بۇگىن وبلىس اكىمى نۇرالحان كوشەروۆ وتىرار اۋدانىنا ارنايى جۇمىس ساپارىمەن بارىپ، «تايماس-2024» ءجشس-نىڭ ماقتا جانە كۇرىش القابىنىڭ جۇمىسىمەن تانىستى. ينۆەستورلارمەن جانە القاپ يەسىمەن كەزدەسىپ، ەگىستىك جۇمىستارىن جانداندىرۋدى تاپسىردى. تىڭ جوبالاردى قولداۋعا ءاردايىم دايىن ەكەنىن جەتكىزدى.
«تايماس-2024» ءجشس-نىڭ ديرەكتورى تولەگەن سەرىكبايەۆ وبلىس اكىمدىگىنىڭ ۇيلەستىرۋىمەن شەتەلگە ءىسساپارعا شىعىپ، ينۆەستورلارمەن كەلىسكەنىن جەتكىزدى. وسى ارقىلى جاڭا جوباسىن جۇزەگە اسىرۋدا.
ەگىن القابىنا سۋ ۇنەمدەۋ تەحنولوگياسىن ەنگىزۋ ارقىلى كۇرىش، ماقتا، پىستە داقىلدارى جەرسىندىرىلەدى. جوبا قۇنى – 2 ملرد. تەڭگە. اتالعان جۇمىستار ينۆەستور تاراپىنان قارجىلاندىرىلادى. كەشەن اۋماعى 5 مىڭ گەكتاردى قۇرايدى. ونىڭ ىشىندە 2300 گەكتار جەرگە ماقتا، 500 گەكتارعا كۇرىش، قالعان 200 گەكتار جەرگە پىستە داقىلدارى ەگىلگەن. القاپ جۇمىستارىنا 45 اۋىل شارۋاشىلىعى تەحنيكاسى جۇمىلدىرىلعان. جوبا قۋاتتىلىعىنا كەلسەك، ءار گەكتاردان 50 سەنتنەر كۇرىش الۋ كوزدەلگەن. مۇندا 25 ماۋسىمدىق جۇمىس ورنى اشىلعان. جاڭا ءادىس ارقىلى سۋ بىرنەشە ەسە ۇنەمدەلگەن.
ەل پرەزيدەنتى قاسىم-جومارت توقايەۆ سۋ ۇنەمدەۋ تەحنولوگيالارىن ەنگىزۋ جانە اۋىل شارۋاشىلىعى سالاسىندا جالپى ءونىمىنىڭ كولەمىن ۇلعايتۋ باعىتىندا ءبىرقاتار تاپسىرمالار بەرگەن-دى. بۇل باعىتتا تۇركىستان وبلىسىندا ماقساتتى جوبالار قولعا الىنىپ، بۇگىندە ساپالى جۇمىستار اتقارىلۋدا. بيىل وڭىردە اۋىل شارۋاشىلىعى القاپتارىنا سۋ ۇنەمدەۋ تەحنولوگيالارىن 27 مىڭ گەكتارعا ەنگىزۋ جوسپارلانىپ، قازىرگى ۋاقىتتا 59 مىڭ گەكتار جەرگە ەندىرىلگەن. 2028 جىلعا دەيىن جىل سايىن 27 مىڭ گەكتارعا ەنگىزۋ جوسپارلانسا، وبلىستا مۇمكىندىگىنە قاراي سۋ ۇنەمدەۋ تەحنولوگيالارىن جىل سايىن 50 مىڭ گەكتارعا ەندىرۋ كوزدەلۋدە. بۇل ءادىس اۋىلشارۋاشىلىعى ونىمدەرىنىڭ كولەمىن ارتتىرۋعا مۇمكىندىك بەرەدى.
