بۇگىن تۇركىستان قالاسىندا وزبەك كينوسىنىڭ كۇندەرى ءىس-شاراسى اياسىندا بىرنەشە فيلم كورەرمەن نازارىنا ۇسىنىلدى. جيىندا تۇركىستان وبلىسى اكىمىنىڭ ورىنباسارى مالىك وتاربايەۆ قۇتتىقتاۋ ءسوز سويلەپ، وسىنداي ءىس-شارالار ارقىلى باۋىرلاس ەلدەردىڭ رۋحاني-مادەني بايلانىستارى نىعايا تۇسەتىنىن جەتكىزدى.

وزبەكستان رەسپۋبليكاسىنىڭ قازاقستان رەسپۋبليكاسىنداعى باس كونسۋلدىعىنىڭ باس كونسۋلى ابرار فاتحۋللايەۆ پەن قازاقستان وزبەكتەرى «دۋستليك» قاۋىمداستىعىنىڭ ءتوراعاسى يكرام حاشيمجانوۆ تا تۇركىستاننىڭ تۇرلەنىپ كەلە جاتقانىنا قۋانىشتى ەكەندەرىن جەتكىزدى.

2018 جىل قازاقستاندا وزبەكستان جىلى دەپ اتالىپ وتكەنى بەلگىلى. وسى باستامالار اياسىندا باۋىرلاس حالىقتاردىڭ جاقىنداستىعىن تەرەڭدەتۋگە سەپتىگىن تيگىزەتىن ءتۇرلى ءىس-شارالار ۇيىمداستىرىلعان بولاتىن. سونىڭ جالعاسى رەتىندە تۇركىستاندا ۇيىمداستىرىلعان مادەني باسقوسۋعا كورەرمەندەر قىزىعۋشىلىعى جوعارى بولدى.

وزبەكستاندىق رەجيسسەرلەر كورسەتىلىم بارىسىندا شىڭعىس ايتماتوۆتىڭ قيسساسى اياسىندا تۇسىرىلگەن «سارۆكومات ديلباريم» كوركەم ءفيلمىن جۇرتشىلىق نازارىنا ۇسىندى. سونداي-اق، قازاقتىڭ ۇلى اقىنى اباي قۇنانبايەۆتىڭ بالالىق شاعى، قورشاعان ورتاسى، شىعارماشىلىعى جونىندە مۇراعات قۇجاتتارىن قولدانىپ تۇسىرىلگەن «سلوۆو ابايا» دەرەكتى ءفيلمى دە تۇركىستاندىقتارعا كورسەتىلدى. بۇل تۋىندىنىڭ رەجيسسەرى — شۋحرات ماحمۋدوۆ. «O’zbekfilm» كينوستۋدياسى تۇسىرگەن «ويكيز» ەرتەگىسى دە كورەرمەندەردىڭ وڭ باعاسىن الدى.



تۇركىستان وبلىسى اكىمىنىڭ باسپا ءسوز قىزمەتى