تۇركىستان وبلىسىنان 10 جۇك كولىگىنە تيەلىپ جىبەرىلگەن 200 توننا گۋمانيتارلىق كومەك باتىس قازاقستان وبلىسىنا جەتكىزىلدى. سونىمەن بىرگە وڭىردەن اتتانعان 50 ەرىكتى دە سول ايماقتا گۋمانيتارلىق كومەكتى ۇيلەستىرۋ، تاسقىن سۋدىڭ الدىن الۋ جۇمىستارىن اتقارىپ جاتىر، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

قازاقستان حالقى اسسامبلەياسىنىڭ «جۇرەكتەن جۇرەككە» اكسياسى اياسىندا تۇركىستان وبلىسى قحا جانىنداعى تۇركىستان وبلىستىق وزبەك جانە تۇرىك ەتنومادەني بىرلەستىكتەرى بىرلەسە وتىرىپ، 5 جۇك كولىگىنە تيەلگەن گۋمانيتارلىق كومەكتى سۋ باسقان ايماقتارعا جونەلتكەن بولاتىن.

جالپى، بۇگىنگى كۇنگە دەيىن تۇركىستان وبلىسى قحا جانىنداعى قۇرىلىمدار مەن ەتنومادەني بىرلەستىكتەردىڭ ۇيىمداستىرۋىمەن سۋ باسقان وڭىرلەرگە جالپى 88 ميلليون تەڭگەدەن استام قارجىنىڭ گۋمانيتارلىق كومەك جىبەرىلدى.

سونىمەن بىرگە سول كۇنى سارىاعاش، وتىرار، كەلەس، سايرام، ساۋران اۋدانى مەن كەنتاۋ قالاسى تۇرعىندارى اتىنان قاجەتتى زاتتار تيەلگەن جۇك كولىكتەرى دە جولعا شىعىپ، باتىس قازاقستان وبلىسىنا جەتكىزىلدى. تۇركىستان قالاسىنان دا بىرنەشە جۇك كولىگى قوستاناي، اتىراۋ، سولتۇستىك قازاقستان وبلىستارىنا جىبەرىلدى. جالپى كومەك كولەمى شامامەن 700 توننادان استى. ءالى دە گۋمانتارلىق كومەك جيناۋ جالعاسىپ جاتىر.

تۇركىستان وبلىسى اكىمدىگىنىڭ ۇيلەستىرۋىمەن 100-دەن استام اۋرى تەحنيكا بقو-عا جىبەرىلدى. جەرگىلىكتى اتقارۋشى ورگاندار تاراپىنان بۇل جۇمىستار توقتامايدى.

بۇگىندە سۋ باسقان وڭىرلەرگە جۇمىس كۇشى دە قاجەت. وسى ماقساتتا وبلىستان 150-دەن استام كاسىبي قۇتقارۋشى سقو جانە بقو-دا سۋ تاسقىنىنىڭ الدىن الۋ جۇمىستارىن جۇرگىزۋدە. وبلىستىق جاستار رەسۋرستىق ورتالىعى جاساقتاعان 50 ەرىكتى بقو-دا سۋدى بوگەۋ، توسقاۋىل قويۋ جۇمىستارىنا كۇندىز-تۇنى كومەكتەسىپ جاتىر.

بۇدان بولەك، تۇركىستان وبلىسىنان ارنايى بقو، قوستاناي، اتىراۋ وبلىستارىنا بارىپ، كومەكتەسىپ جاتقان ازاماتتار دا بار. وسى ارقىلى ەلىمىزدە ازاماتتىق قوعام، ەرىكتىلەر قوزعالىسى، تۇتاس ەلدىڭ وتانشىلدىق سەزىمىنىڭ جوعارى دەڭگەيگە كوتەرىلگەنى اڭعارىلدى. ۇيىمداستىرۋ، ۇيىمداسۋ جۇمىستارى جاقسارعان. بۇل – ەل بىرلىگىنىڭ جەمىسى!

تۇركىستان وبلىسىندا گۋمانيتارلىق كومەك جيناۋ، سۋ باسقان ايماقتارعا قولداۋ كورسەتۋ جۇمىستارى جالعاسادى.