تۇركىستان وبلىسىنىڭ ونەركاسىپتىك الەۋەتىن دامىتۋ ماقساتىندا بىرنەشە ءىرى جوبالاردى ىسكە اسىرۋ جوسپارلانۋدا. ونىڭ ءبىرى – «ساستوبە» حيميالىق كەشەنىنىڭ قۇرىلىسى. بۇل جوبانىڭ بىرەگەيلىگى – قازاقستاندا بۇگىنگى كۇنى ۇقساس زاۋىت جوق.
اتالعان جوبانى ىسكە اسىرۋ قازاقستانداعى حيميا سالاسىن دامىتۋعا زور سەرپىن بەرەدى. زاۋىتتا حيميا ونىمدەرى، كاۋستيكالىق سودا، پۆح، كالسيي كاربيدى، سەمەنت ءوندىرۋ ءىسى قولعا الىنادى. جوبا قۇنى – 136،6 ملرد تەڭگە. 2023 جىلى اشىلاتىن ءوندىرىس ورنىندا 1 000 ادام تۇراقتى جۇمىسپەن قامتىلادى.
بۇگىنگى تاڭدا، كەشەن قۇرىلىسىنا جەر ۋچاسكەسى ءبولىندى. كەشەنگە قاجەتتى ينفراقۇرىلىمدى تارتۋعا جوبالاۋ-سمەتالىق قۇجاتتاما ازىرلەندى. ينفراقۇرىلىم قۇرىلىسىن «بيزنەستىڭ جول كارتاسى – 2025» باعدارلاماسى شەڭبەرىندە كەزەڭ-كەزەڭىمەن قارجىلاندىرۋ ماسەلەسى شەشىلدى.
تۇركىستان وبلىسىندا جاڭا مۇناي وڭدەۋ زاۋىتىنىڭ قۇرىلىسى جۇرۋدە. 5 كلاستى موتور وتىنىن جانە مۇناي-حيميا ونىمدەرىن ءوندىرۋ ءۇشىن قۋاتى جىلىنا 2 ملن توننا كومىرسۋتەك شيكىزاتىن وڭدەۋ بويىنشا مۇناي-حيميا كومبيناتىنىڭ قۇنى 130 ملرد تەڭگە. قۇرىلىسى كەلەر جىلى اياقتالاتىن جاڭا زاۋىتتا 650 جۇمىس ورنى اشىلادى. قازىرگى تاڭدا قۇرىلىس-مونتاجداۋ جۇمىستارى جۇرگىزىلۋدە.
كومىر-حيميالىق زاۋىتى سىناق رەجيمىندە ىسكە قوسىلدى. 5 سىنىپتى موتور وتىنىن جانە مۇناي – حيميا ونىمدەرىن ءوندىرۋ ءۇشىن قۋاتى جىلىنا 100 مىڭ توننا كومىرسۋتەكتى شيكىزاتتى قايتا وڭدەۋ جونىندەگى كومىر – حيميا كومبيناتىنىڭ قۇنى 3،1 ملرد تەڭگە. 100-دەن استام جاڭا جۇمىس ورنى اشىلدى.
فوسفور كەندەرىن وڭدەۋ زاۋىتىنىڭ قۇرىلىس-مونتاجداۋ جۇمىستارى وتكىزۋ 2022 جىلعا جوسپارلانىپ وتىر. قۇنى 129،9 ملرد.تەڭگەنى قۇرايدى. زاۋىتتا 1 مىڭنان استام جۇمىس ورنى اشىلادى.
