تۇركىستان وبلىسىندا قۋاتى 1000 مۆت-قا جەتەتىن بۋ-گاز قوندىرعىسىنىڭ قۇرىلىسى ءجۇرىپ جاتىر. وبلىس اكىمى دارحان ساتىبالدى «سامۇرىق-قازىنا» اق ديرەكتورلار كەڭەسىنىڭ مۇشەسى قايرات ماقسۇتوۆپەن كەزدەسىپ، وسى ماڭىزدىڭ جۇزەگە اسىرىلۋ بارىسىن تالقىلادى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

ءوڭىر باسشىسى  بۇل جوباعا اكىمدىك تاراپىنان تولىق قولداۋ كورسەتىلەتىنىن جەتكىزدى.«سامۇرىق-قازىنا» اق-مەن بىرگە باسقا دا جوبالاردى تالقىلاۋعا دايىن ەكەنىن جەتكىزدى.

– ەنەرگەتيكالىق قاۋىپسىزدىك – ماڭىزدى ماسەلە. وبلىسىمىزدا قۇرىلىس باستالعان بۋ-گاز قوندىرعىسىنا ۇلكەن ءۇمىت ارتىلىپ وتىر. جوبانىڭ ۋاقتىلى ءارى ساپالى جۇزەگە اسۋىنا مۇددەلىمىز جانە تولىق قولداۋ كورسەتەمىز، – دەدى دارحان ساتىبالدى.

«سامۇرىق-قازىنا» اق ديرەكتورلار كەڭەسىنىڭ مۇشەسى بۋ-گاز ەلەكتر ستانسياسى قۇرىلىسىنىڭ قازىرگى جاي-كۇيىن باياندادى. بۇگىندە جەر جۇمىستارى اياقتالىپ كەلەدى. – قۇرىلىس بارىسىن باقىلاپ، كورىپ كەلدىم. جۇمىس قارقىندى جۇرۋدە.

ءقازىر 300 ادام بولسا، 2025 جىلى قۇرىلىسقا 2 مىڭنان اسا جۇمىسشى تارتىلادى دەپ جوسپارلانىپ وتىر. بۇل جوبا ارقىلى وڭتۇستىك ايماقتاعى ەنەرگيا تاپشىلىعى شەشىمىن تاۋىپ قانا قويماي، ءوڭىردى يندۋستريالاندىرۋعا تىڭ سەرپىن بەرىلەدى. ەلىمىزدە بالاماسى جوق ماڭىزدى جوبا. بىرلەسە جۇمىس اتقارىپ، بۋ-گاز قوندىرعىسىن جوسپارعا ساي تاپسىرامىز دەگەن ويدامىن، – دەدى قايرات ماقسۇتوۆ.

ايتا كەتەيىك، مەملەكەت باسشىسىنىڭ 01.09.2021 جىلعى قازاقستان حالقىنا جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنا سايكەس تۇركىستان وبلىسىندا قۋاتى 1000 مۆت-قا دەيىن بۋ-گاز قوندىرعىسىن سالۋ كوزدەلگەن. جوبا قۇنى بولجاممەن 722،7  ملرد. تەڭگە. اتالعان جوبانى ىسكە اسىرۋ شەڭبەرىندە سايرام اۋدانىنان 60 گا جەر اۋماعى بەلگىلەندى. 2025 جىلى باستاپقى 185 مۆت ەلەكتر قۋاتى، ال 2026 جىلدىڭ سوڭىندا تولىق  1000 مۆت ەلەكتر قۋاتى وندىرىلەدى دەپ كوزدەلگەن. جاڭا جوبانىڭ قۇرىلىسى 2024 جىلى باستالىپ، 2026 جىلى اياقتالادى دەپ جوسپارلانعان. قۇرىلىس جۇمىستارى جۇرگىزۋ بارىسىندا 2 مىڭنان استام ۋاقىتشا، جوبا تولىق ىسكە قوسىلعاندا 200-دەن استام ادام تۇراقتى جۇمىسپەن قامتىلادى.