وسى جىلدىڭ كۇز ايىندا تولىق قۋاتتىلىعىمەن ىسكە قوسىلاتىن ءوندىرىس ورنىنىڭ قۇرىلىس جۇمىسىنا قانىققان ايماق باسشىسى مەملەكەت تاراپىنان كورسەتىلەتىن بارلىق قولداۋلاردىڭ ءتيىستى دەڭگەيدە اتقارىلۋىن تاپسىردى. بۇدان بولەك، ج.تۇيمەبايەۆ جاڭادان سالىنىپ جاتقان كاسىپورىندارعا جاڭا سيفرلىق تەحنولوگيامەن اۆتوماتتاندىرىلعان باسقارۋ جۇيەلەرىن كەڭىنەن ەنگىزۋ قازىرگى زاماننىڭ قاجەتتىلىگى ەكەنىن ايتىپ ءوتتى.
ينۆەستيسيالىق قۇنى 20 ملن. اقش دوللارىن قۇرايتىن زاۋىت جىلىنا 50 مىڭ توننا ءونىم وندىرمەك. بۇل جوبا قازاقستاننىڭ جاساندى تالشىقتارعا دەگەن قاجەتتىلىگىن تولىعىمەن قاناعاتتاندىرادى دەپ كۇتىلۋدە. اتالعان جوبا ەلىمىزدە العاش رەت قولعا الىنىپ وتىر. ءوڭىردىڭ الەۋمەتتىك-ەكونوميكالىق دامۋىنا سەرپىلىس بەرەتىن زاۋىت ىسكە قوسىلعان كەزدە 200-250 ادام جۇمىسپەن قامتىلادى دەپ جوسپارلانىپ وتىر.
جاساندى تالشىق – بۇل ونەركاسىپتىڭ بارلىق سالالارىندا قولدانىلاتىن امبەباپ ماتەريال. پەت-تى قايتا وڭدەۋ قازاقستانداعى ەكولوگيالىق جاعدايدى جاقسارتۋعا اسەر ەتەدى.
ەسكە سالايىق، بۇل جوبا «Ontustik Invest-2016» حالىقارالىق ينۆەستيسيالىق فورۋمى اياسىندا قول قويىلعان ىنتىماقتاستىق تۋرالى مەموراندۋمنىڭ ناتيجەسىندە جۇزەگە اسىپ وتىر.
جوبانى الەمگە تانىمال شەتەلدىك HONGKONG TIANRUN CO LTD ءىرى ءوندىرىس كومپانياسى وبلىس اكىمدىگىمەن جانە Green Technology Industries كومپانياسىمەن بىرلەسە وتىرىپ سالۋدا. بۇگىندە بۇل كومپانيا 70 مەملەكەتتە ءوندىرىس ورىندارىن اشىپ ۇلگەرگەن.
ايتا كەتەيىك، اتالعان يندۋستريالدى ايماقتا 1 583 جۇمىس ورنى اشىلىپ، سومماسى 65 716،9 ملن. تەڭگەنى قۇرايتىن 12 جوبا ىسكە اسىرىلۋدا. سونىڭ ىشىندە 107 جۇمىس ورنىمەن قامتىلعان، قارجىسى 7 788،9 ملن. تەڭگەنى قۇرايتىن 3 جوبا ىسكە قوسىلعان.
تۇركىستان وبلىسى اكىمىنىڭ باسپا ءسوز قىزمەتى
