تۇركىستان وبلىسى قوعامدىق دامۋ باسقارماسى «جاستار رەسۋرستىق ورتالىعى» كمم-نىڭ ۇيىمداستىرۋىمەن «جۇمىسشى ماماندىقتار جىلى» اياسىندا وتكەن وبلىستىق «جاس ەڭبەك ادامى – 2025» بايقاۋى ءوز مارەسىنە جەتتى. سايىستىڭ سوڭعى كەزەڭى بايدىبەك اۋدانىندا ءوتتى،- دەپ حابارلايدى Dalanews.kz
جاستار اراسىندا جۇمىسشى ماماندىقتاردىڭ بەدەلىن ارتتىرىپ، كاسىبي داعدىلارىن دامىتۋ ماقساتىندا ۇيىمداستىرىلعان بايقاۋعا 80-گە جۋىق ستۋدەنت پەن جاس كاسىپكەر قاتىستى. سايىس بارىسىندا قاتىسۋشىلار ءوز ماماندىقتارىنا سايكەس شەبەرلىكتەرىن كورسەتىپ، ءتۇرلى تاپسىرمالاردى ورىندادى. جۇمىس ساپاسى ورىنداۋ تەحنيكاسى، كرەاتيۆتىلىك جانە قاۋىپسىزدىك تالاپتارىن ساقتاۋ كريتەرييلەرى بويىنشا باعالاندى.
وبلىستىق بايقاۋدىڭ جابىلۋ سالتاناتىنا تۇركىستان وبلىستىق «جاستار رەسۋرستىق ورتالىعى» كمم-نىڭ باسشىسى ەرنار بەكتايەۆ قاتىسىپ، ۇزدىكتەردى ماراپاتتادى.
بايقاۋ قورىتىندىسىمەن «ۇزدىك اسپاز» جانە «ۇزدىك دانەكەرلەۋشى» نوميناسيالارىن قازىعۇرت اۋدانىنان كەلگەن مەرۋەرت داۋلەتجان جانە اقجول ميراسبەك يەلەنسە، بايدىبەكتىك ازيزا ابدىلدابەك قىزى «قولونەر شەبەرى»، نۇرعيسا دوڭبايەۆ «اعاش ۇستاسى»، نۇرلىاي جاقسىلىق «بەت ارلەۋشى» نوميناسيالارى بويىنشا ۇزدىك اتاندى. «ۇزدىك سىلاقشى» نوميناسياسىن كەلەس اۋدانىنان كەلگەن ازامات لەسباي جەڭىپ السا، «ۇزدىك تاس قالاۋشى» قازىعۇرتتىق بەكارىس ورازالى، «ۇزدىك شاشتاراز» وتىرارلىق بەيبىت اسانوۆا، «ۇزدىك سانتەحنيك» سوزاق اۋدانىنىڭ تۋماسى بەكارىس ءومىرتاي، «ۇزدىك شينومونتاج شەبەرى» سارىاعاشتىق نۇرباقىت قوبلانبەك اتاندى.
جەڭىمپازدارعا العىس حاتتار مەن باعالى سىيلىقتار تابىستالدى.
