تۇركىستان وبلىسىنىڭ اكىمى دارحان ساتىبالدىنىڭ تاپسىرماسىنا سايكەس، وبلىستا ەلدى مەكەندەردى كوگالداندىرۋ، بالىق شارۋاشىلىعىن دامىتۋ باعىتىندا سەمينارلار وتكىزىلۋدە، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
وسىعان وراي 16 ناۋرىز كۇنى تۇلكىباس اۋدانى، ماشات اۋىل وكرۋگىندە «وبلىستا بالىق شارۋاشىلىعىن دامىتۋدىڭ ماسەلەلەرى جانە ەلدى مەكەندەرىن كوگالدانداندىرۋ شاراسىنىڭ ىسكە اسىرىلۋ بارىسى بويىنشا» سەمينار-كەڭەس وتكىزىلمەك.
ءىس-شارا اياسىندا ەلدى مەكەندەردى كوگالداندىرۋ ماقساتىندا ەگىلەتىن كوشەتتەردى ەگەتىن جەردى تاڭداۋ، ەگۋ، كۇتىپ باپتاۋ شارالارى قاتىسۋشىلارعا پراكتيكالىق تۇرعىدا كورسەتىلەتىن بولادى.
بيىل كوكتەم ايلارىندا بوساتىلىپ، ەگىلەتىن كوشەتتەردىڭ، اۋدان، قالا اكىمدىكتەرىمەن تالاپقا ساي ەگىلۋى مەن كۇتىپ باپتالۋىنا قاداعالاۋدى كۇشەيتۋ ماقساتىندا تابيعات قورعاۋ پروكۋراتۋراسى قىزمەتكەرىنىڭ قاتىسۋىمەن جۇمىسشى توپ قۇرىلىپ، ارالاۋ كەستەسى بەكىتىلدى.
بۇعان دەيىن قازىعۇرت اۋدانىندا اۋدان، قالا اكىمدىكتەرىنىڭ، باسقارما ماماندارى مەن عالىمداردىڭ، ورمان شارۋاشىلىعى قىزمەتكەرلەرىنىڭ قاتىسۋىمەن «ەلدى مەكەندەردى كوگالداندىرۋعا ارنالعان» سەمينار-كەڭەس وتكىزىلگەن بولاتىن.
سەمينار-كەڭەستە كوشەتتەردى قازۋ، تاسىمالداۋ، ەگۋ جانە كۇتىپ باپتاۋ ماسەلەلەرى تەوريالىق تۇرعىدا تالقىلانىپ، جان-جاقتى تۇسىندىرىلگەن.
ايتا كەتەيىك، اتالعان شارا وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى تاراپىنان ۇيىمداستىرىلىپ وتىر.
