بيىل تۇركىستان وبلىسىنداعى اۆتوموبيل جولدارىن جاقسارتۋعا بيۋدجەتتەن 37،6 ملرد تەڭگە قارجى ءبولىنىپ، قۇرىلىس-جوندەۋ جۇمىستارىمەن جالپى ۇزىندىعى 1100،3 شاقىرىمدى قۇرايتىن جولدار مەن كوشەلەر نەمەسە 244 نىساندى قامتۋ جوسپارلانىپ وتىر، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
جىل قورىتىندىسىمەن 546،6 شاقىرىم بولاتىن 149 نىسان پايدالانۋعا بەرىلەدى دەپ جوسپارلانعان. تۇركىستان وبلىسىنىڭ اكىمى دارحان ساتىبالدىنىڭ توراعالىعىمەن وتكەن اپتالىق اپپارات جيىنىندا وبلىس بويىنشا 2024 جىلعا جوسپارلانعان اۆتوموبيل جولدارى سالاسىن دامىتۋدىڭ ورىندالۋ بارىسى تۋرالى باياندالدى. وبلىس باسشىسى ساپانى نازاردا ۇستاماعان، جۇمىس بارىسىندا ورىن العان كەمشىلىكتەردى قالپىنا كەلتىرمەگەن اۋدان، قالا باسشىلارى مەن جاۋاپتى تۇلعالاردى سىنعا الىپ، ءتيىستى تاپسىرمالار بەردى.
– جول جوندەۋ جۇمىستارى ۋاقتىلى ءارى تالاپقا ساي جۇرگىزىلۋى ءتيىس. اۋدان، قالا اكىمدەرى مەن «قازاۆتوجول» جانە جاۋاپتى باسقارما ءوزارا تىعىز بايلانىستا جۇمىس ىستەڭىزدەر. مەردىگەرلەردىڭ جۇمىسىن، اسفالت ساپاسىن باقىلاۋدا ۇستاڭىزدار. بىرلەسە اتقاراتىن ءىس كوپ. جول جوندەۋگە قاجەتتى بيۋدجەتتى دۇرىس ۇيلەستىرمەگەن، جۇمىستى كەشىكتىرگەن باسشىلار مەن جاۋاپتى ورىنباسارلارعا تاعى دا ەسكەرتەمىن. جاعدايدى وزگەرتەمىز، ەگەر جاعداي وزگەرىپ، ماسەلە شەشىلمەسە، سوعان جاۋاپتى ادامداردى وزگەرتۋگە تۋرا كەلەدى، – دەدى دارحان ساتىبالدى.
وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسى قۋاتجان جۇماتايەۆتىڭ مالىمدەۋىنشە، 368،1 شاقىرىمدى قۇرايتىن 34 وبلىستىق ماڭىزى بار جولدار قۇرىلىس-جوندەۋ جۇمىستارىمەن قامتىلادى. جىل سوڭىنا دەيىن 19 نىسان نەمەسە 163،6 شاقىرىم جول، 4 كوپىر، 4 قۇبىر پايدالانۋعا بەرىلمەك. بۇگىنگى تاڭدا 3 نىسان: 10،6 شاقىرىم جول، 1 كوپىر، 1 جارىقتاندىرۋ پايدالانۋعا بەرىلدى.
اۋداندىق ماڭىزى بار جولداردى رەتكە كەلتىرۋ جۇمىستارى جوسپارعا ساي جۇرگىزىلۋدە. وسى جىلى 19 نىسان نەمەسە 97،3 شاقىرىم جول كۇردەلى جانە ورتاشا جوندەۋ جۇمىستارىمەن قامتۋعا قارجى قارالعان. ونىڭ 31 شاقىرىمدىق 8 نىسانى جانە 4 كوپىرى جىل سوڭىنا دەيىن اياقتالادى.
ەلدى مەكەن كوشەلەرىنىڭ ساپاسى دا نازاردان تىس قالمايدى. بيىل ەلدى مەكەندەردە 191 جوبانى جۇزەگە اسىرۋ جوسپارلانعان. 630،6 شاقىرىم جولعا جوندەۋ جۇمىستارى جوسپارلانىپ، جىل سوڭىنا دەيىن 331،3 شاقىرىمدىق 122 نىسان پايدالانۋعا تاپسىرىلادى. 2024 جىلدىڭ قورىتىندىسىمەن جالپى 194،6 شاقىرىم جولدى پايدالانۋعا تاپسىرىپ، جاقسى جانە قاناعاتتى جاعدايداعى ۇلەسىن 93،7%-عا جەتكىزۋ كوزدەلۋدە.
نىساندارداعى جۇمىستار مەن قولدانىلىپ جاتقان ماتەريالداردىڭ ساپاسى اۆتور، تەحنيكالىق قاداعالاۋشى مەكەمەلەردەن بولەك، ۇلتتىق ساپا ورتالىعىنىڭ تۇركىستان وبلىسى بويىنشا فيليالىنىڭ تۇراقتى باقىلاۋىندا. تەكسەرۋ جۇمىستارىنىڭ ناتيجەسىندە 343 كەمشىلىك انىقتالدى. جاۋاپتى مەكەمەلەرگە ەسكەرتۋ حاتتار بەرىلىپ، 5،7 ملن تەڭگە ايىپپۇل سالىندى. سونداي-اق 55 000 م2 جول نەگىزى مەن اسفالت جابىندىسى بۇزىلىپ، قايتا سالىندى.
ايتا كەتەيىك، تۇركىستان وبلىسى بويىنشا اۆتوموبيل جولدارىنىڭ جالپى ۇزىندىعى 17 702 شاقىرىمدى قۇرايدى. ونىڭ ىشىندە، رەسپۋبليكالىق ماڭىزى بار جولدار – 723،1 شاقىرىم (نورماتيۆتىك جاعدايى – 95%)، وبلىستىق جانە اۋداندىق ماڭىزى بار جولدار – 5717 شاقىرىم (نورماتيۆتىك جاعدايى – 93%)، ەلدى مەكەندەردىڭ كوشەلەرى – 11 268،2 شاقىرىم (نورماتيۆتىك جاعدايى – 70%). ەلدى مەكەندەردەگى جوندەۋدى قاجەت ەتەتىن كوشەردىڭ جالپى ۇزىندىعى 3380،5 شاقىرىمدى قۇرايدى.
