Biyl Túrkistan oblysyndaǵy avtomobil joldaryn jaqsartýǵa biýdjetten 37,6 mlrd teńge qarjy bólinip, qurylys-jóndeý jumystarymen jalpy uzyndyǵy 1100,3 shaqyrymdy quraityn joldar men kósheler nemese 244 nysandy qamtý josparlanyp otyr, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jyl qorytyndysymen 546,6 shaqyrym bolatyn 149 nysan paidalanýǵa beriledi dep josparlanǵan. Túrkistan oblysynyń ákimi Darhan Satybaldynyń tóraǵalyǵymen ótken aptalyq apparat jiynynda oblys boiynsha 2024 jylǵa josparlanǵan avtomobil joldary salasyn damytýdyń oryndalý barysy týraly baiandaldy. Oblys basshysy sapany nazarda ustamaǵan, jumys barysynda oryn alǵan kemshilikterdi qalpyna keltirmegen aýdan, qala basshylary men jaýapty tulǵalardy synǵa alyp, tiisti tapsyrmalar berdi.
– Jol jóndeý jumystary ýaqtyly ári talapqa sai júrgizilýi tiis. Aýdan, qala ákimderi men «Qazavtojol» jáne jaýapty basqarma ózara tyǵyz bailanysta jumys isteńizder. Merdigerlerdiń jumysyn, asfalt sapasyn baqylaýda ustańyzdar. Birlese atqaratyn is kóp. Jol jóndeýge qajetti biýdjetti durys úilestirmegen, jumysty keshiktirgen basshylar men jaýapty orynbasarlarǵa taǵy da eskertemin. Jaǵdaidy ózgertemiz, eger jaǵdai ózgerip, másele sheshilmese, soǵan jaýapty adamdardy ózgertýge týra keledi, – dedi Darhan Satybaldy.
Oblystyq jolaýshylar kóligi jáne avtomobil joldary basqarmasy basshysy Qýatjan Jumataevtyń málimdeýinshe, 368,1 shaqyrymdy quraityn 34 oblystyq mańyzy bar joldar qurylys-jóndeý jumystarymen qamtylady. Jyl sońyna deiin 19 nysan nemese 163,6 shaqyrym jol, 4 kópir, 4 qubyr paidalanýǵa berilmek. Búgingi tańda 3 nysan: 10,6 shaqyrym jol, 1 kópir, 1 jaryqtandyrý paidalanýǵa berildi.
Eldi meken kósheleriniń sapasy da nazardan tys qalmaidy. Biyl eldi mekenderde 191 jobany júzege asyrý josparlanǵan. 630,6 shaqyrym jolǵa jóndeý jumystary josparlanyp, jyl sońyna deiin 331,3 shaqyrymdyq 122 nysan paidalanýǵa tapsyrylady. 2024 jyldyń qorytyndysymen jalpy 194,6 shaqyrym joldy paidalanýǵa tapsyryp, jaqsy jáne qanaǵatty jaǵdaidaǵy úlesin 93,7%-ǵa jetkizý kózdelýde.
Nysandardaǵy jumystar men qoldanylyp jatqan materialdardyń sapasy avtor, tehnikalyq qadaǵalaýshy mekemelerden bólek, Ulttyq sapa ortalyǵynyń Túrkistan oblysy boiynsha filialynyń turaqty baqylaýynda. Tekserý jumystarynyń nátijesinde 343 kemshilik anyqtaldy. Jaýapty mekemelerge eskertý hattar berilip, 5,7 mln teńge aiyppul salyndy. Sondai-aq 55 000 m2 jol negizi men asfalt jabyndysy buzylyp, qaita salyndy.
Aita keteiik, Túrkistan oblysy boiynsha avtomobil joldarynyń jalpy uzyndyǵy 17 702 shaqyrymdy quraidy. Onyń ishinde, respýblikalyq mańyzy bar joldar – 723,1 shaqyrym (normativtik jaǵdaiy – 95%), oblystyq jáne aýdandyq mańyzy bar joldar – 5717 shaqyrym (normativtik jaǵdaiy – 93%), eldi mekenderdiń kósheleri – 11 268,2 shaqyrym (normativtik jaǵdaiy – 70%). Eldi mekenderdegi jóndeýdi qajet etetin kósherdiń jalpy uzyndyǵy 3380,5 shaqyrymdy quraidy.
