ەلىمىزدە سۋ تاسقىنىنان زارداپ شەككەن ايماقتارعا تۇركىستان وڭىرىنەن گۋمانيتارلىق كومەك جىبەرۋگە وبلىس جۇرتشىلىعى بەلسەنە اتسالىسىپ جاتىر، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

ماسەلەن، تۇركىستان قالاسىنداعى 1ء-شى مولتەك اۋدان تۇرعىندارى اتسالىسقان گۋمانيتارلىق قولداۋ جولعا شىقتى. ىشىندە گەنەراتوردان باستاپ، اۋىز سۋ، دارى-دارمەك پەن جىلى كيىمنەن باسقا 25 تونناداي ازىق-تۇلىك تيەلگەن. بۇل يگى ءىستى ۇيىمداستىرۋعا حالىق قالاۋلىسى تاجىبەك مۇسايەۆ باستاعان ازاماتتار ۇلەس قوستى.

قازاقستان حالقى اسسامبلەياسىنىڭ «جۇرەكتەن جۇرەككە» اكسياسى اياسىندا تۇركىستان وبلىسى قحا جانىنداعى ەتنومادەني بىرلەستىكتەر، اسسامبلەيا مۇشەلەرى سۋ تاسقىنىنان زارداپ شەككەن وڭىرلەردىڭ تۇرعىندارىنا بەلسەنە كومەك كورسەتۋدە.

«ءبىزدىڭ كۇشىمىز – بىرلىكتە» دەگەن ۇستانىمدى تىرەك ەتكەن «اسسامبلەيا جاستارى» رقب تۇركىستان وبلىستىق وكىلدىگىنىڭ مۇشەلەرى سولتۇستىك قازاقستان وبلىسى، پەتروپاۆل قالاسىنا 1 جۇك كولىگىنە تيەلگەن 10 توننا كەزەكتى گۋمانيتارلىق كومەك كەرۋەنىن جونەلتتى. جۇك كولىكتەرىنە نەگىزىنەن ازىق-تۇلىك، كورپە-توسەك، سۋ سورعىش ناسوس، قايىق، سۋ كوستيۋمى جانە قۇرىلىس ماتەريالدارى ارتىلعان. بۇل ورايدا، وڭىردەگى اسسامبلەيا جاستارى سۋ تاسقىنىنان زارداپ شەككەندەرگە جالپى 6 ملن تەڭگەگە كومەك جىبەردى.

ال تۇركىستان وبلىسى قحا جانىنداعى ازەربايجان ەتنومادەني بىرلەستىگى سۋ تاسقىنىنان زارداپ شەككەندەرگە 2،5 ملن تەڭگەگە ازىق-تۇلىك جىبەردى. جالپى بۇگىنگى كۇنگە دەيىن تۇركىستان وبلىسى قحا جانىنداعى قۇرىلىمدار مەن ەتنومادەني بىرلەستىكتەر تاراپىنان سۋ باسقان وڭىرلەرگە گۋمانيتارلىق كومەك جولدانىپ كەلەدى.