قاۋعا ساقال قويىپ، قارا جامىلعى جاپقاندار داۋىنا نۇكتە قويۋعا پرەزيدەنتتىڭ ءوزى تاپسىرما بەرگەننەن كەيىن ءدىن ىستەرى جانە ازاماتتىق قوعام مينيسترلىگى مۇفتياتپەن بىرگە ىسكە كىرىسىپ كەتكەن ەدى. كوپ كۇتتىرمەي ازىرلەگەن زاڭ جوباسىندا ءبىرقاتار تىيىمدار قاراستىرىلعان. ەڭ باستىسى، ەندى قوعامدىق ورىندا بەت اۋزىن تۇمشالاپ، قارا جامىلىپ جۇرەتىندەر زاڭمەن قۋدالانىپ، 200 مىڭ تەڭگەدەن اسا ايىپپۇل تولەيدى. الايدا، مينيستر مۇنى حيدجابپەن شاتاستىرۋعا بولمايدى دەيدى.
“حيدجاب مۇلدەم تالقىلانبايدى. ويتكەنى، حيدجاب بەتىن جاپپايتىن كيىم. حيدجابقا قارسى ەشكىم ەشتەڭە دەمەيدى. حيدجابتى پارانجامەن شاتاستىرۋعا بولمايدى”، – دەيدى ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ.
مينيستر، پرەزيدەنت ايتقان قاۋعا ساقال مەن قىسقا بالاققا قاتىستى ءتىس جارمادى، جوبانى مۇفتياتپەن، دىنتانۋشىلارمەن بىرىگىپ تالقىلاۋ ۇستىندەمىز دەپ قۇتىلدى. ال، زاڭ جوباسىندا بالاسىنا ەكپە سالدىرۋدان باس تارتقان اتا-انالارعا دا جازا قاراستىرىلعان. مۇنداي نورما ەنگىزۋگە بىلتىرعى جىلدىڭ وزىندە ەلىمىزدە 10 مىڭعا جۋىق وتباسىنىڭ ءدىني ۇستانىمدارىن العا تارتىپ، ۆاكسينا الۋعا قارسى شىعۋى سەبەپ بولىپتى. ەندى ەكپەدەن باس تارتقاندار 20 مىڭ تەڭگە كولەمىندە ايىپپۇل تولەيدى. ءدىنتانۋشىلار مۇنداي تىيىمدار قازىرگى قوعامدا قاتتى قاجەت، زاڭدى قاتايتۋعا ءماجبۇرمىز دەپ وتىر.
“سوڭعى كەزدە وسى ءوزىڭنىڭ بولمىسىڭىدى ەكىنشى ورىنعا ىسىرىپ قويىپ، تەك قانا شاريعاتتىڭ ولشەمدەرىمەن ءدىني اتريبۋتتاردى تاڭىپ جاتقاندار بار. ءبىز سوعان قارسىمىز. ءدىندى ۇستايسىڭ با، ءوز ەركىڭ. ەشقاشان اللانىڭ جولىندا ءجۇرمىن دەپ مىندەتسىنبە”، – دەيدى ءدىنتانۋشى دوساي كەنجەتاي.
مەكتەپكە قىزداردىڭ حيدجاب كيىپ كەلۋىنە تىيىم سالىنعاندا ءبىراز تاقۋا اتا-انا نارازىلىق بىلدىرگەن ەدى. ال، بەتىن تۇمشالاپ جۇرگەندەردى زاڭمەن شەكتەۋدى قاراپايىم حالىق قولدايتىن سياقتى.
قازاق بۇرىننان مۇسىلمان حالىق. ولار اق جاۋلىق، جەڭسىز كويلەك كيگەن، حيدجاب داستۇرىنە ساي ەمەس.
– اتا بابامىزدان كەلە جاتقان زاماندا ەشقاشان قازاقتىڭ قىزى بەتىن تۇمشالاماعان. قولدايمىن وتە دۇرىس. بالالار دا بىردەي مەكتەپ فورماسىندا عانا بولۋى كەرەك.
– نەگىزى سالت داستۇرگە باعىنۋ كەرەك قوي. ءبىز اراب ەمەسپىز، مۇسىلمانبىز. لايىقتى بولۋ كەرەك قوي.
دەگەنمەن، بار ماسەلە كيىمگە سالىنعان شەكتەۋمەن شەشىلە سالمايتىنى دا انىق. ادامنىڭ سەنىمى جۇرەگىندە دەگەندى پرەزيدەنتتىڭ ءوزى دە ايتقان بولاتىن. ال قارا جامىلعى كيىپ، بەتتەرىن تۇمشالاپ جۇرەتىندەرگە تىيىم سالاتىن زاڭ جوباسى قىركۇيەكتە پارلامەنت پەن قوعامنىڭ تالقىسىنا تۇسپەك.
دەرەككوزى: stan.kz
