تەرگەۋ دەرەگىنە سايكەس كۇدىكتى ۇستالعاننان كەيىن دونالد ترامپ اكىمشىلىگى وكىلدەرىنە وق اتۋدى جوسپارلاعانىن جەتكىزگەن. الايدا ونىڭ ناقتى پرەزيدەنتتىڭ ءوزىن نىساناعا العانى راستالماعان.

وقيعانى جاساعان ادام - كاليفورنيا شتاتىنىڭ تۇرعىنى، 31 جاستاعى كوۋل اللەن. ول توررانس قالاسىندا ءمۇعالىم بولىپ جۇمىس ىستەگەن. اشىق دەرەككە قاراعاندا، كوۋل اللەن 2017 جىلى كاليفورنيا تەحنولوگيالىق ينستيتۋتىن ماشينا جاساۋ ماماندىعى بويىنشا ءتامامداپ، كەيىن كومپيۋتەرلىك عىلىمدار باعىتىندا ماگيستر دارەجەسىن العان.

سونداي-اق، ول 2024 جىلى كامالا ءحارريستىڭ پرەزيدەنتتىك ناۋقانىنا 25 دوللار كولەمىندە قارجى اۋدارعانى بەلگىلى بولدى.

قۇقىق قورعاۋ ورگاندارى بۇل ىسكە باسقا ادامداردىڭ قاتىسى جوق دەگەن پىكىردە. الدىن الا بولجام بويىنشا كۇدىكتى Washington Hilton ءقوناقۇيىنىڭ قوناعى بولعان. كورشىلەرىنىڭ ايتۋىنشا، ونىڭ پسيحيكالىق جاعدايىندا ماسەلەلەر بولۋى مۇمكىن.

كۇدىكتى سەنبى كۇنى كەشكە ۆاشينگتونداعى Washington Hilton قوناقۇيىندە وتكەن اق ءۇي تىلشىلەرىنىڭ كەشىنە كىرەبەرىستە ۇستالدى. ءىس-شاراعا دونالد ترامپ، ءبىرىنشى حانىم مەلانيا ترامپ جانە ۆيسە-پرەزيدەنت دجەي دي ۆەنس قاتىسقان.

دونالد ترامپتىڭ ايتۋىنشا، وقيعا كەزىندە قاۋىپسىزدىك قىزمەتىنىڭ ءبىر قىزمەتكەرى جارالانعان.