اق ۇيگە قايتىپ ورالعان دونالد ترامپ سوڭعى كۇندەرى رەسەي باسشىسى ۆلاديمير پۋتينمەن كەزدەسۋگە قاتىستى ءتۇرلى پىكىر ءبىلدىرىپ، ۋكرايناداعى احۋالدى رەتتەۋدىڭ جولدارىن ۇسىنۋدا، دەپ جازادى Dalanews.kz.
تالقىدان ۆلاديمير پۋتين دە تىس قالماي، امىريكا پرەزيدەنتىنىڭ پىكىرىن تۇزدىقتاي ءتۇستى. كرەمل تاراتقان رەسمي مالىمدەمەدە رەسەي پرەزيدەنتى اقش اكىمشىلىگىمەن ەشقاشان بايلانىستان باس تارتپاعانىن اتاپ وتكەن.
پۋتين ترامپپەن اراداعى قارىم-قاتىناسى كاسىبي، پراگماتيكالىق ءارى ءوزارا سەنىمگە نەگىزدەلگەنىن ايتادى.
"مەن ونىمەن ءىشىنارا كەلىسەمىن. ەگەر ترامپ 2020 جىلى جەڭىسىن "ۇرلاتىپ" الماعاندا 2022 جىلى ۋكراينادا باستالعان داعدارىس بولماۋى دا مۇمكىن ەدى. دەگەنمەن ترامپ ءوزىنىڭ ءبىرىنشى پرەزيدەنتتىك مەرزىمىندە رەسەيگە قارسى ەداۋىر قاتاڭ شەكتەۋلەر مەن سانكسيالار ەنگىزگەنىن قاپەردەن شىعارماۋىمىز كەرەك. بۇل شەشىم تەك رەسەيدىڭ عانا ەمەس، اقش-تىڭ مۇددەسىنە دە قايشى كەلدى دەپ ويلايمىن"، - دەدى كرەمل باسشىسى.
ءسوزىن قورىتىندىلاي كەلە، ۆلاديمير پۋتين ەكى پرەزيدەنتكە قازىرگى حالىقارالىق جاعدايدى ەسكەرە وتىرىپ، كەزدەسۋ وتكىزگەن دۇرىس ەكەنىن ايتتى. ونىڭ پىكىرىنشە، اقش پەن رەسەي اراسىنداعى قارىم-قاتىناستىڭ تۇراقتانۋىنا اسىرەسە، مۇناي باعاسىن رەتتەۋ سياقتى ماسەلەلەر ماڭىزدى ىقپال ەتەدى.
سول كۇنى سولتۇستىك كارولينادا جۋرناليستەر الدىنا شىققان دونالد ترامپ كەزەكتى وپەك-تى مۇناي باعاسىن تومەندەتۋگە شاقىردى. BBCء-دىڭ حابارلاۋىنشا، اقش پرەزيدەنتى مۇناي نارىعىنداعى جوعارى باعا ۋكرايناداعى قاقتىعىستىڭ تەزدەتىپ اياقتالۋىنا كەدەرگى جاساپ وتىر دەپ سانايدى.
"ءبىز وپەك-كە مۇناي باعاسىن ارزانداتۋ قاجەت ەكەنىن كەزەكتى رەت ەسكەرتەمىز. سوندا ۋكرايناداعى تراگەديانى توقتاتۋعا جول اشىلادى. بۇل سوعىس – ەكى تاراپتى دا ابدەن قالجىراتتى. ءبىر ميلليوننان استام ەر-ازامات قازا تاپتى، اپتا سايىن مىڭداعان ادام شەيىت بولىپ جاتىر... مۇناي باعاسى شارىقتاپ تۇرعان شاقتا بۇل سوعىس وڭايشىلىقپەن اياقتالمايدى"، – دەدى ترامپ.
بۇعان دەيىن سايتىمىزدا "مۇناي باعاسىن ءتۇسىرۋ، پۋتينمەن كەزدەسۋ، قىتايدى قولقالاۋ: ترامپ داۆوس فورۋمىندا نە ايتتى" دەگەن ماقالا جاريالانعان بولاتىن.
