شىمكەنتتە Boeing قاتىسۋىمەن ورتالىق ازياداعى ەڭ ءىرى MRO SCAT اۆياسيالىق-تەحنيكالىق ورتالىعىنىڭ ىرگەتاسىنا كاپسۋلا سالىندى، دەپ حابارلايدى Dalanews.kz.

شىمكەنت قالاسىندا MRO SCAT اۆياسيالىق-تەحنيكالىق ورتالىعى قۇرىلىسى باستالۋىنا وراي كاپسۋلا سالۋ ءراسىمى ءوتتى. كەشەن ورتالىق ازياداعى اۋە كەمەلەرىنە تەحنيكالىق قىزمەت كورسەتۋ جانە جوندەۋ بويىنشا ەڭ ءىرى ورتالىققا اينالماق ءارى قازاقستاننىڭ اۆياسيا سالاسىنداعى نەگىزگى ينفراقۇرىلىم جوبالارىنىڭ ءبىرى سانالادى.

جوبا مەملەكەت باسشىسىنىڭ اقش-قا جۇمىس ساپارىنىڭ قورىتىندىسى بويىنشا حالىقارالىق دەڭگەيدە تالقىلاندى. Boeing كورپوراسياسىنىڭ باسشىلىعىمەن وتكەن كەزدەسۋدە شىمكەنتتە اۋە كەمەلەرىنە تەحنيكالىق قىزمەت كورسەتۋ جانە جوندەۋ ورتالىعىن قۇرۋ ماسەلەسى قاراستىرىلعان بولاتىن.

سالتاناتتى شاراعا شىمكەنت قالاسىنىڭ اكىمى عابيت سىزدىقبەكوۆ، ق ر كولىك ۆيسە-مينيسترى تالعات لاستايەۆ جانە Boeing كومپانياسىنىڭ كوممەرسيالىق ساتۋ جانە ماركەتينگ جونىندەگى ۆيسە-پرەزيدەنتى پول ريگي قاتىستى.

جوبا SCAT اۋە كومپانياسى بازاسىندا جۇزەگە اسىرىلادى. ورتالىق Boeing 737 (Classic/NG/MAX)، Boeing 757/767، سونداي-اق، بولاشاقتا Boeing 777 سىندى كەڭ فيۋزەلياجدى ۇشاقتارعا تولىق سيكلدى قىزمەت كورسەتۋگە باعىتتالادى.

10 گەكتار اۋماقتا جالپى اۋدانى 45 مىڭ شارشى مەتردەن اساتىن زاماناۋي ينجەنەرلىك-تەحنيكالىق كەشەن سالىنادى. ونىڭ ىشىندە 6 گەكتاردان اسا اۋماقتى قامتيتىن اۋە كەمەلەرىنە ارنالعان الاڭ قاراستىرىلعان.

جوبا اياسىندا كەمىندە 15 جوعارى تەحنولوگيالىق نىسان بوي كوتەرەدى. ولاردىڭ قاتارىندا:

• اۋە كەمەلەرىنە قىزمەت كورسەتەتىن كوپفۋنكسيونالدى ورتالىق؛

• اۆياسيالىق قوزعالتقىشتار، قوسالقى كۇشتىك قوندىرعىلار (ۆسۋ) جانە شاسسي تىرەكتەرىن جوندەۋ سەحتارى؛

• ينتەرەردى جاڭعىرتۋ جانە بەيىمدەۋ ورتالىعى؛

• اۋە كەمەلەرىن بوياۋ سەحى؛

• ەلەكترون جۇيەلەردى سىناۋ جانە جوندەۋ زەرتحاناسى؛

• قوسالقى بولشەكتەر مەن اۆياسيالىق كومپونەنتتەر قويمالارى؛

• تولىق وندىرىستىك سيكلدى قامتاماسىز ەتەتىن ينجەنەرلىك ينفراقۇرىلىم.

MRO ورتالىعىن قۇرۋ قازاقستاننىڭ وندىرىستىك جانە تەحنولوگيالىق الەۋەتىن نىعايتىپ، شەتەلدىك اۋە كومپانيالاردىڭ ۇشاقتارىنا قىزمەت كورسەتۋگە مۇمكىندىك بەرەدى. سونداي-اق، جوعارى بىلىكتى جۇمىس ورىندارىن اشۋعا جول اشادى.

SCAT اۋە كومپانياسى جوبانى ىسكە اسىرۋدا ق ر كولىك مينيسترلىگى مەن شىمكەنت قالاسى اكىمدىگىنىڭ قولداۋىن ەرەكشە اتاپ ءوتتى. سونىمەن قاتار، Boeing كورپوراسياسىنىڭ تەحنيكالىق قۇزىرەتتەردى دامىتۋعا جانە سالالىق ارىپتەستىكتى نىعايتۋعا قوسقان ۇلەسى ايتىلدى.

"كاپسۋلا سالۋ - قازاقستان اۆياسيا سالاسىنىڭ تەحنولوگيالىق تاۋەلسىزدىگىن قامتاماسىز ەتەتىن ستراتەگيالىق جوبانىڭ باستاۋى. جاڭا ورتالىق MRO نارىعىن ساپالى، جاڭا دەڭگەيگە شىعارىپ، Boeing ۇشاقتارىنىڭ ءتۇرلى تيپىنە قىزمەت كورسەتۋ مۇمكىندىگىن كەڭەيتەدى"، - دەدى SCAT اۋە كومپانياسىنىڭ پرەزيدەنتى ۆلاديمير دەنيسوۆ.