Shymkentte Boeing qatysýymen Ortalyq Aziiadaǵy eń iri MRO SCAT aviatsiialyq-tehnikalyq ortalyǵynyń irgetasyna kapsýla salyndy, dep habarlaidy Dalanews.kz.
Shymkent qalasynda MRO SCAT aviatsiialyq-tehnikalyq ortalyǵy qurylysy bastalýyna orai kapsýla salý rásimi ótti. Keshen Ortalyq Aziiadaǵy áýe kemelerine tehnikalyq qyzmet kórsetý jáne jóndeý boiynsha eń iri ortalyqqa ainalmaq ári Qazaqstannyń aviatsiia salasyndaǵy negizgi infraqurylym jobalarynyń biri sanalady.
Joba Memleket basshysynyń AQSh-qa jumys saparynyń qorytyndysy boiynsha halyqaralyq deńgeide talqylandy. Boeing korporatsiiasynyń basshylyǵymen ótken kezdesýde Shymkentte áýe kemelerine tehnikalyq qyzmet kórsetý jáne jóndeý ortalyǵyn qurý máselesi qarastyrylǵan bolatyn.
Saltanatty sharaǵa Shymkent qalasynyń ákimi Ǵabit Syzdyqbekov, QR kólik vitse-ministri Talǵat Lastaev jáne Boeing kompaniiasynyń kommertsiialyq satý jáne marketing jónindegi vitse-prezidenti Pol Rigi qatysty.
Joba SCAT áýe kompaniiasy bazasynda júzege asyrylady. Ortalyq Boeing 737 (Classic/NG/MAX), Boeing 757/767, sondai-aq, bolashaqta Boeing 777 syndy keń fiýzeliajdy ushaqtarǵa tolyq tsikldi qyzmet kórsetýge baǵyttalady.
10 gektar aýmaqta jalpy aýdany 45 myń sharshy metrden asatyn zamanaýi injenerlik-tehnikalyq keshen salynady. Onyń ishinde 6 gektardan asa aýmaqty qamtityn áýe kemelerine arnalǵan alań qarastyrylǵan.
Joba aiasynda keminde 15 joǵary tehnologiialyq nysan boi kóteredi. Olardyń qatarynda:
-
áýe kemelerine qyzmet kórsetetin kópfýnktsionaldy ortalyq;
-
aviatsiialyq qozǵaltqyshtar, qosalqy kúshtik qondyrǵylar (VSÝ) jáne shassi tirekterin jóndeý tsehtary;
-
intererdi jańǵyrtý jáne beiimdeý ortalyǵy;
-
áýe kemelerin boiaý tsehy;
-
elektron júielerdi synaý jáne jóndeý zerthanasy;
-
qosalqy bólshekter men aviatsiialyq komponentter qoimalary;
-
tolyq óndiristik tsikldi qamtamasyz etetin injenerlik infraqurylym.
MRO ortalyǵyn qurý Qazaqstannyń óndiristik jáne tehnologiialyq áleýetin nyǵaityp, sheteldik áýe kompaniialardyń ushaqtaryna qyzmet kórsetýge múmkindik beredi. Sondai-aq, joǵary bilikti jumys oryndaryn ashýǵa jol ashady.
SCAT áýe kompaniiasy jobany iske asyrýda QR Kólik ministrligi men Shymkent qalasy ákimdiginiń qoldaýyn erekshe atap ótti. Sonymen qatar, Boeing korporatsiiasynyń tehnikalyq quzyretterdi damytýǵa jáne salalyq áriptestikti nyǵaitýǵa qosqan úlesi aityldy.
"Kapsýla salý - Qazaqstan aviatsiia salasynyń tehnologiialyq táýelsizdigin qamtamasyz etetin strategiialyq jobanyń bastaýy. Jańa ortalyq MRO naryǵyn sapaly, jańa deńgeige shyǵaryp, Boeing ushaqtarynyń túrli tipine qyzmet kórsetý múmkindigin keńeitedi", - dedi SCAT áýe kompaniiasynyń prezidenti Vladimir Denisov.
