بۇگىندە ىرگەدەگى سوعىس، وعان كورشىمىزدىڭ ەكونوميكالىق سانكسيالارعا ۇشىراۋى وڭىردەگى جاعدايدى ۋشىقتىرىپ، الەۋمەتتىك-ەكونوميكالىق احۋالدى شيرىقتىرا ءتۇستى. وسىنداي قيىن كەزەڭدە بيلىكتىڭ الەۋمەتتىك سالانى قولداۋ مەن دامىتۋعا قاتىستى مىندەتتەمەلەردى تولىقتاي ورىنداۋى اسا ماڭىزدى.

پرەزيدەنت توقايەۆ ۇكىمەتكە الەۋمەتتىك سالا بويىنشا موينىنا العان مىندەتتەردى تولىقتاي ورىنداۋىن ۇدايى قاداعالاۋمەن بولدى. ءوز كەزەگىندە اتقارۋشى بيلىك جاۋاپكەرشىلىگىنە العان مىندەتتەمەلەردى تولىقتاي جۇزەگە اسىرىپ، حالىقتىڭ الەۋمەتتىك جاعدايىن جاقسارتۋعا بار كۇش-جىگەرىن جۇمىساعانىن دا ايتۋعا ءتيىسپىز.

بۇگىن ۇكىمەتتىڭ الەۋمەتتىك سالا بويىنشا 11 اي بويى اتقارعان جۇمىستارىنىڭ ەسەبى جاريالاندى. قولعا تيگەن ەسەپكە كوز سالعانىمىزدا حالىقتىڭ جۇمىسپەن قامتىۋ، كاسىپكەرلىكتى دامىتۋ بويىنشا كوپتەگەن جۇمىستار اتقارىلعانىنا بايقادىق. ەندى سونى تارقاتىپ ايتساق.

11 ايدىڭ قورىتىندىسى بويىنشا وڭىرلىك جۇمىسپەن قامتۋ كارتالارى اياسىندا 908،5 مىڭ ادام جۇمىسقا ورنالاسىپتى، ونىڭ ىشىندە 257،1 مىڭ ادام ۇلتتىق جوبالاردى ىسكە اسىرۋ كەزىندە ەكى قولعا ءبىر كۇرەك تاپسا، 294،3 مىڭ ازامات بوس جۇمىس ورىندارىنا جۇمىسقا تۇرىپتى. ال مەملەكەت باسشىسىنىڭ «10 مىڭ تۇرعىنعا 100 جۇمىس ورنى» باستاماسى اياسىندا 11 ايدا 357،1 مىڭ ادام جۇمىسپەن قامتىلىپتى.

بۇگىندە حالىقتى جۇمىسپەن قامتۋدىڭ بالامالى جولدارى دا پايدا بولۋدا. سونىڭ ءبىرى مەملەكەت سۋبسيديالايتىن جۇمىس ورىندارى – بۇل باعىت بويىنشا بيىل 196،3 مىڭ ادام جۇمىسقا تۇرعان. تاعىدا ايتا تۇسسەك، حالىقتىڭ الەۋمەتتىك وسال توپتارىنان شىققان ازاماتتارعا بيزنەس اشۋ ءۇشىن 400 اەك (شامامەن 1،3 ملن تەڭگە) مولشەرىندە 9،1 مىڭ مەملەكەتتىك گرانت بەرىلگەن. وسىلايشا مەملەكەتتىڭ گرانتىنا يە بولعان ازاماتتار ءىس باستاپ، كاسىپەرلىك سالاعا بەت بۇرعان.

ايتپاقشى، بيىل ناۋرىز ايىنان باستاپ، 21-35 جاس ارالىعىنداعى كاسىپكەرلىكپەن اينالىسىپ جۇرگەن جاستارعا 2،5% جەڭىلدىكپەن نەسيە بەرۋ باعدارلاماسى ىسكە قوسىلىپ، جاستار بيزنەسىن دامىتۋعا قولداۋ كورسەتىلگەن بولاتىن. ناتيجەسىندە ەلىمىز بويىنشا جالپى سوماسى 25،4 ملرد تەڭگە جەڭىلدەتىلگەن نەسيە بەرىلىپ، 5،4 مىڭ بيزنەس-جوبا ماقۇلدانعانىن اتاپ ايتۋعا بولادى.

بيىل مەملەكەت باسشىسى قاسىم-جومارت توقايەۆتىڭ تىكەلەي باستاماسىمەن «ۇلتتىق قور – بالالارعا» باستاماسى اياسىندا ونى ورىنداۋ تەتىگى ازىرلەنىپ، قاجەتتى زاڭنامالىق تۇزەتۋلەر قابىلداندى. ءساتىن سالسا جوبا 2024 جىلعى 1 قاڭتاردان باستاۋ الادى.

بۇدان باسقا 2023 جىلعى 1 قاڭتاردان باستاپ قازاقستاندا 600 مىڭعا جۋىق ازاماتتىق قىزمەتشىنىڭ جەكەلەگەن ساناتتارىنىڭ جالاقىسىن جىل سايىن ورتا ەسەپپەن 20%-عا كەزەڭ-كەزەڭمەن كوتەرۋ ءۇردىسى جالعاسىن تاپتى. سونداي-اق، 1 قاڭتاردان باستاپ رەسپۋبليكالىق بيۋدجەتتەن تولەنەتىن بارلىق جاردەماقىنىڭ مولشەرى 8،5%-عا كوبەيسە، ەلىمىزدە ىنتىماقتى زەينەتاقى 10،5%-عا وسكەنىن دە ايتا كەتۋىمىز كەرەك.

ال وتباسىنىڭ سيفرلىق كارتاسى اياسىندا تابىسى كەدەيلىك شەگىنەن تومەن وتباسىلارعا پرواكتيۆتى تۇردە الەۋمەتتىك قولداۋ تاعايىنداۋ ەنگىزىلدى. 1 جەلتوقسانداعى جاعداي بويىنشا اتاۋلى الەۋمەتتىك كومەك 113،6 مىڭ وتباسىنان 595،7 مىڭ ادامعا تاعايىندالدى.