"زارداپ شەككەن بارلىق وتباسىعا جەكە جاردەماقى تاعايىندالادى. مەن سىزدەرگە ۋادە بەرەمىن. پرەزيدەنت جانىنان ارنايى قور قۇرىلادى. زارداپ شەككەندەرگە جەكە كومەك كورسەتەمىن"، – دەدى توقايەۆ.
پرەزيدەنت بارلىق ماسەلە جاقىن ارادا شەشىلەتىنىن ايتتى.
"اتقارۋشىلاردىڭ بارلىعى وسىندا. سىزدەردىڭ بارلىق قاجەتتىلىگىڭىز بويىنشا ءتىزىم جاسالادى. بۇگىن – جەكسەنبى، كەلەسى اپتادا بارلىق ماسەلە شەشىلەدى. وتىنىشتەرىڭىزدىڭ ءبارى ورىندالادى"، - دەدى ول.
مەملەكەت باسشىسى ارتىنشا اباي وبلىسىندا شۇعىل ارەكەت ەتۋ شتابىنىڭ وتىرىسىن وتكىزدى.
"ەلىمىزدە تاعى دا الاپات ءورت بولىپ جاتىر. وكىنىشكە قاراي، ءتىلسىز جاۋمەن كۇرەس كەزىندە ازاماتتارىمىز قايتىس بولدى.
14 ادام قىزمەتتىك مىندەتىن اتقارىپ ءجۇرىپ ەرلىكپەن قازا تاپتى. مەن جاڭا عانا بۇل ادامداردىڭ تۋىسقاندارىمەن كەزدەستىم. وتە اۋىر اڭگىمە بولدى. جۇرت جىلاپ وتىر. ۇكىمەتكە نارازىلىعىن ايتىپ جاتىر.
مارقۇمداردىڭ وتباسىلارىنا جانە جاقىندارىنا قايعىرا كوڭىل ايتامىن"، - دەدى ول.
پرەزيدەنتتىڭ اتاپ وتكەنىندەي توتەنشە جاعداي سالاسىنشا كەمشىلىك كوپ. توقايەۆ وسىنداي اپاتتارعا جول بەرمەۋ قاجەتتىگىن، سونىمەن قاتار توتەنشە جاعداي بولعان كەزدە ءتيىستى شارالار جوعارى دەڭگەيدە ۇيىمداستىرىلۋى كەرەكتىگىن تىلگە تيەك ەتتى.
"ءبىزدىڭ جاعدايىمىزدا كاسىبي سالعىرتتىق، ادامداردىڭ تاعدىرىنا مۇلدە نەمقۇرايلى قاراۋ بايقالدى. ءقازىر بۇعان تاعى دا كوز جەتكىزدىم.
ال، قازىرگى تاڭدا ساپالى، دۇرىس جۇمىس اتقارىلىپ جاتقان جوق. مۇنى مويىنداۋىمىز كەرەك. ءبىر سوزبەن ايتقاندا، بۇل سالانىڭ جۇمىسىن تۇبەگەيلى جاقسارتۋ قاجەت. مينيسترلىك، ونىڭ باسشىلارى ءوز قىزمەتتىك مىندەتتەرىنە سەلقوس قارايدى. نە ىستەۋ كەرەك ەكەنىن بىلمەيدى. شۇعىل شەشىمدەر قابىلدامايدى. سوندىقتان وسىنداي اپاتتار ورىن الىپ وتىر"، - دەدى مەملەكەت باسشىسى.
ايتقانداي، ەكس-توتەنمين يۋريي يلينگە تىقىر تاياندى. تولىعىراق وسى جەردە: https://t.me/dalainside/1353
https://dalanews.kz/bas-takyryp/90377-tuk-istemegen-toqaev-abay-oblysynda
