"Zardap shekken barlyq otbasyǵa jeke járdemaqy taǵaiyndalady. Men sizderge ýáde beremin. Prezident janynan arnaiy qor qurylady. Zardap shekkenderge jeke kómek kórsetemin", – dedi Toqaev.
Prezident barlyq másele jaqyn arada sheshiletinin aitty.
"Atqarýshylardyń barlyǵy osynda. Sizderdiń barlyq qajettiligińiz boiynsha tizim jasalady. Búgin – jeksenbi, kelesi aptada barlyq másele sheshiledi. Ótinishterińizdiń bári oryndalady", - dedi ol.
Memleket basshysy artynsha Abai oblysynda shuǵyl áreket etý shtabynyń otyrysyn ótkizdi.
"Elimizde taǵy da alapat órt bolyp jatyr. Ókinishke qarai, tilsiz jaýmen kúres kezinde azamattarymyz qaitys boldy.
14 adam qyzmettik mindetin atqaryp júrip erlikpen qaza tapty. Men jańa ǵana bul adamdardyń týysqandarymen kezdestim. Óte aýyr áńgime boldy. Jurt jylap otyr. Úkimetke narazylyǵyn aityp jatyr.
Marqumdardyń otbasylaryna jáne jaqyndaryna qaiǵyra kóńil aitamyn", - dedi ol.
Prezidenttiń atap ótkenindei tótenshe jaǵdai salasynsha kemshilik kóp. Toqaev osyndai apattarǵa jol bermeý qajettigin, sonymen qatar tótenshe jaǵdai bolǵan kezde tiisti sharalar joǵary deńgeide uiymdastyrylýy kerektigin tilge tiek etti.
"Bizdiń jaǵdaiymyzda kásibi salǵyrttyq, adamdardyń taǵdyryna múlde nemquraily qaraý baiqaldy. Qazir buǵan taǵy da kóz jetkizdim.
Al, qazirgi tańda sapaly, durys jumys atqarylyp jatqan joq. Muny moiyndaýymyz kerek. Bir sózben aitqanda, bul salanyń jumysyn túbegeili jaqsartý qajet. Ministrlik, onyń basshylary óz qyzmettik mindetterine selqos qaraidy. Ne isteý kerek ekenin bilmeidi. Shuǵyl sheshimder qabyldamaidy. Sondyqtan osyndai apattar oryn alyp otyr", - dedi Memleket basshysy.
Aitqandai, eks-Tótenmin Iýrii Ilinge tyqyr taiandy. Tolyǵyraq osy jerde: https://t.me/dalainside/1353
https://dalanews.kz/bas-takyryp/90377-tuk-istemegen-toqaev-abay-oblysynda
