"مەملەكەت باسشىسى قاسىم-جومارت توقايەۆ قورعانىس ءمينيسترى نۇرلان ەرمەكبايەۆتىڭ قىزمەتتەن بوساتۋ جونىندەگى راپورتىن قاراستىرىپ، ونىڭ ءوتىنىشىن قابىلدادى"، – دەپ ناقتىلادى پرەزيدەنتتىڭ باسپا ءسوز حاتشىسى بەرىك ءۋالي الەمجەلىدەگى پاراقشاسىندا.
جامبىلداعى توتەنشە وقيعادان كەيىن ەرمەكبايەۆ وتستاۆكاعا كەتۋدى ۇيعارعانىن مالىمدەگەن.
"مەنىڭ قازىرگى باستى ماقساتىم – تەز ارادا اپات سالدارىن جويۋ. ال وتستاۆكا ماسەلەسى تۋرالى ايتار بولساق، مەن وسى [جارىلىس بولعانى تۋرالى] حاباردى ەستىگەننەن كەيىن ءبىرىنشى مينۋتتا وتستاۆكاعا كەتۋدى سۇراپ ءوتىنىش بەرەمىن دەگەن شەشىم قابىلدادىم. ال قالعانىن جوعارعى باسشىلىق شەشەدى"، – دەگەن بولاتىن ەرمەكبايەۆ.
الايدا ارتىنان "بارلىعىنا مينيستر كىنالى دەۋ، ءبىر جاعىنان ناداندىق"، – دەپ پىكىر بىلدىرگەن.
"بۇل وتە كۇردەلى مەحانيزم. ءبىر ادامنىڭ بارلىعىن قاداعالاۋى وتە قيىن. ءبىراق بىزدە سونداي ءبىر قاعيدا بار: ءبىرىنشى جەتەكشى بارىنە جاۋاپ بەرەدى"، – دەگەن ەدى ەكس-مينيستر.
26 تامىز كەشكىسىن جامبىل وبلىسى بايزاق اۋدانىنداعى 28349 اسكەري ءبولىمى اۋماعىنداعى ءوق-دارى ساقتالاتىن قويمادا جارىلىس بولدى.
سالدارىنان 98 ادام جاراقاتتانعان. ولاردىڭ ءبارى قورعانىس مينيسترلىگى مەن توتەنشە جاعدايلار مينيسترلىگىنىڭ قىزمەتكەرلەرى. تۇرعىندار اراسىندا زارداپ شەككەندەر جوق دەيدى جەرگىلىكتى بيلىك.
جارىلىستان قازا تاپقاندار سانى 15 ادامعا جەتتى.
ولاردىڭ اراسىندا توتەنشە جاعداي مينيسترلىگىنىڭ، اسكەري ءبولىمنىڭ، اسكەري كۇزەت پەن اسكەري پروكۋراتۋرانىڭ قىزمەتكەرلەرى بار. ءۇش ادامنىڭ كىم ەكەنى ءالى انىقتالمادى. بۇدان بولەك، ءبىر ادام حابار-وشارسىز كەتكەن.
ەرمەكبايەۆ ءوز كەزەگىندە جارىلىسقا قويمادا قاۋىپسىزدىك تالاپتارىنىڭ ساقتالماۋى، يا حيميالىق رەاكسيامەن وزدىگىنەن تۋۋى نەمەسە ديۆەرسيا سەبەپ بولۋى مۇمكىن دەپ توپشىلاعان.
نۇرلان ەرمەكبايەۆتىڭ سوزىنشە، اسكەري قويمادا جارىلعان وق-دارىلەر وسىدان ەكى جىل بۇرىن ارىس قالاسىنان اكەلىنگەن.
2019 جىلى 24 ماۋسىمدا تۇركىستان وبلىسى ارىس قالاسىنداعى اسكەري ءوق-دارى قويماسى جارىلىپ، ءتورت ادام قازا تاپقان ەدى. جارىلىس بولعان كۇنى مىڭداعىن ءۇي زاقىمدانىپ، ارىستىڭ 40 مىڭنان استام تۇرعىنى شىمكەنت قالاسى مەن توڭىرەگىندەگى ەلدىمەكەندەرگە ەۆاكۋاسيالانعان.
https://dalanews.kz/sadak/67157-toqaevqa-zhemqorlardyng-tizimin-bering
