"Memleket basshysy Qasym-Jomart Toqaev Qorǵanys ministri Nurlan Ermekbaevtyń qyzmetten bosatý jónindegi raportyn qarastyryp, onyń ótinishin qabyldady", – dep naqtylady Prezidenttiń baspasóz hatshysy Berik Ýáli álemjelidegi paraqshasynda.
Jambyldaǵy tótenshe oqiǵadan keiin Ermekbaev otstavkaǵa ketýdi uiǵarǵanyn málimdegen.
"Meniń qazirgi basty maqsatym – tez arada apat saldaryn joiý. Al otstavka máselesi týraly aitar bolsaq, men osy [jarylys bolǵany týraly] habardy estigennen keiin birinshi minýtta otstavkaǵa ketýdi surap ótinish beremin degen sheshim qabyldadym. Al qalǵanyn joǵarǵy basshylyq sheshedi", – degen bolatyn Ermekbaev.
Alaida artynan "barlyǵyna ministr kináli deý, bir jaǵynan nadandyq", – dep pikir bildirgen.
"Bul óte kúrdeli mehanizm. Bir adamnyń barlyǵyn qadaǵalaýy óte qiyn. Biraq bizde sondai bir qaǵida bar: birinshi jetekshi bárine jaýap beredi", – degen edi eks-ministr.
26 tamyz keshkisin Jambyl oblysy Baizaq aýdanyndaǵy 28349 áskeri bólimi aýmaǵyndaǵy oq-dári saqtalatyn qoimada jarylys boldy.
Saldarynan 98 adam jaraqattanǵan. Olardyń bári qorǵanys ministrligi men tótenshe jaǵdailar ministrliginiń qyzmetkerleri. Turǵyndar arasynda zardap shekkender joq deidi jergilikti bilik.
Jarylystan qaza tapqandar sany 15 adamǵa jetti.
Olardyń arasynda tótenshe jaǵdai ministrliginiń, áskeri bólimniń, áskeri kúzet pen áskeri prokýratýranyń qyzmetkerleri bar. Úsh adamnyń kim ekeni áli anyqtalmady. Budan bólek, bir adam habar-osharsyz ketken.
Ermekbaev óz kezeginde jarylysqa qoimada qaýipsizdik talaptarynyń saqtalmaýy, ia himiialyq reaktsiiamen ózdiginen týýy nemese diversiia sebep bolýy múmkin dep topshylaǵan.
Nurlan Ermekbaevtyń sózinshe, áskeri qoimada jarylǵan oq-dáriler osydan eki jyl buryn Arys qalasynan ákelingen.
2019 jyly 24 maýsymda Túrkistan oblysy Arys qalasyndaǵy áskeri oq-dári qoimasy jarylyp, tórt adam qaza tapqan edi. Jarylys bolǵan kúni myńdaǵyn úi zaqymdanyp, Arystyń 40 myńnan astam turǵyny Shymkent qalasy men tóńiregindegi eldimekenderge evakýatsiialanǵan.
https://dalanews.kz/sadak/67157-toqaevqa-zhemqorlardyng-tizimin-bering
