جاقىندا مەملەكەت باسشىسى قاسىم-جومارت توقايەۆتىڭ قاتىسۋىمەن ىشكى ىستەر مينيسترلىگىندە كەڭەيتىلگەن القا وتىرىسى وتكەن ەدى. مۇندا پرەزيدەنت پوليسەيلەردىڭ جۇمىسىن قاتاڭ سىنعا الىپ، ولاردىڭ العا قويعان نەگىزگى مىندەتتەرى تۋرالى ايتتى. وسى تۇستا ءبىرقاتار تەلەگرام ارنالار ەرجان سادەنوۆتىڭ قىزمەتىنەن كەتۋى مۇمكىن ەكەنىن جارىسا جازعان بولاتىن، دەپ حابارلايدى Dalanews.kz.

جيىن بارىسىندا مەملەكەت باسشىسى قىلمىستىڭ جەكەلەگەن تۇرلەرىنىڭ ءوسىپ جاتقانىن ايتىپ، وڭىرلىك پوليسيا دەپارتامەنتتەرىنە سوگىس جاريالاعان. قالا بەردى ارىپتەستەرىنە الداعى اتتەستاسيا تۋرالى ەسكەرتىپ، بيىل مينيسترلىك كادر ساپاسىن ارتتىرۋعا ەرەكشە دەن قوياتىنىن مالىمدەگەن. 

سونىمەن قاتار پرەزيدەنت ىشكى ىستەر مينيسترلىگى باسشىلارىن روتاسيالاۋ ماسەلەسىن دە قوزعاعان.

وسى تۇستا، ىشكى ىستەر ءمينيسترى ەرجان سادەنوۆتىڭ جۇمىسىنا ناشار باعا بەرىلگەن ەدى. سول سەبەپتى الداعى ۋاقىتتا بۇل قىزمەتكە مينيستر ورىنباسارى قىزمەتىن اتقارىپ جۇرگەن، ۇلكەن تاجىريبەسى مەن باسقارۋشى رەتىندە بەدەلى بار يگور لەپەحا تاعايىندالۋى مۇمكىن.

توقايەۆ مۇنداي شەشىمگە كەلۋىن سوڭعى ۋاقىتتا  پوليسيا قىزمەتكەرلەرىنىڭ اراسىندا قىلمىس فاكتىلەرىنىڭ كوبەيۋىمەن بايلانىستىردى. ال قاراماعىنداعىلارعا ءوز كەزەگىندە باسشى رەتىندە سادەنوۆ جاۋاپتى بولاتىن. جۇكتەلگەن جاۋاپكەرشىلىكتى جۇيەلى اتقارا الماعاندىقتان ول قازىرگى ورىنىن بوساتىپ، الماتى پوليسيا دەپارتامەنتىنىڭ باسشىلىق قىزمەتىنە اۋىسۋى مۇمكىن.

ال الماتىنىڭ قازىرگى باس پوليسەيى ارىستانعاني زاپپاروۆ ىشكى ىستەر ءمينيسترىنىڭ ورىنباسارى رەتىندە بۇرىنعى لاۋازىمىنا قايتا ورالۋ مۇمكىندىگى بار.

ەسكە سالايىق، 2023 جىلى 2 قىركۇيەكتە مەملەكەت باسشىسىنىڭ جارلىعىمەن ەرجان ساپاربەك ۇلى سادەنوۆ قازاقستان رەسپۋبليكاسىنىڭ ىشكى ىستەر ءمينيسترى لاۋازىمىنا تاعايىندالعان بولاتىن.