Egemen Qazaqstan گازەتىنىڭ باسشىسى دارحان ءقىدىرالىنىڭ «قۇرمەتتى قاسىم-جومارت كەمەل ۇلى، ءسىزدىڭ پرەزيدەنت لاۋازىمىنداعى العاشقى ساپارىڭىز كيەلى تۇركىستاننان باستالدى. ءبىز دە سۇحباتىمىزدى وسى يگىلىكتى ساپار جايىنان باستاعىمىز كەلىپ وتىر…» دەگەن ساۋلانى ق ر پرەزيدەنتى قاسىم-جومارت كەمەل ۇلى قازاق حاندىعىنىڭ تاريحىندا تۇركىستاننىڭ ورىنى ەرەكشە ەكەنىن ايتىپ ءوز ويىن بىلايشا ساباقتاپتى:
– ءيا، مەن ءۇشىن بۇل ەلەۋلى، ماڭىزدى ساپار بولدى. تۇركىستان – قازاق حالقىنىڭ عانا ەمەس، كۇللى تۇركى جۇرتىنىڭ قاسيەتتى مەكەنى.
تۇركىستان – سان عاسىرلىق ادامزات شەجىرەسىنىڭ كۋاگەرى جانە وركەنيەت جاۋھارى.
قاراپ وتىرساڭىز، حالقىمىزدىڭ ارعى-بەرگى تاريحىندا ەل باستاعان، قول باستاعان تۇلعالارىمىز دا اسا جاۋاپتى ساتتەردە، كۇردەلى ساياسي شەشىمدەر قابىلدايتىن ۋاقىتتاردا تۇركىستانعا تاعزىم ەتە بارعان. تۇڭعىش پرەزيدەنتىمىز – ەلباسى نۇرسۇلتان نازاربايەۆ تا وسى كيەلى توپىراققا ءجيى ات باسىن بۇراتىنىن بىلەسىزدەر.
مەنىڭشە، مۇنىڭ ءبىرىنشى سەبەبى – حالقىمىز ءۇشىن اسا قاستەرلى سانالاتىن مەكەنگە ءتاۋ ەتۋ جانە اتا-بابا ارۋاعىنا، اماناتىنا دەگەن قۇرمەت بولسا، ەكىنشى سەبەبى – ۇلى دالا ەلىندەگى كەشەگى، بۇگىنگى مەملەكەتشىلدىك داستۇرگە، ەۆوليۋسيالىق دامۋ ساباقتاستىعىنا دەگەن ادالدىقتا جاتىر.
مۇنداي ساكرالدى ۇعىم-تۇسىنىك پەن داستۇرگە ادالدىق تەك وركەنيەتتى، وسىپ-جەتىلگەن ۇلتتىڭ عانا قولىنان كەلەدى دەپ ويلايمىن.
سونىڭ ءبىزدىڭ زامانىمىزداعى جارقىن ءبىر كورىنىسى – ەلباسىمىزدىڭ تۇركىستان وبلىسىن قۇرعانى. وڭىرگە كيەلى مەكەننىڭ اتىن بەرە وتىرىپ، تۇڭعىش پرەزيدەنت تاريحي ادىلەتتىلىكتى قالپىنا كەلتىردى، مەملەكەتتىڭ ىرگەسىن مىعىمداپ، جالپىۇلتتىق سايكەستىك پەن بەرەكە-بىرلىگىمىزدى ەسەلەپ نىعايتتى.
ەندىگى جەردە مەملەكەت جىبەك جولى بويىندا جاتقان تۇركىستان قالاسىن، ءوڭىرىن جاڭارتىپ-جاڭعىرتۋدى ۋاقىت وزدىرماي قولعا الۋى كەرەك. وڭىردەگى ينفراقۇرىلىمدى دامىتۋ، تۋريستىك سالانى جانداندىرۋ، ءوندىرىستى وركەندەتۋ – وسىنىڭ ءبارى حالقىمىزدىڭ ءال-اۋقاتىنىڭ بارىنشا جاقسارۋىنا نەگىز بولادى.
ونىڭ ۇستىنە، وڭتۇستىك ءوڭىر – ەلىمىزدەگى تۇرعىندار سانى ەڭ كوپ ايماق. وسى ءوڭىردى ۇلتىمىزدىڭ «دەموگرافيالىق التىن دىڭگەگى» دەسەك تە جاراسادى. ال ادام كاپيتالى ءبىز سياقتى جەرى كەڭ، ەلى شاعىن مەملەكەت ءۇشىن اسا وزەكتى فاكتور ەكەنى ايتپاسا دا تۇسىنىكتى.
ساپار بارىسىندا مەن وبلىستىڭ دامۋ جوسپارىمەن، جالپى جاعدايىمەن مۇقيات تانىستىم. الدا اتقارىلاتىن شارۋا باستان اسادى. ول شارۋالاردىڭ بارلىعىن اسىقپاي-اپتىقپاي، جۇيەلى، كەشەندى تۇردە اتقارۋىمىز وتە ماڭىزدى.
