Egemen Qazaqstan gazetiniń basshysy Darhan Qydyráliniń «Qurmetti Qasym-Jomart Kemeluly, sizdiń Prezident laýazymyndaǵy alǵashqy saparyńyz kieli Túrkistannan bastaldy. Biz de suhbatymyzdy osy igilikti sapar jaiynan bastaǵymyz kelip otyr…» degen saýlany QR Prezidenti Qasym-Jomart Kemeluly qazaq handyǵynyń tarihynda Túrkistannyń oryny erekshe ekenin aityp óz oiyn bylaisha sabaqtapty:
– Iá, men úshin bul eleýli, mańyzdy sapar boldy. Túrkistan – qazaq halqynyń ǵana emes, kúlli túrki jurtynyń qasietti mekeni.
Túrkistan – san ǵasyrlyq adamzat shejiresiniń kýágeri jáne órkeniet jaýhary.
Qarap otyrsańyz, halqymyzdyń arǵy-bergi tarihynda el bastaǵan, qol bastaǵan tulǵalarymyz da asa jaýapty sátterde, kúrdeli saiasi sheshimder qabyldaityn ýaqyttarda Túrkistanǵa taǵzym ete barǵan. Tuńǵysh Prezidentimiz – Elbasy Nursultan Nazarbaev ta osy kieli topyraqqa jii at basyn buratynyn bilesizder.
Menińshe, munyń birinshi sebebi – halqymyz úshin asa qasterli sanalatyn mekenge táý etý jáne ata-baba arýaǵyna, amanatyna degen qurmet bolsa, ekinshi sebebi – Uly dala elindegi keshegi, búgingi memleketshildik dástúrge, evoliýtsiialyq damý sabaqtastyǵyna degen adaldyqta jatyr.
Mundai sakraldy uǵym-túsinik pen dástúrge adaldyq tek órkenietti, ósip-jetilgen ulttyń ǵana qolynan keledi dep oilaimyn.
Sonyń bizdiń zamanymyzdaǵy jarqyn bir kórinisi – Elbasymyzdyń Túrkistan oblysyn qurǵany. Óńirge kieli mekenniń atyn bere otyryp, Tuńǵysh Prezident tarihi ádilettilikti qalpyna keltirdi, memlekettiń irgesin myǵymdap, jalpyulttyq sáikestik pen bereke-birligimizdi eselep nyǵaitty.
Onyń ústine, ońtústik óńir – elimizdegi turǵyndar sany eń kóp aimaq. Osy óńirdi ultymyzdyń «demografiialyq altyn dińgegi» desek te jarasady. Al adam kapitaly biz siiaqty jeri keń, eli shaǵyn memleket úshin asa ózekti faktor ekeni aitpasa da túsinikti.
Sapar barysynda men oblystyń damý josparymen, jalpy jaǵdaiymen muqiiat tanystym. Alda atqarylatyn sharýa bastan asady. Ol sharýalardyń barlyǵyn asyqpai-aptyqpai, júieli, keshendi túrde atqarýymyz óte mańyzdy.
