2025 جىلى 19 ناۋرىزدا اقش دوللارىنا شاقققاندا تۇرىك ليراسىنىڭ قۇنى ەڭ تومەنگى رەكوردتىق دەڭگەيگە دەيىن قۇلدىرادى. بۇل قۇلدىراۋ ىستامبۇل مەرى، وپپوزيسيا كوشباسشىسى ەكرەم يماموعلۋدىڭ قاماۋعا الىنۋىنان كەيىن باستالدى. ال Borsa Istanbul قورىنىڭ اشىلۋ كەزىندە بازالىق يندەكس 6،9%-عا تومەندەپ، ساۋدا-ساتتىق كىلت توقتادى. ەلدىڭ 10 جىلدىق تاۋەلسىز وبليگاسيالارىنىڭ قۇنى دا قۇلدىراي جونەلدى. اسىرەسە، مۇندايدى كۇتپەگەن شەتەلدىك ينۆەستورلار شىنداپ ابدىراپ قالدى. ال ەردوعاننىڭ ميتينگ وتكىزۋگە سالعان تىيىمىنا قاراماستان بۇگىن ىستامبۇل كوشەلەرى ادامدارعا لىق تولدى. قالا مەرى عيماراتى الدىندا جينالعاندارعا رەسپۋبليكالىق حالىق پارتياسىنىڭ كوشباسشىسى وزگيۋر وزەل: "مىنا بولعان جاعداي – توڭكەرىس جاساۋعا ارەكەتتەنۋ" دەپ مالىمدەپ، قاراشانى سابىرعا شاقىردى، دەپ حابارلايدى Dalanews.kz.

ربك مالىمەتتەرى بويىنشا، سارسەنبىدە Forex حالىقارالىق نارىعىندا تۇرىك اقشاسىنا شاققاندا 1 اقش دوللارى 11،99%-عا قىمباتتاپ، 41،1 ليرا بولدى. وسىلايشا تۇركيا تاريحىندا امەريكالىق ۆاليۋتا باعامى العاش رەت 40 ليرادان اسقان.

Bloomberg مالىمەتىنشە، تۇرىك ليراسى مەن اكسيالارىنىڭ باعاسى ىستامبۇل مەرى، پرەزيدەنت رەجەپ تايىپ ەردوعاننىڭ باستى قارسىلاسى ەكرەم يماموعلۋ قاماۋعا الىنعاننان كەيىن كۇرت تومەندەدى. باسىلىم ساياسي وقيعالار تۇرىك اكسيالارىنا قىسىم جاساي الاتىنىن ناقتىلايدى، ويتكەنى ەلدىڭ قور نارىعىندا، نەگىزىنەن، قۇبىلمالىلىق كەزەڭدەرىندە بەلسەندى ارەكەت ەتەتىن ىشكى ينۆەستورلار باسىم. تۇرىك باعالى قاعازدار دەپوزيتارييىنىڭ ۆەب-سايتىنداعى مالىمەتتەرگە سايكەس، جەرگىلىكتى ينۆەستورلار تۇرىك اكسيالارىنىڭ شامامەن 62،5%-ىنا يە.

"ساياسي وقيعالار الەمدىك ينۆەستورلاردى دا ابدىراتىپ تاستادى، ولار، نەگىزىنەن، تۇركياعا وڭ كوزقاراسپەن قارايتىن، ەكونوميكالىق تۇرعىدا تاۋەلسىز ءارى اقش-پەن ساۋدا-ساتتىقتاعى شيەلەنىستەردەن وقشاۋ دەپ پايىمدايتىن"، - دەپ جازادى باسىلىم.

ايتا كەتسەك، ىستامبۇل مەرى ەكرەم يماموعلۋ مەن ونىڭ باق-پەن بايلانىستى كەڭەسشىسى مۇرات ونگۋن 19 ناۋرىزدا ارنايى وپەراسيا بارىسىندا ۇستالىپ، سوتقا جەتكىزىلدى. ءىس بويىنشا سوتقا بارلىعى 100 كۇدىكتى تارتىلعان. وسىدان كەيىن ەل ىشىندە الەۋمەتتىك جەلىلەردىڭ جۇمىسى شەكتەلدى. سونىمەن قاتار، مەردىڭ ۇستالۋىنا بايلانىستى ىستامبۇلدا 23 ناۋرىزعا دەيىن دەمونستراسيالار مەن ميتينگىلەر وتكىزۋگە تىيىم سالىندى.

نەگىزى، الداعى جەكسەنبىدە رەسپۋبليكالىق حالىق پارتياسىنىڭ سەزىندە يماموعلۋ 2028 جىلعى پرەزيدەنتتىك سايلاۋدا وپپوزيسيا اتىنان تۇسەتىن كانديدات رەتىندە جاريالانادى دەپ كۇتىلگەن ەكەن. ال پرەزيدەنتتىك سايلاۋدىڭ مەرزىمىنەن بۇرىن، ياعني 2027 جىلدىڭ قاراشاسىندا ءوتۋى دە مۇمكىن ەكەندىگى تۋرالى دا سىبىس بار.