ۋاقىتشا قارجىلىق قيىندىققا ۇشىراعان ازاماتتارعا تۇرعىن ءۇي قۇرىلىس جيناق بانكى 2020 جىلعى 16 ناۋرىزدان كەيىن وتەلۋى ءتيىس تولەمدى 90 كۇنگە شەگەرۋگە مۇمكىندىك بەرمەك. شەگەرىلگەن تولەمگە نەگىزگى قارىز دا، نەسيە سىياقىسى دا كىرەدى. بۇل بانك كليەنتى جازعان ءوتىنىشتىڭ نەگىزىندە جۇزەگە اسىرىلادى.
وتىنىشتە كەيىنگە شەگەرۋدىڭ نە سەبەپتى قاجەت بولعانىن كورسەتۋ كەرەك، ءبىراق بانك قوسىمشا راستاۋ قۇجاتتارىن تالاپ ەتپەيدى.
تولەمدى كەيىنگە شەگەرۋ مۇمكىندىگى اۆتوماتتى تۇردە بەرىلەدى.
"الايدا ءوتىنىشتى ءدال وسى ساتتە بەرۋدىڭ قاجەتى جوق، ونى كەيىنىرەك جاسايسىز. ءقازىر ۇيدە وتىرعانىڭىز ءجون.
تولەمدى شەگەرۋ تۋرالى ءوتىنىش توتەنشە جاعداي اياقتالعان سوڭ، ياعني 2020 جىلعى 15 ساۋىردەن باستاپ ينتەرنەت-بانكينگ ارقىلى قابىلدانادى. بارلىق ءوتىنىش ماقۇلدانادى.
شەگەرۋدى 2020 جىلعى 16 ناۋرىزدان كەيىن وتەلۋى ءتيىس تولەمدەرگە قاتىستى قولدانۋعا بولادى. ءونلاين-وتىنىش بەرۋ كەزىندە 2020 جىلدىڭ 16 ناۋرىزىنداعى جاعداي بويىنشا ۋاقتىلى وتەلمەگەن نەسيە تولەمى بولماۋى كەرەك ەكەنىن ەسكەرىڭىز.
ۇيدەن شىقپاۋدى جانە ۋايىمداماۋدى وتىنەمىز، سەبەبى تولەمدى كەيىنگە شەگەرۋ نەسيە مەرزىمىن 3 ايعا ۇزارتۋ ارقىلى جۇرەدى. بۇل سىزگە اي سايىنعى تولەم كولەمىن قالىپتى دەڭگەيدە ۇستاپ قالۋعا كومەكتەسەدى"، - دەيدى بانك ءتورايىمى ءلاززات يبراگيموۆا.
ونىڭ اتاپ وتكەنىندەي 2020 جىلعى 16 ناۋرىز بەن 16 ماۋسىم ارالىعىندا ۋاقتىلى وتەلمەگەن تولەمدەر بويىنشا ايىپپۇل جانە ءوسىمپۇل قوسىلمايدى.
"وسى ءۇش اي ىشىندە نەگىزگى قارىز بەن سىياقىنى وزىڭىزگە ىڭعايلى ۋاقىتتا ىڭعايلى كۇنى تولىق وتەسەڭىز، تولەمدەردى كەيىنگە شەگەرۋ تۋرالى ءوتىنىش بەرمەي-اق، قولايلى نەسيە وتەۋ كەستەسىن تاڭداپ، ايدىڭ كەز كەلگەن كۇنىندە قارىزدى وتەي الاسىز. مۇنى ۇيدەن شىقپاي-اق ونلاين جاساۋعا بولادى"، – دەيدى ول.
سونىمەن قاتار 2020 جىلعى 30 ناۋرىزدان باستاپ كارانتين اياقتالعانشا قازاقستان اۋماعىنداعى بارلىق فيليالدا تۇرعىن ءۇي قۇرىلىس جيناق بانكى كليەنتتەرگە قىزمەت كورسەتۋدىڭ جاڭا نۇسقاسىنا وتەدى. بولىمشەلەردە نەسيە وتىنىشتەرىن قابىلداۋ، پوستكرەديت جانە پوستدەپوزيت وپەراسيالار ۋاقىتشا توقتاتىلادى.
ازاماتتار بانككە كەلىپ، تەك ەكى وپەراسيانى قولدانا الادى: دەپوزيتتى ءبولۋ/توقتاتۋ ارقىلى اقشاڭىزدى الۋ، سونداي-اق زاەمنىڭ ءبىر بولىگىن جابۋ نەمەسە ونى تولىقتاي وتەۋ. بۇل وپەراسيالاردى پايدالانۋ ءۇشىن كليەنتكە بانك سايتىنداعى ونلاين-برونداۋ ارقىلى الدىن-الا جازىلۋ كەرەك.
"27 ناۋرىز 18.00-گە دەيىن بەرىلگەن جانە ماقۇلدانعان بارلىق نەسيە ءوتىنىشى كليەنتتى تەلەفونمەن جەكە حابارلاسىپ شاقىرۋ ارقىلى بەرىلەتىن بولادى. ءقازىر ءبىز 1000 شاماسىنداعى نەسيە ءوتىنىشىن قاراستىرىپ جاتىرمىز، 200 ءوتىنىش بەرىلۋ كەزەڭىندە.
كارانتين اياقتالعانشا ساتىپ الۋ-ساتۋ مامىلەسىن جاساسپاۋعا شاقىرامىز، الايدا اۋىرىپ قالۋ قاتەرىنەن دە جوعارى تۇرعان دۇنيەلەر بولسا، نەسيە ءوتىنىشىڭىزدى قاراستىرىپ، سوڭىنا دەيىن جۇرگىزىپ بەرەمىز.
نەسيە وتەۋ جانە دەپوزيت تولىقتىرۋ سىزگە ىڭعايلى بولۋى ءۇشىن قالاداعى كارانتين رەجيمىندە اشىق تۇرعان ورىنداردا ورنالاسقان تولەم تەرمينالدارى ىستەيدى. الايدا ساۋدا-ويىن ورتالىعى مەن بازار ىزدەپ قالادا جۇرمەي، تولەمدى جسسب 24 ينتەرنەت-بانكينگى ارقىلى جۇرگىزۋگە شاقىرامىز. مۇندا ءسىز كەز كەلگەن بانكتىڭ تولەم كارتاسىن قولدانا الاسىز"، – دەيدى بانك باسشىسى.
